PINEQAATISSINNEQARSIMASUT INISSIISARFIMMIINNISSAASA SIVIKILLISINNEQARTARNERAT
Suliat sivitsoraangata pinerluuteqarsimasut sakkukinnerusumik pineqaatissinneqartarput
Pinerluuteqarsimasut pillugit suliat sivitsortoorneqaraangata pineqaatissinneqarnerat sakkukinnerusarput. Tamanna pineqaatissiissutit eqqartuussivinni eqqartuussisuuneqarfimmilu qanittukkunni aalajangerneqartut naqissuserpaat
Pinerlunnerup kingorna piffissaq sivisooq qaangiutereersimappat sakkukinnerusumik pineqaatissiisoqarsinnaavoq.
Assi: Morten Okkels
Angut 35-nik ukiulik
Ilulissaneersoq inunnut aqqanilinnik nakuusersimasutut allanillu
pinerluttuliorsimasutut maajimi pineqaatissinneqarpoq. Pinerlunnerit
tamarmik qanittukkut pisimagaluarpata ukiut marluk sinnerlugit
pineqaatissinneqarsimasunut inissiisarfimmiittussaagaluarpoq.
Maannali ukiumik ataatsimik pineqaatissinneqaannarpoq.
Pineqaatissinneqarsimasut pillugit suliaq eqqartuussivinni sivisuumik
suliarineqarsimappat pineqaatissiissutiminnik
sivikillisitsineqartarnerat tamatumunnga pissutaavoq. Upernaaq
taamatut arlaleriarluni pisoqarsimavoq.
Angut 34-nik ukiulik
pinerluttuliornerit 14-it pillugit maajip naanerani pisuutinneqarpoq,
ilaatigut nakuusersimasutut, tillinniarsimasutut,
peqquserluttuliorsimasutut, ikiaroornartumik eqqussuisimasutut
imigassartorsimallunilu biilersimalluni pisuinnarnik
aportissimasutut.
Taamaakkaluartorli
sivikitsuinnarmik pineqaatissinneqarpoq, taamaalillunilu
pinerluuteqarsimasunut inissiisarfimmut
inissinneqartariaqanngilluinnarluni.
- Suliat sivisuumik
suliarineqartarnerat pissutaanerpaavoq. Unnerluussisussaatitaaffimmi
politiassistenti nittartakkami aviisimut Sermitsiamut uppernarsaavoq.
Ukiut pingasut
allannguilluinnartut
Inuk ilisimaneqartoq
pineqarmat suliap suliarineqarnerata sivisussusia Nuummi 2021-mi
decembarimi nakuusernermut Sermitsiap eqqartugaanut assingusumik
sunniuteqarpoq. Unnerluutigineqartoq imerniartarfimmi angummik
allamik isaatigut toorsisimavoq.
Unnerluussissut 2022-meersoq
naapertorlugu tamanna piumasaqaateqanngitsumik
pineqaatissinneqarnermik kinguneqartussaagaluarpoq. Suliarli 2025-mi
eqqartuussivimmut ingerlateqqinneqarmat, piffissarli taama
sivisutigisoq qaangiussimammat unnerluussisussaatitaasoq taamaallaat
piumasaqaateqanngitsumik pineqaatissiisoqarnissaanik
piumasaqarsimavoq. Tamatumalu kingunerisaanik sakkukinnerpaamik,
mianersoqqusinermik, aamma unnerluutigisap inuttut atugai
tunngavigalugit, pineqaatissiisoqarpoq.
Aamma
eqqartuussisuuneqarfimmi sulianut tunngatillugu
Tamakkua saniatigut
Nunatta Eqqartuussisuuneqarfiani pisimasut upernaaq
eqqartuunneqarsimasumut iluaqutaasimapput. Angut inummik allamik
apuisimalluni qimatsisimallunilu nakuusersimasutut
piumasaqaatitalimmik pineqaatissinneqarpoq, tamanna Nunatta
Eqqartuussiviani eqqartuussutit pillugit naalisakkami
takuneqarsinnaavoq. Nakuusernermut tunngatillugu suliami allami aamma
taamaappoq, angut arnap najungasuinik napisisimanera pillugu
inuiaqatigiinni kiffartortussatut pineqaatissinneqarpoq. Aamma
tamatumani eqqartuussutip sakkortuallaannginnera arlalinnik
pissuteqarpoq.
Sermitsiap suliat
kinguaattoorfiusut tamatumalu kinguneri pillugit allaaserisat
suliarineqarnissaannut attuumassuteqartut arlallit attaveqarfigai.
Eqqartuussivinni suliarineqartartut sivisussusaat
Inatsisinik
atortitsinermut ministereqarfiup eqqartuussivinni suliassat
suliarineqartarnerat pillugu kisitsisit 2024-mi januaarimi
Folketingimut tunniuppai.
Eqqartuussivinni pinerluttoqarsimatillugu
suliat eqqartuussisunik ilaasortallit agguaqatigiissillugu ullut
461-it atorlugit suliarineqartartut kisitsisit takutippaat.
Suliarli aamma
eqqartuussivimmut ingerlateqqinneqartinnagu assigiinngitsorpassuarnik
pissuteqarluni sivisuumik ingerlasinnaasoq eqqaamassallugu
pingaaruteqarpoq.
