SIUMUP IMMIKKUT ITTUMIK ATAATSIMEERSUARNERA
Siumup inuusuttaasa Ineqi Kielsen siulittaasussatut innersuussutigaat
Siumullu inuusuttaanit innersuunneqarnini nuannaarutigalugulu tatiginninnermillu takutitsineq tuppalliutiginerarpaa, aamma oqaluttuarpoq sinerissamiit immikkoortortaqarfiit arlallit sassaqqullugu kaammattuutigisimagaat. Kisianni sassassanerluni partii siulliullugu ilisimatikkullugu, Sermitsiamut oqarpoq.
Ineqi Kielsen inuusuttuaraallunili Siumumi ilaasortaavoq. Siumup Inuusuttai aamma immikkoortortaqarfiit arlallit isumaqarput taassuma Siumup aqqutaa eqqortumut uteqqittariaqartoq.
Arkivfoto: Leiff Josefsen
Maanna Siumumi siulittaasunngorniunnissami periarfissat pingajuat takkuppoq. Siumup inuusuttaasa 31-nik ukiulik Ineqi Kielsen partiip siulittaasuattut piukkuppaat sassarnissaanillu kaammattorlugu:
- Siumumut peqataarusunnerup tapersersuinerullu appariartornera miserratigisinnaanngilarput, Siumullu Inuusuttaanit isumaqarpugut maanna piffissanngortoq partiip kinguaariinnik nikisitsinissaanut, tamannalu pisinnaavoq partiip inuusuttumik politikkikkullu misilittagaqarluartumik siulittaasoqalerneratigut, taamaammat Ineqi Kielsen naleqquppoq, Siumup Inuusuttaasa siulittaasuat Inuk K. Fleischer Sermitsiarmut oqarpoq.
Inuk K. Fleischerip aamma oqaatigaa kinguaariinnik nikisitsinissaq pisariaqartoq partiip inuusuttunit ornigineerukkiartornera mumisinniarneqassappat:
- Inuusuttut parteerput orniginarunnaariartuinnarpoq, tamanna takuneqarsinnaavoq partii sinnerlugu inuusuttut qinigassanngortittut ikiliartuinnarnerisigut, tamannalu allanngortittariaqarparput. Siumup Inuusuttaanit sulissutigaarput partiip inuusuttaasa immikkoortortaqarfia kajuminnartunngortinniarlugu, aamma inuusuttut Inatsisartunut qinersinissamut piareersarlugit sulissuteqarpugut. Tamanna iluatsissappat pisariaqarpoq siulittaasoq partiip atugarissaarnissaanik soqutiginnittoq, immikkoortortaqarfinnik soqutiginnilluni malinnaaffiginnittoq peqataatitsisorlu siulittaasorissagipput, aamma tassani Ineqi Kielsen piukkunnartuuvoq, Siumup Inuusuttaasa siulittaasuat Inuk K. Fleischer oqarpoq.
Ineqip kaammattorneqarnini tigulluarpaa
Ineqi Kielsen, inuusukkaluaqaluni, Siumumi politikkikkut sivisuumik peqataavoq. Siumup inuusuttaani siulittaasuusimavoq, Inatsisartuni ilaasortaasimavoq, partiip siulersuisuunerani ilaasortaasimavoq kiisalu tunngaviusumik inatsisissatut siunnersuutip suliarineqarnerani siulittaasuusimalluni.
- Nuannaarpunga, tulluusimaarpunga kaammattorneqarneralu tigulluarpara. Isumaqataavungalu kinguaariit nikinnissaannik partiip inuusuttaasa kaammattuuteqarnerannut, partiimut tapersersuerusussuseq nukittorsarneqaqqissappat.
- Aammattaaq uppernarsarsinnaavara sumiiffinni immikkoortortaqarfinnit arlalinnit attavigineqarsimallunga. Kisianni massakkut oqaatigissanngilara siulittaasussatut qinigassanngortissanerlunga, partiimi ilaasortqatikka siulliullugit taassuminnga ilisimatikkusukkakkit, Ineqi Kielsen Sermitsiamut oqarpoq.
