COP29
Professorit: Silap allanngornera pillugu isumaqatigiissut nutaaq nunanut uuliaatilinnut ajugaaneruvoq
Ikummatissat mingutsitsisut (fossile brændstoffer) silap allanngoriartornera pillugu isumaqatigiissummi COP-28-mi ilanngunneqarsimapput, kisianni isumaqatigiissummi nutaami taaneqanngillat.
DTU-mi silap pissusaanut aamma aningaasaqarnermut Professorip, Kirsten Halsnæsip isumaqatigiissut nutaaq taavaa "annertoorujussuarmik annaasaqartitsissasoq", ikummatissat fossiilit atorneqarunnaarnissaat COP29-imi isumaqatigiissummi taaneqanngimmat.
Assiliisoq (toqqorsivimmit): Emil Helms/Ritzau Scanpix
Isumaqatigiinniartorpassuit akornanni nunat uuliaatillit tassaapput nunat ikittuinnaat, COP29-imi ataatsimeersuarnermi Bakumi nuannaarlutik angerlarsinnaasut.
Taamak naliliivoq Kirsten Halsnæs, DTU-mi (Danmarks Tekniske Universitet) silap pissusaa aammalu aningaasaqarnermut professoriusoq.
- Oqarusuppunga, annertuumik annaasaqaataasoq, isumaqatigiissutip allassimasaani, aamarsuit, uulia aamma gassip ikummatissatut atorunnaarsikkiartuaarnerat ilanngunneqarsimanngimmat, professori oqarpoq.
- Taamaammat nunat uuliasiortut aamarsuarsiortullu isumaqatigiissut pillugu nuannaassapput. Ilimagaaralu taakku kisimik nuannaarsimassasut.
Kirsten Halsnæsip erseqqissarpaa, COP28-imi Dubaimi ukioq kingulleq ingerlanneqartumi silap pissusaa pillugu isumaqatigiissummi ilanngunneqarsimasoq, tassalu nunarsuaq tamakkerlugu ikummatissat mingutsitsisut atorunnaarsikkiartuaarneqassasut siunnerfiusimagaluartoq.
Ukioq manna silap pissusaa pillugu isumaqatigiissummi ikummatissat taakku atorunnaarsikkuartuaarnissaat oqaatigineqanngilaq - tassa aamarsuit, uulia aamma gassi matumani pineqarput.
Ikummatissat pineqartut annertuumik aniatitsisarput silaannarmik kissatsikkiartortitsisartunik, pingaaruteqarpoq tamanna eqqaamassallugu, Kirsten Halsnæs oqarpoq.
Professori silap pissusianik allanngoriartornernik Syddansk Universitetimi (SDU) Sebastian Mernild silap pissusaa pillugu isumaqatigiissut nutaaq "sakkukillisaataassasoq" COP28-imi isumaqatigiissummut sanilliullugu.
- Pakatsinaqaaq ernumanarlunilu, isumaqatigiissut Dubaimiit naqissuseqqinneqanngimmat, Sebastian Mernild oqarpoq.
- Nalunngilarput kingunerisassai suunersut, silaannarmik kissatsikkiartortitsisartunik suli aniatitsiuarutta. Kingunissaami tassaavoq, nunarsuaq sakkortuumik kissatsikkiartuinnassasoq, ullumikkut nalaateriikkatsinnut sanilliullugu, taanna nangippoq.
COP28-ip inernera siullerpaamik ikummatissat pineqartut FN-ip sila pillugu ataatsimeersuarnerani isumaqatigiissummi taaneqartutut nalunaarsivoq.
Amerlasuut avatangiisinik suliaqartartut oqaatigaat COP29-imut isumaqatigiissut tupinnaqisoq. Isumaqarput, isumaqatigiissut naammanngitsoq avatangiisinullu kingumut alloriarnerusoq.
- Naalagaaffiit ikummatissanik taakkuninnga pilersuisut akisussaaffimmik tamanik pinngitsuutinneqarput, illaatigalutik bankiliarsinnaatitaalerput, Tracy Carty, Greenpeace-mi silap pissusaanik ilisimasalik, tusagassiorfinnut nalunaarummi oqarpoq.
