Qaqqasiortartoq kommunimi pisortaaneruinnassasoq

Qaqqasiortartup Nick Nielsenip Himalayap illoqarfiani Nepalimiittoq qaqqarsuaq Mount Everest kalaallini kisiartaalluni qaqinikuuaa.

Misigisassarsiortartup Nick Nielsenip Avannaata Kommuniani pisortatut atorfini apriilimi soraarniuteqarfigaa.

Atorfimminiiginnassaarli.

- Soraarniutiga tunuartippara, 50-inik ukiulik Nick Nielsen Sermitsiamut oqarpoq.

Nunatsinni nunatatigut kommunip annersaani pisortaatut unammilligassani nuannarigamigit suliinnarnissani aalajangerpaa.

- Borgmesteri Lars Erik Gabrielseni kommunalbestyrelsimilu ilaasortanngorlaat suleqatigillualerpakka. Kommunimi pisortaaginnaqqullunga kaammattorpaannga. Itigartissanngilakka, oqarpoq.

Nick Nielsen kommunip nittartagaani apriilimi ima allappoq:

- Ingerlariaqqinnissannut piffissanngorsimasoq malugisinnaavara, taamaattumillu ukiamut atorfinnit tunuassallunga qinerpara.

Soraarniutini tunuartillugu kommunalbestyrelsimut ilaasortanut allappoq. Nick Nielsen taamaalilluni kommunimi pisortatut isumaqatigiissutini malillugu ukiuni marlunni affarmilu sulisinnaavoq.

Unammilligassat nuannarigai

Qaqqasiornermik suli aallutaqartoq Nick Nielsen nunarsuarmi qaqqat portunersaannik qaqisaqarnikoq misilittagaqarluartuuvoq. 2004-miilli upernaat tamaasa nunarsuarmi qaqqat ilaannut ikinngutinilu qaqqasioriartarput. Aappaa Rikke Rysgaard ukiuni kingullerni peqataasarpoq.

Sunaliuna pissutigalugu ulorianaraluarpalluunniit nunarsuarmi qaqqat portunersaannukarusuttartoq?

- Qaqqasiunngitsoorsinnaannginnama. Pinngortitamiinneq nuannaralugulu imminut unammillernissara nuannarisorujussuugakku, Nick Nielsen oqarpoq.

Pinngortitarsuaq nuannaraa, qaqqasiornerlu pissusissamisoorpoq.

Kommunimili pisortatut suliffini inuussutigaa.

- Suliffiga piumasaqaateqartorujuuvoq, politikerilli uannut unammillernartunik suliassiissutigisartagaat nuannaraakka. Suliassat nuannersunik aaqqinniarsarisartakkakka uannut suliassiissutigisartagaraat, oqarpoq.

Ilisimatusarluni angalanernut amerlasuunut peqataasarsimasoq

Qaqqasiussatilluni Nepalimukarusunnerusarpoq aammali Argentinamukarlunilu Pakistanimukartarpoq.

- Nepalimukarusunnerusarpunga, Ilulissaniit oqarasuaatikkut oqaloqatigineqarami illalaarluni oqarpoq.

Nick Nielsen ilisimatusarluni angalanernut amerlasuunut peqataanikuuvoq, 2005-imilu nunarsuarmi qaqqat portunersaat Mount Everest, Himalayami Nepalip Tibetillu killeqarfianniittoq, immap qaavanit 8848 meterinik portussuseqartoq, qaqivaa.

- Aappara ikinnguterpassuagullu ilagalugit upernaaq Nepalimiippunga, tassanilu qaqqap Lubuchep 6119 meterisut portutigisup qaavanut qaqivugut. Taanna Mount Everestip kitaatungaaniippoq. Siorna Argentinamiippugut, tassanilu Andesip qaqqaani portunerpaaq Aconcagua qaqillugu, oqaluttuarpoq.

Nick Nielsenip pinngortitami unammilligassanik ujartuiuartuuvoq. Ukiualuit matuma siornatigut Tasiilamiit Nunap Isuanut tamatumalu kingorna Qimusseriarsuup Kangerluanut qaannamik ingerlaarpoq. Tamanna ingerlaarfinni arlalinni pivoq. Nick Nielsenip Sermersuaq sisoraatinik marloriarluni ikaarsimavaa.

Ilulissaniikkaangami ullut tamangajaasa timigissartarfimmi sungiusartarpoq. Taamaanngippat Nick Nielsen arparusaartuuvoq. Maratonip affaa upernaaq manna arpappaa. 

Suliaq ilungersunartoq

Nick Nielsen Avannaata Kommuniani kommunimi pisortatut suliassanut unammillernarsinnaasunut piareersimavoq. Kommuni 11.000-it missaannik innuttaqartoq 526.000 kvadratkilometerinik angitigaaq, 14.700 kilometerinik isorartussuseqarluni. Sisamanik illoqarfeqarpoq 23-nillu nunaqarfeqarluni.

2019-imi kommunimi pisortanngorpoq. Suliffeqarfimmi angisuumi politikkikkut aqunneqartumi 1700-nik sulisulimmi pisortaaneq ilungersunartoq Nick Nielsenip miserratiginngilaa.

- Assersuutigalugu qanittukkut Upernavimmut borgmesteri angalaqatigissavara. Taamatut angalagaangatta innuttaasunit nersualaarneqarneq ajorpugut. Amerlarsuut sulisuusugut kommunilu isornartorsiortarpaat, Nick Nielsen oqarpoq.

Kalaallit Nunaanni Avannaata Kommunia ilanngullugu suli inunnik isumaginninnikkut ajornartorsiutit annertusut isertuunneqarsinnaanngilaq.

- Unammilligassatta annerpaat ilagaat isumaginninnikkut ajornartorsiutit, taakkulu iliuuseqarfigiuassallugit. Assersuutigalugu meeqqat amerlasuut angerlarsimaffiup avataanut inissinneqartarput.

- Taamaattumik meeqqat angerlarsimaffiup avataanut inissinneqartarnera pinaveersaartinniarlugu ilaqutariinni pinaveersaartitsinermik suliniuteqartariaqarpugut, Nick Nielsen oqarpoq.

Avannaata Kommuniani meeqqat 100-t missaanniittut angerlarsimaffiup avataanut maanna inissinneqarnikuupput.

Ingeniøritut ilinniagalik

Avannaata Kommuniani sulilinngikkallarami Qaasuitsup Kommuniaasimasumi Sanarfinermut Avatangiisinullu Ingerlatsivimmi pisortaavoq.

Qasigiannguani inunngorfini qimallugu Danmarkimi 1992-imi ilinnialerpoq. Diplomingeniøritut ilinniakkani 2005-imi naammassivaa Danmarkimilu kommunimi ingeniørit siunnersuisarfiini marlunni sulilerpoq. Tamatuma saniatigut Københavnip avannaani Lyngbymi Danmarks Tekniske Universitetimi, DTU-mi, civilingeniøritut ilinniarluni.

Nick Nielsen aamma sivikitsumik politikkimik suliaqarsimavoq. Siumut sinnerlugu Folketingimut 2011-mi qinigassanngortippoq, qinigaananili. Aleqa Hammondip naalakkersuisuini 2013-imi ilinniartitaanermut, kultureqarnermut, naligiissitaanermut ilageeqarnermullu naalakkersuisunngorpoq.

Ukiorli ataaseq qaangiuttoq Nick Nielsen tunuarpoq. Aleqa Hammond naalakkersuisut siulittaasuattut naalakkersuisoqatinilu arlallit tatigiunnaarnera tunuassutigaat.

Nick Nielsenip Rikke Gram Rysgaard nuliaraa, taanna Ilulissani takornariartitsisarfimmik Inuk Adventuremik piginnittuuvoq. Aappariit meeraqanngillat. Nick siornatigut aapparisimasaminit pingasunik arfinilinnik, 15-inik 18-inillu ukiulinnik meeraqarpoq.