Sullivinnik Nakkutilliisoqarfik Inatsisartuni sulinermik misissuisimavoq
Ataatsimiinnerit allatut pilersaarusioqqullugit Sullivinnik Nakkutilliisoqarfiup Inatsisartut qinnuigisimagai Inatsisartut siulittaasuat Mimi Karlsen (IA) ilisimatitsivoq, taamaalilluni sulinermi avatangiisinut inatsit malinneqarsinnaaqqullugu.
Ataatsimiinnerni sulisut akunnerni amerlavallaani piffissaalatseqqallutillu sulippata aatsaat ingerlanneqarsinnaasussamik ataatsimiinnermik aaqqissuussisinnaanatik Sullivinnik Nakkutilliisoqarfimmit Inatsisartut ilisimatinneqarsimasut, Inatsisartut siulittaasuat Mimi Karlsen (IA) nassuiaavoq.
Assi: Leiff Josefsen
Ukiakkut ataatsimiinneq nutaarluinnarmik aaqqissuussaq tallimanngorpat aallartissaaq. Ilaatigut piffissami sivisuumi ukiumi nutaami februaari tikillugu ataatsimiittoqassaaq.
Sullivinnik Nakkutilliisoqarfiup Inatsisartut ataatsimiittarfiannut ornigutereernerata kingorna allannguutit maluginiarnartut atuutilersinneqarsimasut Inatsisartut maanna nalunaarput, sulinermimi avatangiisinut inatsisit malinneqarsinnaaniassammata ataatsimiinnerit pilersaarusiorneqassasut tassani piumasarineqarpoq.
Tamanna Inatsisartut siulittaasuata Mimi Karlsenip (IA) tusagassiuutinut nalunaarummi oqaatigaa:
- Allattoqarfimmi sulisut eqqarsaatigalugit Sullivinnik Nakkutilliisoqarfiup 2024-mi juunimi eqqaasippaatigut ataatsimiinnerni sulisuvut akunnerni amerlavallaani piffissaalatseqqallutillu sulippata aatsaat ingerlanneqarsinnaasussamik ataatsimiinnermik aaqqissuussisinnaanngitsugut, Mimi Karlsen allappoq inerniliillunilu:
- Tamanna siulittaasoqarfiup tusaanngitsuusaaginnarsimanngilaa.
Sulinermi avatangiisinut inatsisit Inatsisartut aamma malissavaat
Inatsisartuni sulisut ukiut ingerlanerini tupinnaannartumik eqaatsumik naatsorsuutigisallu sipporlugit sulisarsimasut Mimi Karlsenip erseqqissarpaa, ataatsimiinnerni ulapaarfioqisuni qinikkat suliassaminnik suliaqarsinnaaniassammata:
- Tamannalu pissutigalugu sulisut qujassutissaqarfigeqaavut - maannamutulli ingerlaannarsinnaanngitsugut Sullivinnik Nakkutilliisoqarfiup erseqqilluinnartumik oqariartuutigaa: Inatsisartut – sulisitsisut allat assigalugit – sullivinni atukkat pillugit inatsisiliornerit malittarisassallu sulisut peqqissusiannik atugarissaarnissaannillu illersuisussat malissallugit pisussaaffeqarput, Mimi Karlsen nassuerpoq.
Upernaaq Sermitsiami allaaserisat arlallit saqqummiunneqarput, inatsisartullu ataatsimiittarfiini avatangiisit qanoq tatineqartigisut, sulisut qanoq napparsimalersimanersut arlalillu suliunnaartariaqarsimasut tassani allaaserineqarpoq.
Pissutsillu pillugit Sullivinnik Nakkutilliisoqarfimmut qanoq kalerrisaariniartoqarsimanersoq sulisimasut aamma Sermitsiamut oqaluttuarput. Maanna nakkutilliisoqareermat ataatsimiinnerit aaqqissuussaanerat allanngortinneqarpoq.
Karlsen: Piffissaqarnerulerata ulapinnerulersimavugut
Mimi Karlsen naapertorlugu Inatsisartuni suliarineqartartut pisariuneruleriartortillugit piffissartornarneruleriartortillugillu ajornartorsiutit pilersimapput:
- Piffissaqarnerulerata ulapinnerulersimavugut.
- Siusinnerusukkut pissutsinut sanilliullugu siunnersuutit amerlanerujussuit amerlanertigullu imaannaannginnerujussuit Inatsisartut ullumikkut suliarisalersimavaat. Siunnersuutilli tamakku suliarinissaannut piffissaqarnerulersimanngilagut. Ataatsimiinnermit ataatsimiinnermut nutaamut arlaatigut tamatta sukkanerusumik arpattaliinnarsimavugut. Tamannalu qinikkanut sulisunullu unammillernartoqarsimavoq, aamma ilaqutariittut inuuneqartariaqartunut, Mimi Karlsen tusagassiuutinut nalunaarummi oqarpoq.
