KL

DK

Sumiiffinni takornarialerisoq nikussaartoq: Albatros angisooq piummartoorlu – allamut timmisartorit

Takornariaqarneq suliffippassuarnik nuannersunik pilersitsisinnaavoq Nunatsinnilu inuussutissarsiornikkut sukarsuit ilaattut pingaaruteqalersinnaalluni. Aammali ajoqutaasinnaavoq, eqqarsarluanngikkutta, takornarialerisoq nunanit allanit takornarialerinermik suliaqartut angisuut qatsullugit oqarpoq.

Periarfissarpassuupput takornariaqarnerullu ineriartortinnissaa nammineq sapinngilarput – maanimi najugaqareerpugut. Periarfissaqarpugut inuussutissarsiutip kusanartunik naleqartitsilluta inoroorsaarnermillu ileqqorput atorlugu piorsarnissaanik, qanilaartumik kusanarnerpaanillu avatangiiseqarluni immikkuullarissunik misigisaqartitsilluni, Nuummi Arctic Boat Charterimi piginnittoq Erik Palo Jacobsen oqarpoq.
Trine Juncher Jørgensen
TUSAGASSIORTOQ / JOURNALISTI
Saqqummersinneqarpoq

Naalakkersuisut takornariaqarnermut inatsisissatut siunnersuutaat nutaaq maannakkut tusarniaassutigineqartoq sapaatit akunnerani qaangiuttumi nunatsinni takornarialerisut ilaannit angisuumit annertuumik isornartorsiorneqarpoq; Albatros Travelimit, ernummatigineqarluni inatsit kalaallit takornarialerinerannik aseruisinnaasoq.

PISARTAGAQARTUNUT

Allaaserisaq una Nutaarsiassaqartitsivimmi aviisit naqitat ilaanni allaaserisaavoq.

Allaaserisat pisartagaqartunit siunissami taamaallaat atuarneqarsinnaajumaassapput.

Atuarluarna.

Oqallinnermili aamma allanik oqaaseqartoqarpoq. Nunatsinni takornarialerisut arlaqartut naammagisimaarluinnarpaat takornarialerisut nunatsinneersut nunanit allaneersunit pingaartinneqarnerummata.

Inuussutissarsiornikkut sukarsuit ilaat imaluunniit perloqqussut

Taakku ilagaat Erik Palo Jacobsen, Nuummi takornarialerinermik suliffeqarfimmik Arctic Boat Charterimik ingerlatsisoq. Oqaluttuarpoq nunatsinni takornariaqarnerup piorsarnissaanik isumaliuteqarsimalluni, qanorlu tamanna siullermik pingaarnertullu Nunatsinnut iluaqutaasinnaanersoq.

– Ingerlalluarutta takornarialerineq suliffissarpassuarnik pitsaasunik pilersitsisinnaavoq, inuussutissarsiornermilu sukarsuartut pingaarutilittut inississinnaalluni. Eqqarsarluanngikkutta takornariaqarneq perloqqussutaasinnaavoq. Taamaattumik aap, oqallinneq pingaartupilussuuvoq, ingammik maannakkut ineriartuleruttormat.

Nunasiaateqariaaseq nutaaq

Erik Palo Jacobsen Facebookimi allappoq Albatros Travel ataasiinnarmik siunertaqartoq: Aningaasarsiornissamik.

”Albatros Travel Kalaallit Nunaanni sorlaqanngilaq, kusanaannerpaamillu takornariarpassuaqalersitsiniarluni, kalaallinut tulluanngilluinnartumik. Nunasiaateqariaaseq allatut ittoq atorfissaqartinngilarput, kingumut nunarput avataaniit soqutiginnittunit atupilunneqarluni, ineriartornerlu qulaatiinnarluta ingerlanneqarluni, isertitallu nunatsinni qimagunneqarlutik. Takornariaqarneq iluatsinniit ineriartussaaq, soqutaanngilarlu tamanna kigaakkaluarpat – taamaaliornikkut nukittuneruliinnassaaq. Takornariaqarneq taamaallaat Kalaallit Nunaannut kalaallinullu iluaqutaassaaq, uagullu nammineq aqussavarput.”

Misigisassat immikkuullarissut

Erik Palo Jacobsen naapertorlugu nammineq ilusilersorlugu pitsaasunik ineriartorfissaqarpoq.

”Periarfissarpassuupput takornariaqarnerullu ineriartortinnissaa nammineq sapinngilarput – maanimi najugaqareerpugut. Periarfissaqarpugut inuussutissarsiutip kusanartunik naleqartitsilluta inoroorsaarnermillu ileqqorput atorlugu piorsarnissaanik, qanilaartumik kusanarnerpaanillu avatangiiseqarluni immikkuullarissunik misigisaqartitsilluni.

Annikitsumik aallartitta kigaatsumillu alliartorluta. Taamaalilluta suliffeqarfeerarpassuarnik tamarmik immikkut piginnaasaqartunik pilersitsinissamut piffissaqassaagut. Misigisassat immikkuullarissut amerlaqalutillu annertupput, amerlasuunullu inuunermik nuannersumik pilersitsisinnaalluta. Nunaga suliffeqarfinnguaralu asavakka, nammineq asaqisakka tikeraanut takutissinnaallugit. Suliartornissannut qilanaartuaannarpunga. Iluamik suligutta inuppassuarnut inuunermik taamaattumik pilersitsisinnaavugut maani Inuit Nunaanni”, Erik Palo Jacobsen allappoq, naggasiillunilu: ”Albatrosersuaq piummartooq – allamut timminiarit. Atorfissaqartinngilatsigit.”

Sermitsiamit isornartorsiuineq Albatros Travelimut takutipparput, akippullu allaaserineqarnertik ilisarisinnaanagu, tamannalu aamma angalasut naliliillutik immersugaanni allassimanngitsoq.

- Kalaallit Nunaanni aasaanerani angalaarnissamik qaaqquserusuppugut Sermitsiamit aallartitaq, Greenland Tourism kiisalu Namminersorlutik Oqartussaneersut peqatigalugit, namminneq takusinnaaqqullugu siunnersorneqarnitsigullu pisuunnguallalluta, pisortaq Søren Rasmussen oqarpoq.

turisme samfund albatros arctic boat charter inuiaqatigiit nuuk turismelov

ATORFIIT Se alle jobs

Powered by Labrador CMS