Suliffeqarfik sermip aanneranit sioqqanik qajuusaasanngorsimasunik piiaanissamut millionilinnik aningaasaliiffigineqartoq
Suliffeqarfik Rock Flour Company 45,5 millionit koruuninik aningaasanik katersivoq, taakkulu Kalaallit Nunaanni sermip aanneranit sioqqat qajuusaasanngorsimasut piiarnissaannut atorneqassapput. Qajuusaasanngorsimasummi CO2-mik piiaasinnaallutillu naggorissaatitut atorneqarsinnaapput.
Rock Flour Company ujarassiuumiit professorimiillu Minik Rosingimit aamma silap pissusianut aningaasaliisartumit 2degreesimit, aallartitsisumit Mikkel Bülow-Lehnsbymit siulersorneqartumit, 2023-mi pilersinneqarpoq. Minik Rosing suliffeqarfimmi ilisimatusarnermut aamma pisortaasoq suliffeqarfiup nittartagaani allassimavoq.
Assi: Jesper Hansen
Suliffeqarfiup Rock Flour Companyp sermip aanneranit sioqqat qajuusasanngornikut nunarsuup sinnerani nunalerinermut atorneqarsinnaalerlugit tunisassiariniarpai.
Tamanna anguniarlugu suliffeqarfik aningaasaliisunit arlalinnit, ilaatigut Namminersorlutik Oqartussat inuussutissarsiornermik siuarsaanermut ingerlatseqatigiiffiannit Nalik Venturesimit, soraarnerussutisiaqalernissamut aningaasaateqarfimmit SISA-mit aamma Danmarks Eksport- og Investeringsfondimit (EIFO) katillugit 45,5 millionit koruuninik katerseqqammerpoq.
EIFO tusagassiuutinut nalunaarummi allappoq.
Rock Flour Company nunalerinermik piujuartitsisumik ineriartortitsivoq, nunattalu sermiata aanneranit sioqqat qajuusaasanngornikut atorlugit CO2-mik piiaanermut atorneqarsinnaalluni.
Ingerlatseqatigiiffik ujarassiuumiit professorimiillu Minik Rosingimit aamma silap pissusianut aningaasaliisartumit 2degreesimit, aallartitsisumit Mikkel Bülow-Lehnsbymit siulersorneqartumit, 2023-mi pilersinneqarpoq.
Minik Rosingip sermip aanneranit sioqqat aserorterlutik qajuusaasanngornikut nunalerinermi naggorissaatitut atorneqarsinnaanerat ukiorpassuarni ilisimatusarfigaa.
Aningaasaliineq suliniutip iluatsissinnaaneranik takussutissiinissamik periarfissiisoq
Rock Flour Companymi pisortaanerup Eliot Boothip aningaasaliineq nuannaarutigaa:
- Kalaallit Nunaanni - suliaqarfitsinni - Danmarkimilu atuileruttorfitsinni aningaasaliisartunit siuttuusunit tapersersorneqarnerput nuannaarutigeqaarput, Eliot Booth oqarpoq, nangillunilu:
- Aningaasaliinerup Kalaallit Nunaanni suliniutitta annertusiartorneranut nunarsuarmullu sunniuteqarsinnaaneranut tigussaasumik takussutissiisinnaanngorluta periarfissippaatigut.
Nalik Venturesimi pisortaagallartup Peter Christiansenip sermip aanneranit sioqqat qajuusaasanngortut periarfissaqarluartutut isigai:
- Aaqqiissutissanik nutaalianik nunarsuarmi silap pissusaata allanngoriartorneranut ajornartorsiummut aaqqiissutissaannaanngitsunik, aammali Kalaallit Nunaata aningaasaqarneranik tunngaviusumik pitsanngorsaataasinnaasumik kissaateqarnitsinnut tulluarpoq. Nunarsuup sinnerani mingutsitsinnginnerusumik ingerlariuseqarniarnermut Issittoq iluaqutaasinnaaovq, suliniutillu uuma tamanna uppernarsarpaa, Peter Christiansen oqarpoq.
