RG-mi pisortaaneq taamaatittoq: Susanne Arfelt Rajamand soraarsitaavoq
Pisortaanerup Susanne Arfelt Rajamandip suleqatiginera unitsinneqartoq Royal Greenland ilisimatitsivoq. Allaanerusumik siuttoqarnissaq siulersuisut nalilerpaat
Assi: Leiff Josefsen
Susanne
Arfelt Rajamand Royal Greenlandimi pisortaanertut ukiuni marlunni
atorfeqarpoq.
Siulersuisut
pisortaaneq februaarip qulinganit suliunnaarsinniarlugu aalajangertut
Royal Greenland tusagassiuutinut nalunaarummi ilisimatitsivoq.
Susanne
Arfelt Rajamand 2023-mi februaarimi pisortaanertut
atorfinitsinneqarpoq.
Allaanerusumik
siuttoqarnissaq siulersuisut nalileraat Royal Greenlandimi
siulersuisuni siulittaasoq Maliina Abelsen soraarsitsineq pillugu
oqarpoq:
-
Royal Greenland ukiuni kingullerni marlunni
assigiinngitsorpassuartigut ajornartorsiortarsimavoq, maannakkullu
allaanerusumik siuttoqarnissaa siulersuisut isumaqatigiillutik
nalilerpaat, taamaattumik pisortaaninngortussamik
nutaamik sulisussarsiornissaq aallartinneqarpoq. Susanne suleqatigisimaneranut
qutsavigaarput, Maliina Abelsen oqarpoq.
Pisortaanermik
nutaamik nassaartoqarnissaata tungaanut siulersuisunut ilaasortaq
Preben Sunke pisortaanerugallassaaq.
Preben
Sunke Forenet Kreditimi Nykreditimilu siulersuisunut siulittaasup
tulliattut inissisimavoq Danish Crownimilu
aqutsinermi ukiut 30-t sinnerlugit misilittagaqarluni.
Royal
Greenland piffissami ilungersunartorsiornikuuvoq. 2023-milu
akileraarutit suli ilanngaatiginagit 255 millionit koruuninik
amigartooruteqarpoq.
2024-mi
ukiup affaani siullermi aamma amigartooruteqartoqarpoq.
Susanne
Arfelt Rajamand aningaasatigut ajornartorsiorneq pissutigalugu
aningaasarsiornikkut ingerlalluaqqilernissamut
pilersaaruteqarsimavoq, maannali soraarsinneqarpoq.
Royal Greenland Namminersorlutik Oqartussanit tamakkiisumik pigineqarpoq, 2023-milu 5,8 milliardit koruunit missaannik kaaviiaartitaqarpoq.
