Taamaammat Nuup mittarfiani ajornakusoortoqaqqilerpoq

OBS: Allaaserisaq iluarsineqarpoq nal. 09.30 Greenland Airportsip aviisip naammassineqarnerata kingorna akissutai ilanngunneqarlutik.

Nuummi nunanit tamalaanit mittarfittaaq siorna novembarip 28-ani ammarneqarmalli ajutoornerit imaaginnavipput.

Siullertut sila ajornartorsiortitsivoq, erseqqarlunnera mittarfiullu quasappallaarnera pissutaallutik mittoqarsinnaasarsimanngilaq.

Aamma isumannaallisaanikkut unammilligassaqarpoq, isumannaallisaavimmi sulisut amigaataapput, mittarfeqarfillu suli OSS-imut akuerisaasimanngilaq – One Stop Securitymut – taamaattumik ilaasut Nuummeersut assersuutigalugu Københavnimiit ingerlaqqinniarlutik isumannaallisaavikkooqqillutik misissorneqaqqaartariaqartarput.

Timmisartut akunnermut amerlanerpaamik sisamat mittarfimmi sullinneqarsinnaanngussasut Trafikstyrelsen septembarip 22-ani aalajangerpoq. Taama killilersuisoqalernera Air Greenlandip nunap iluani timmisartuussinissaannut kalluaangaatsiarpoq, taamaammallu angalasut ullorpaalunni ingerlaqqinniaaluusaarsinnaanngorlutik.

Siulersuisuni soraarsitsinerit

Naalakkersuisut septembarip qulingani Greenland Airportsimi siulersuisuni ilaasortat tamaasa, ilaatigut siulittaasup tullia Kjeld Zacho Jørgensen, misilittagartuumik Jens Wittrup Willumsenimik Air Greenlandimi siusinnerusukkut siulittaasuusimasup taarsermagu amerlanerit ajornerpaaq qaangiuttoq neriuutigigaluarpaat.

Siulersuisuni ilaasortat soraarsinneqarnissaat ilimagineqareersimavoq.

- Naalakkersuisutut ingerlatseqatigiiffimmut nalunaarutigereerparput, ingerlatseqatigiiffimmi pissutsit naammaginanngitsutut isigigatsigit, ingerlatseqatigiiffillu piumasaqaatitsinnik naammassinnissimanngitsoq, tassungalu tunngatillugu iliuuseqartariaqarpugut, Jens-Frederik Nielsen Sermitsiamut augustimi oqarpoq.

Maanna siulersuisut qinigaaqqammersut unammilligassaqaqqilerput. Trafikstyrelsenimmi Greenland Airports Nuummi timmisartunik sullissinissat nalunaaquttap akunneranut amerlanerpaamik sisamaasarnissaannik – taakkunannga amerlanerpaamik marloriarluni mittoqarsinnaalluni - septembarip 22-anni peqquaa.

Nakkutilliisarneq immikkut ittoq

– Greenland Airportsip Nuup Mittarfiani atugassarititaasussat arlalitsigut naammassinngikkaat aamma timmisartunut paasissutissiinermut kiffartuussivianut (AFIS-imut) piumasaqaatinik atuuttunik malinninngitsoq Trafikstyrelsenip timmisartuussinermik nakkutilliisuisa ataasinngornermi septembarip 22-ani immikkut ittumik misissuinerminni – Greenland Airportsillu aasaanerani angallannermi pilersaarutaanik misissuinerup kingorna – paasivaat,” allaffimmi pisortaq Signe Marie Finderup Slot allappoq.

Allaffimi pisortaq nangilluni allappoq:

”Aamma Greenland Airportsip nalunaarutiginikuusaanniit Nuup mittarfiani timmisartortitseqatigiiffiit nutaat kiffartuunneqartussat amerlanerupput

Kalaallit Nunaanni silaannakkut angallannermut oqartussaasutut Nuummi mittarfiup nunami maani nunanilu tamalaani maleruagassat naapertorlugit isumannaatsuunissaa qulakkeertariaqarparput. Taamaattumik killilersuisariaqarsimavugut timmisartuussisinnaanerit ikilisillugut, aamma AFIS-imiit nalunaaquttap akunnerani qanoq amerlatigisunik aallartoqarneranik tikittoqarneranillu nakkutilliisoqartarneranut.“

Killiliissutit amerlanernit tupaallaatigineqarput. Kikkummi tamarmik assaanerani angalasut amerleriarujussuarnerat tulluusimaarutigaat, nuannaarutigalugu naammagisimaarlugulu, taamaalisoqarneratami Kalaallit Nunaanni takornariaqarneq aallarteqqimmagu. Inuit nittartakkatigut attaveqaqatigiittarfiini mittarfimmit assinik ulikkaarpoq, tassani timmisartut nunanit allaneersut Air Greenlandip Dash 8-inik timmisartui sanileralugit uninngasut takuneqarsinnaallutik.

Nuannaarneq qaangiuppoq

Maannali nuannaarneq qaangiuppoq – qularnanngitsumik timmisartunik nalunaarsuisarfimmi sulisut, Nuummi mittarfinni nunanit tamalaanit tikinneqartartuni allani timmisartunik nakkutilliisuunngitsut AFIS-operatørinik taaneqartartut pissutaallutik.

Tamanna tupaallannanngilaq — taamaaliornissaq pilersaarutaajuaannarnikuummat.

- AFIS-imik ingerlatsisut Kalaallit Nunaanni mittarfiit allat assigalugit napasuliamiipput, taakkulu timmisartortartoq milernerani siunnersorsinnaavaat – ilaatigut timmisartut allat eqqaaniittut pillugit aamma mittarfiup suerullugulu biileqarfiunnginneranik, Greenland Airports ATS-imi pisortaq Kristoffer Heiselberg mittarfiup ammarnissaa sioqqullugu Sermitsiamut oqarpoq.

- Napasuliaq nutaaq pisoqqamut sanilliullugu inissaqarneruvoq soorunamilu atortorissaarutinik nutaanik tamarmi pilersugaalluni, soorlu radiukkut attaveqaatit siammasinnerusut.

- Nuummi napasuliaq AFIS-imik tallimanik ingerlatsisoqarpoq, maannali mittarfik nutaaq maannamut naleqqiullugu sivisunerusumik ammasassammat amerlanerusunik atorfinitsitsisoqassaaq, Greenland Airports siorna novembarini neriorsuivoq.

Qanoq sivisutigissanersoq nalunartoq

Nuummi mittarfimmi pissutsit qaqugu nalinginnaaleqqissanersut ilisimaneqanngilaq.

- Piumasaqaatit atuuttut maanna killilersuutinit taarserneqarput, Trafikstyrelsenimiillu Nuup Mittarfiata silaannaani isumannaallisaaneq qaffasinnerpaaffianiinnissaata attatiinnarnissamut naapertuutilernersoq naliliiffiginissaata tungaanut atuutissapput, Trafikstyrelsenimeerosq Signe Marie Finderup Slot Sermitsiamut oqarpoq, nangipporlu:

- Greenland Airports isumannaallisaanikkut suliniutit atuutilersinneqarpata, aamma piumasaqaatit nutaat malillugit isumannaatsumik ingerlatsineq uppernarsarneqarsinnaappat, Greenland Airportsip Trafikstyrelsen atugassarititat nutaat nalilersoqqullugit qinnuigisinnaavaa.

– Erseqqissaatigissavarput Trafikstyrelsen killilersuutinik arlalinnik Greenland Airportsimut atuutilersitsigaluarpat atuutilersitsinngikkaluarpalluunniit Greenland Airports mittarfinni isumannaallisaanermut akisussaasuummat. Taamaattumik suliniutit nutaat qanoq sivisutigisumik atuutilersinniarneqassanersut nalilersinnaanngilarput, allaffimmi pisortaq oqarpoq.

Greenland Airports: Aaqqiissutissat sulissutigineqarput

Sermitsiap Greenland Airports pissutsit pillugit oqaaseqartitsiumalluni saaffigaa, aviisilli suliarinerata naammassinerani akissuteqarfigineqarani.  Taamaattoq ingerlatseqatigiiffik pissutsit pillugit Sermitsiap nittartagaanut sisamanngornermi oqaaseqarpoq aaqqiissutissat assigiinngitsut misissorneqartut.

- Susassaqartut tamaasa siunissaq ungasinnerusoq eqqarsaatigalugu pitsaanerpaamik aaqqiissutissarsiumalluta qanimut suleqatigaavut. Periutsit assigiinngitsut suliarivagut – aaqqiissutissat piffissaq qaninnerusoq ungasinnerusorlu eqqarsaatigalugit. Tamaasali inissinneqaqqaartinnagit itinerusumik iserfigisinnaanngikkallarpakka, attaveqaqatigiinnermut pisortaq Mikkel Bjarnø Lund allappoq.

Air Greenlandip Greenland Airportsillu ataatsimut tusagassiuutitigut nalunaarumminni septembarip 26-anni saqqummiunneqartuni Greenland Airportsimi pisortaq Jens Lauridsen ima oqarpoq:

- Neriuppugut Air Greenland peqatigalugu timmisartornikkut isumannaallisaanermi allanik iluarsiissutinik pilersitsisinnaalluta, angalasunut kingunipilui sapaatit akunnerit sisamat tallimat tulliuttut annikillisarlugit.

Aaqqiisoqarnissaata tungaanut nunap iluani angalasut naammagittartariaqassapput.

- Paasissallugu pingaartupilussuusimavoq ingerlatat ikilisinnerat Air Greenlandip angalanissamut pilersarutaasa naammassinissaannut taamaalillunilu sullitanik kiffartuussinitsinnut qanoq kinguneqassanersut. Maanna takusinnaavarput suliaq annertuupilussuussasoq angalanissamut pilersaarutit nutaamik katiteqqinniarnerat pilersaarutaaqqaartunut assingutinniarlugit, Air Greenlandimi ingerlatsinermut pisortaq Line Frederiksen oqarpoq.

- Allannguinerit sioqqullugit Air Greenlandimi akunnermut timminerit arfineq pingasut tungaannut ingerlanneqartarput, timmisartorsuup Danmarkimut Danmarkimiillu angalaneranut atatillugu. Maanna taamaallaat sisamaasinnaapput. Kingunerissavaa sinerissap Nuullu timmisartorsuup tikiffigisartagaata akornanni ullormi ataatsimi aqqutit pilersaarutit 40 procentii missaaniittut ingerlanneqarsinnaajunnaassammata. Tamatuma saniatigut timmisartoqartarpoq avataaneersumik, taamaalilluni ingerlanneqarsinnaasut amerlassusaat suli killilerneqarnerulluni.

Nuup mittarfiani killilersuinerit nutaat ambulancit timmisartuussinerinut imaluunniit annaassiniarnernut ujaasinernullu atuutinngitsut Trafikstyrelsenimit naqissuserneqarpoq.