SIULLERMEERLUNI QALLERSAAMMIK KAPUISSUT
Royal Greenlandip qullersaqarfissaata sananeqarnera aallartippoq
Allaffeqarfissarsuaq 5.600 m2-nik angissusilik 2026-mi ukiaanerani atoqqaarfissiorneqarnissaa naatsorsuutigineqarpoq. - Ullumikkut ulloq oqaluttuarisaanermi pingaaruteqarpoq, tassami Royal Greenlandip qullersaqarfissaata nutaap sananeqarnera aallartipparput, taamaalillunilu ukiut arlallit kissaatigineqartut piviusunngortinneqarput, Naalakkersuisut siulittaasuat, Múte Bourup Egede (IA), aamma sanaartorfissami nivariaqqaartuusoq oqarpoq.
Assit amerlanerusut takukkit assimi siullermi tikkuut toorlugu.
Namminersorlutik Oqartussat ingerlatseqatigiiffiutai pingasut suleqatigiillutik Nuummi Qeqertani allaffeqarfissarsuarmik suliniutaat timitalersorneqarsinnaanngorpoq, ingerlatseqatigiiffiit pineqartut tassaapput Sikuki A/S, Illuut A/S aamma Royal Greenland A/S.
Royal Greenlandimi siulittaasup, Maliina Abelsenip oqaatigaa Sikuki A/S illorsuassap toqqavissaanik sanaartortitsissasoq, taassuminngalu illorsuarmik piginnittuussasut Illuut A/S aamma aningaasaateqarfik SISA, naammassereerpallu Royal Greenland illorsuarmik attartortunngussasoq.
Inuiaqatigiinnit kissaatigineqartoq naammassineqassaaq illorsualiaq naammassippat
Naalakkersuisut siulittaasuat, Múte Bourup Egede (IA) aamma namminersorlutik oqartussat ingerlatseqatigiiffinnut akisussaasuusoq, ingerlatseqatigiiffiit pineqartut akornanni isumaqatigiissuteqartoqarneranik nuannaarutiginnippoq, taamaalillunimi Royal Greenlandip qullersai qitiusumillu allaffeqarfimmi atorfilittai tamarmik ataatsimuulissammata:
- Ullumikkut alloriarnerput oqaluttuarisaanermi pingaaruteqarpoq. Alloriarneq taanna nivariaqqaarnermik aallartittoq sanaartornissamik aallarniutaavoq, tassalu Royal Greenlandip qullersaqarfissaanik sanaartorneq, tamannalu aamma isumaqarpoq, RG-mi qullersat aqutsisullu tamarmik Kalaallit Nunaannit aallaaveqalissasut, tamannalu inuiaqatigiit kalaallit ukiorpassuanngortuni kissaatigisarivaat, Bourup Egede tikilluaqqusinermini ilaatigut oqarpoq.
Aperineqarami Royal Greenlandip aqutsisuisa tamakkiisumik Kalaallit Nunaanni katersorneqarnissaat sooq taama pingaaruteqartigisoq, Naalakkersuisut siulittaasuat akivoq:
- Pissusissamisoorpoq ingerlatseqatigiiffik inuiaqatigiit Kalaallit pigisaat, nunatsinnit aallaveqarluni ingerlanneqassappat, taamaammallu aamma aqutsisui nunatsinniinnissaat aamma pissusissamisoorpoq, tamannami aamma inuiaqatigiinnit aammalumi politikkikkut ukiorpassuanngortuni kissaatigineqarpoq, Múte akivoq nangillunilu:
- Aamma pissusissamisoorpoq pingaaruteqarlunilu, namminersorlutik oqartussat ingerlatseqatigiiffiisa suleqatigiillutik taamatut iliuuseqarnerat, qularinngilaralu suleqatigiinneq annertuumik Kalaallit Nunaata innuttaasalu aningaasarsiornerannut pitsanngorsaataassasoq.
Qanoq ilillusi Royal Greenlandip annaasaqannginnissaa qulakkeersinnaavisiuk, tassami aqutsisut tamarmik Nunatsinnut nuussappata, ingerlatseqatigiiffiup nunarsuarmi niuffannermi peqataanera eqqarsaatigalugu?
- Ingerlatseqatigiiffiup maannamut nunarsuarmi attaveqaatini niueqatinilu nunatsinniit isumagereerpai, tamannalu ingerlateqqinniarneqarpoq nukittorsarneqarlunilu. Pingaaruteqarportaaq erseqqissaassutigissallugu, ingerlatseqatigiiffik pilersinneqarnikuummat Kalaallit Nunaata soqutigisaasa isumaginissaat suliassaralugu, taamaattumik qullersaqarfiata maani nunami katersuussimanissaa pissusissamisoorpoq. Tamannattaaq nunarsuarmi niuernermi pisisartunut takutitsinerussaaq Royal Greenlandip aqutsisui maani najugaqarlutik suliassaminnik isumaginnilluarsinnaasut.
- Aamma eqqaamaneqassaaq, periarfissat nutaat takkuttussaammata nunat tamalaat akornanni mittarfiup Nuummiittup atulerneratigut, taamaalillunilu Kalaallit Nunaanniit nunanut allanut angalasinnaaneq ajornannginnerulissaaq. Aamma pingaaruteqarpoq erseqqissasssallugu, ingerlatseqatigiiffiup nammineq kissaatigisarimmagu ullutsinnut naleqquttumik sulisunut atugassaqartitsinissaq, taamaattumik RG ingerlatseqatigiiffiillu allat suleqatigiillutik suliniut aallartissimavaat, ingerlatseqatigiiffiullu nunarsuarmi niuernermi attaveqarnerit allanngortinnagit ingerlassinnaassavai, aamma qullersat aqutsisullu tamarmik Kalaallit Nunaanni katersuutereerpata, Naalakkersuisut siulittaasuat akivoq.
RG-p siulittaasua, Maliina Abelsen: Qilanaareriilipparput!
Royal Greenlandip siulittaasua, Maliina Abelsenip nuannaarutigaaq ingerlatseqatigiiffiup 2026-mi ukiaanerani nutaamik qullersaqarfittaarnissaanut, taamaattorli aamma erseqqissaatigivaa Royal Greenland allaffeqarfissuassamik attartortuussaassasoq:
- Siullertut erseqqissarusuppara illuutissamik piginnittuunnginnatta sanaartortitsisuunatalu, Sikuki tassaavoq illorsuup toqqavissaanik sanaartortussaq, taavalu piginnittut tassaassammata Illuut aamma SISA, Royal Greenlandillu attartortuulluni, qullersaqarfittaassarlu qilanaareriilipparput, qullersaqarfimmimmi pisariaqartitsineq sivisuumik oqaluuserivarput, maannakkut qullersaqarfipput mikivallaarpoq, sulisullu ullumikkut ammassaat puuani tattoqilliortutut ipput, taamaattumik pingaaruteqarpoq sulisunut suliffimminni atugassarititaasut pitsaasut suliartornissamullu qilanaarnartunik qulakkeerunneqarnissaat, taamaalillutalu ingerlatseqatigiiffiup ineriartortinnissaa periarfissaqarfiginerulissavarput.
Pisortat qassit Kalaallit Nunaannut nuussappat, illu atorneqarsinnaalerpat?
- Siunertaanngilaq allaffeqarfissuup pisortanik ulikkaarniarnissaa, massakkoqqissaaq Royal Greenland sakkortuumik sipaarniarpoq. Anigaasaqarnikkut ajornartorsiuteqarpugut, taamaattumillu pisortat pisariaqartitavut nunatsinniitilernissaat sulissutigissavarput, kisiannili aamma sipaarniarneq annertooq ingerlattariaqarparput, taamaalilluta aningaasanik inuiaqatigiinnut utertissinnaassagatta, kisianni pisortat qullersaasut pisariaqartinneqartut allaffeqarfissaq naammassippat piginissaat isumannaassavarput, tamanna pissusissamisoorpoq, tamannalu killiffigisuussaareerparput qanorluunniit ittoqaraluarpat.
Maannakkut nammineq taavat aningaasaqarnikkut ajornartorsiuteqartoqartoq, qaqugu RG-p aningaasaqarnera nukittuunngoqqissava? Tamanna qanittumi pissasoq naatsorsuutigaajuk?
- Allaffeqarfissarsuarmik piginneqataannginnitsinnut, taamaalillutalu attartortuunissatsinnut pissutaasut ilagaat ukiuni kingullerni marlunni imaannaanngitsumik aningaasatigut ajornartorsiuteqarnerput, tassanilu nunani tamalaani akit appariartuinnavinnerannut eqqugaaqqanerput. Soorunami neriuutigaarput sipaarniarneq aqqutigalugu ukiuni aggersuni iliuutsigut naammakkumaartut, taamaalillutalu aningaasarliorneq qaangersinnaassallutigu, tassa siulittaasutut akissutigisinnaasakka, qaquguli qanorlu iliorluni aningaasaqarnerup nukittoqqikkumaarneranik siulittuinerit ingerlatseqatigiiffiup qullersai sukumiinerusumik akissutissaqassasut qularinngilara, Maliina Abelsen naggasiivoq.
