KL

DK

Qinerneqarnerpaasartoq qinigassanngorteqqippoq

Qeqqata Kommuniani borgmesteri, Malik Berthelsen (S) kommunimut apriilip aallaqqaataani qinersinissamut qinigassanngorteqqinniarluni nalunaarpoq.

Apriilip aallaqqaataani kommunimut qinersigutta Malik Berthelsen krydsilerneqarsinnaassaaq, piumagaanni.
Tôrtia Reimer-Johansen
Journalist
Offentliggjort

Apriilip aallaqqaataani kommunimut qinersigutta Malik Berthelsen krydsilerneqarsinnaassaaq, piumagaanni.

Sivisuumik qineqqusaassanerluni qineqqusaassannginnerluniluunniit isumaliutersuutigereerlugu qinigassanngortinniarluni aalajangerpoq. Tamanna Sermitsiamut nammineq uppernarsarpaa:

-  Kommunitta akisussaassusilimmik piviusorsiortumillu aqunneqarnissaa pingaarutilerujussuuvoq. Isumaqarpungalu tamatumani suli siuttuunissannut kommunitta atorfissaqartikkaanga, taamaattumik qinigassanngorteqqinniarlunga aalajangerpunga.

Malik Berthelsen kommunimut kingullermik qinersigatta 976-inik taaguunneqarluni qinerneqarpoq.

Suliniutit angisuut arlallit

Maanna borgmesteriusup Aasivissuit-Nipisat, Nationalpark, ATV-inut aqqusineq, Kangerlussuaq, Sisimiunilu kommunip umiarsualivia kilisaataatileqatigiinniit ineriartortitsiffigineqarniartoq suliniutigalugit nanginniarpai.

Taassuma saniatigut Nuup mittarfia iluaqutigalugu Maniitsumi takornariaqarnikkut ineriartortitsinissaq, Sisimiuni Saviminilerinermik ilinniarfimmik nutaamik sananissaq aammalu Tasersiaq atorlugu erngup nukinganik Maniitsup eqqaani suliffeqarfissualiornissaq petaaffiginiarpai.

-  Siuliinilu taasakka tamaasa eqqarsaatigalugit isumaqarpunga kommunerput isumalluarnartumik siunissaqartoq.

Meeqqat atuarfiat naluttarfillu utaqqisaasoq

Meeqqat atuarfiat peqqinnartumillu meeraanissaq nukittorsaaffiginiarpai.

-  Kommunalbestyrelsemililu sulinitsinni pingaartinnerpaasatta ilaat, meeqqat atuarfiata inuiaqatigiinnit tamanit ataqqinneqarnerulernissaanik aammalu meerartatta peqqinnartumik meeraanissaannik anguniakkagut soorunami pingaartillugit nangeqqikkusuppakka. Pissutigalugu taakkuummata siunissami inuiaqatigiittut atugarissaarnissatsinnut aalajangiisuullutillu pingaaruteqarnerpaat ilaat.

Sisimiuni naluttarfittaarnissaq Sisimiuni innuttaasut qangali qilanaaralugulu utaqqivaat, tamannalu piviusunngortinnissaa Malik Berthelsenip sulissutigeqqinniarpaa.

-  Sunngiffimmilu sammisassat eqqarsaatigalugit naluttarfiliornissamut maannamut aningaasaliissutigisagut 20mio.kr.-usut ukiuni tulliuttuni tamakkiisumik naammatsinneqarnissaat, Sisimiunilu nutaamik sisorartarfiliornissaq aningaasaliiffigeriigarput aallartinneqarnissaa qulakkeerinneqataaffigerusuppakka.

sisimiut samfund aasivissuit-nipisat inuiaqatigiit malik berthelsen naalakkersuisut tasersiaq

ATORFIIT Se alle jobs

Powered by Labrador CMS