Politikkerit inoqatinut attaveqaatinik atuinerat inatsisiliornermut piffissaajaataasarpoq
Inoqatinut attaveqaatinik atuinerup annertusiartornera Folketingimi ilaasortat tatineqarnerulernerannik kinguneqartoq, nalunaarusiami nutaami inerniliunneqarpoq.
Justitia-p nalunaarusiaa nutaaq naapertorlugu Folketingimi oqallinneq ministerit ataatsimiittarfiinut, matup matoqqasup tunuani isumaqatigiissuteqarfigineqartartumut, nuunneqaraluttuinnarpoq.
Ida Marie Odgaard/Ritzau Scanpix
Folketingimi ilaasortat, suliassaminnik ulapputeqangaareersut, inoqatinut aattaveqaatit piffissaajaatiginerujartorpaat.
Tamanna inatsisartut suliaannut piffissaajaataasarpoq, inatsisinillu suliarinninnerup peqqissaarunneqarnissaanut ajoqutaalluni.
Justitia-p nalunaarusiaani nutaami „Inatsisinik suliaqarnermi unammillernartut“-mik qulequtalimmi, taamatut inerniliisoqarpoq.
Politikkikkut oqariartuutit saqqummiunneqartillugit politikkerit inoqatinut attaveqaatinik ulluinnarni atuisarnerat nalinginnaaleraluttuinnartoq, Justitia nalunaarusiami inerniliivoq.
Inatsisissatut siunnersuutinik misissuinikkut folketingimilu ilaasortaasimasunik ilaasortaasunillu apersuinikkut nalunaarusiaq suliarineqarpoq.
- Folketingimi ilaasortat suliassaminnik suliaqartartut ikinneruleriartorput, tassa isornartorsiuisinnaassuseqarlutik inatsisinik atuaqqissaartartut inatsisiliorfigisaminnillu paasinnittartut, maannakkut Folketingimi ilaasortaasoq nalunaarusiami atiminik taasaqanngitsoq oqarpoq.
Piffissakinnerup inatsisiliornerit tamaasa sunnersimanerulerai nalunaarusiami ataatsimut isigalugu inerniliunneqarpoq. Folketingimi ilaasortat amerlasuut oqaaseqartartuusariaqarnerat ataatsimiiffissaallu qaleriiaartartut ilaatigut allassimavoq.
Inatsisissatut siunnersuummik tamakkiisumik inatsisissatullu siunnersuutip oqaaseqaataanik Folketingimut ilaasortat ikittuinnaat atuartartut, tassunga atatillugu aammattaaq inerniliunneqarpoq.
Sunniuteqarluartumik, ammasumik peqqissaartumillu inatsisiliornerit inuiaqatigiit demokratii tunngavigalugu inatsisinik tunngavillit ataqatigiilluarnerannut atassutaasut, Birgitte Arent Eiriksson, Justitia-mi pisortaasoq, tusagassiuutinut nalunaarummi oqarpoq.
- Ajornerulerpat, tamanna innuttaasunut suliffeqarfinnullu kingunerlutsitsingaarsinnaavoq, soorluttaaq inuinnaat naalakkersueqataanerannut inuiaqatigiillu ajornartorsiutaasa Christiansborgimi aaqqinneqarsinnaanerannut tatiginninneq neriorneqarsinnaasoq, oqarpoq.
Taamaattumik Folketingimut ilaasortat piffissakissusiat, suliassarpassuaqarpallaarnerat piginnaaneqarfinnillu amigaateqarnerat pillugit nalunaarusiami unammilligassatut tikkuarneqartut iliuuseqarfigeqqullugit Justitia arlalinnik innersuussuteqarpoq.
Folketingimi ilaasortat inatsisissatut siunnersuutinik assigiinngitsunik misissuilluarnissamik sapernartitsisarmata, inatsisinut siunnersuisoqatigiinnik attuumassuteqanngitsunik Folketingip ataaniittunik inatsisitigut pilersitsisoqarnissaanik siunnersuuteqarluni Justitia inerniliivoq.
Inatsisissatut siunnersuutit aalajangiiffigisassatullu siunnersuutit pitsaassusiat siunnersuisoqatigiit nalilersinnaassavaat, tamatumunngalu atatillugu Folketingimi ilaasortat siunnersorsinnaassavaat.
/ritzau/
