Sømandshjemmi PiSiu-p nersornaasiuttagaanik nersornaaserneqartoq
Sømandshjemmi innuttaasut – aamma pinerluuteqarsimasunut inissiisarfinniittut - atugarliortut ammasumik tatiginnillunilu naapittaramigit PiSiu-p ukiumoortumik pinerlunnermik pinaveersaartitsinermut suliniuteqarnermut nersornaasiuttagaanik tunineqarpoq.
Nuummi Sømandshjemmip saniatigut Sisimiuni, Aasiaanni Ilulissanilu sømandshjemmeqarpoq. Hotellit taakku ullumikkut SØMA-mik taaguuteqarput.
Assiliisoq: Oscar Scott Carl
Pinerlunnermik pinaveersaartitsinermut siunnersuisoqatigiit PiSiu pinerlunnermik pinaveersaartitsinermut malunnaatilimmik sunniuteqartumut nersornaasiuttagaat tunniunneqaqqammerpoq.
– PiSiu-mit nersornaasiuttakkamik tunissuteqarnikkut Sømandshjemmip Kalaallit Nunaanni atugarliortunut ukiorpassuarni suliniuteqarnera ajumissutsiminnillu sulinerat nersorniarparput, taakkumi inuit imminnut attaveqatigiinnerannut aqqutissiuipput, ataatsimoorlutalu peqqissiartornissamut pinerlunnerlunnginnermillu inuunissamut pitsaanerpaamik pilersitsisinnaalluta upperaarput, siunnersuisoqatigiit siulittaasuat Julie Lynge oqarpoq.
Sømandshjemmimi sulisut immikkut ittumik suliniuteqarnerat, soorlu erinarsorneq, nipilersorneq, pineqaatissinneqarsimasunut inissiisarfimmiittunik oqaloqateqarneq, peqatigiiffinnut soorlu Nuummi skakkertartunut attaveqarneq angerlarsimaffeqanngitsunullu nerisassanik pilersuineq pillugit nersorniarneqarput.
– Sømandshjemmi ulluinnarni ilungersunartunik atugaqartunut qasuersaarfissaavoq, tamatumalu saniatigut inuiaqatigiit, peqatigiiffiit, atugarliortut pinerluuteqarsimasunullu inissiisarfimmiittut attaveqatigiinnerannut aqqutissiuivoq, PiSiu-mit oqaatigineqarpoq.
Pulaarneqarneq oqiliallaataasartoq
Nuummi pineqaatissinneqarsimasunut inissiisarfimmiittut Sømandshjemmimit pulaarneqarneq pakatsisimanerminnik aniatitsiffiusutut isigigaat inissiisarfiup pisortaa Peter Fomsgaard oqaluttuarpoq.
- Taamaammat Sømandshjemmimit pulaarneqarneq ulluinnarni oqiliallaataasarpoq pingaarutilik, inissiisarfimmiittullu qilanaariuaannarpaat,“ Peter Fomsgaard oqarpoq.
Nersornaasiineq Nuummi pineqaatissinneqarsimasunut inissiisarfimmi ingerlanneqarpoq. PiSiu-p nersornaasiuttagaa 20.000 koruuninik aningaasartaqarpoq, Kalaallit Nunaannilu Brugseni suleqatigalugu tunniunneqartarpoq.
Sømandshjemmimi sulisut, Nuummi parnaarussivimmi sulisut, Brugsenimi sulisut PiSiu-milu siulersuisunut ilaasortat arlallit Nersornaasiinermi peqataapput. Sømandshjemmimi immikkoortortat allat aamma Kalaallit Nunaata sinnerani pineqaatissinneqarsimasunut inissiisarfiit aamma internetikkut peqataapput, PiSiu ilisimatitsivoq.
