Sulisunut nunanit allaneersunut malittarisassat nutaat
Najugaqarnissamut sulinissamullu akuersissutit ukiuni marlunni atuussinnaanngussasut, naalakkersuisoq Bentiaraq Ottosen nunani allamiunut akuunerulersitsinissamullu ministeri Kaare Dybvad Bek tusagassiortunik katersortitsinermi oqarput. Malittarisassap allap allanngortinneqarnera peqqinnissaqarfimmi sulisussarsiortarnermut aamma ajornannginnerulersitsissaaq.
Nuummi ataasinngornermi marlunngornermilu ataatsimiittoqarpoq, oqaloqatigiinnerilli sivisuumik ingerlasimasut, naalakkersuisoqarfik ilisimatitsivoq.
Assi: Morten Okkels
Isumaginninnermut, suliffeqarnermut, nunamut namminermut avataangiisinullu naalakkersuisoq Bentiaraq Ottosen (A) Danmarkimi nunani allamiut pillugit akuunerulersitsinissamullu ministeri Kaare Dybvad Bekimit (S) Nuummi aggustip 18-iani 19-ianilu tikeraarneqarpoq.
Nunami najugaqarnissamut sulinissamullu akuersissutip ukiumi ataatsimi atuuttartup ukiunut marlunnut sivitsorneqassasoq taakkua tusagassiortunik katersortitsinerminni saqqummiuteqqammerpaat.
- Suleriaatsimik allannguineq nunami maani suliffeqarfinnut, taamatut aalaakkaanermik ujartuisumut, aalaakkaanerusumik pilersitsissaaq, aamma nunani allamiunik kajungersitsinissaq pillugu pisariaqartitsisoq. Peqatigalugu inunnut nunatsinni nunasiniarlutik suliniarlutillu toqqaasunut allannguineq annertunerusumik isumannaassusermik pilersitsissaaq, Bentiaraq Ottosen oqarpoq.
Nunami allamiut nunatsinni najugallit suliffitsik qimallugu peqqinnissaqarfimmi sulisinnaanngorlugit malittarisassat aamma allanngortinneqarput. Aalajangersimasumik najugaqalernissamut ukiuni arfineq-marlunni najugaqaqqaarnissamik piumasaqaataasumut, ukiut najugaqarfigeriikkamik amerlassusaat aallaaqaataaniinngikkaluarlugit taamaaliorsinnaanngorlutik.
- Soorunami kalaallit kissaataat tapersersorpakka aamma malittarisassat piffissamut malinnaanerulersinniarlugit nutarterneqarnissaat pillugit kissaateqarneq isumatusaarnertut isigalugu, nunani allamiut pillugit akuunerulersitsinissamullu ministeri Kaare Dybvad Bek oqarpoq.
Nunanut allanut ministeripNuummi mittarfimmissuarmukarnissaq marlunngornermi aamma pilersaarutigaa. Tassani Kalaallit Nunaanni killeqarfiit qanoq nakkutigineqartarnersut takuniassallugu.
