Greenland Airports: Aaqqiissutissat sulissutigineqarput
Unammilligassat aaqqinniarlugit tamaviaarluta sulivugut, Greenland Airports Angallannermut Aqutsisoqarfiup Nuummi silaannakkut angallannermi nutaanik killilersuutinik atuutsitsilereernerata kingorna nalunaarpoq.
Angalasut Nuummi timmisartoqarfiup silataani oqaloqatigiittut.
Arkivfoto: Oscar Scott Carl
Nuup mittarfiani septembarip 22-ani immikkut ittumik nakkutilliisoqarnera aasaq mannalu timmisartuussinerit misissorneqareersullu mittarfimmut Kalaallillu Nunaata sinneranut silaannakkut angallannermut ilungersunartumik kinguneqarpoq.
Mittarfinnut nakkutilliisut Angallannermut Aqutsisoqarfimmeersut nutaanik killilersuutinik atuutsitsilerput. Ilaatigut nalunaaquttap akunneranut timmisartut amerlanerpaamik marluk missinnaalersinneqarput, akunnerullu ataatsip ingerlanerani timmisartunik kiffartuussinerit amerlanerpaamik sisamaasinnaalerlutik.
Tamanna timmisartuussinissamik pilersaarutinut allannguuterpassuarnik kinguaattoornerpassuarnillu angalasunut piffissami tulliuttumi kinguneqassasoq Air Greenlandip tallimanngormat nalunaarutigaa.
Pissutsit qanittukkut atuuttut qaqugu atuutilerseqqinneqassanersut paaserusullugit Sermitsiap Greenland Airports attaveqarfigaa.
– Susassaqartut tamaasa siunissaq ungasinnerusoq eqqarsaatigalugu pitsaanerpaamik aaqqiissutissarsiumalluta qanimut suleqatigaavut. Periutsit assigiinngitsut suliarivagut – aaqqiissutissat piffissaq qaninnerusoq ungasinnerusorlu eqqarsaatigalugit. Tamaasali inissinneqaqqaartinnagit itinerusumik iserfigisinnaanngikkallarpakka. Sapaatit akunneri sisamat tallimanilluunniit ingerlaneranni piffissaq qaninnerusoq eqqarsaatigalugu aaqqiissuteqarnissaq naatsorsuutigaarput, attaveqaqatigiinnermut pisortaq Mikkel Bjarnø Lund allappoq.
Aallartisarneq ilungersunartoq
Timmisartuutileqatigiiffiit nutaat aqqutinik nutaanik ammaammata Nuummi timmisartuussinerit aasaq manna amerleriarujussuunerat killilersuisoqalerneranik kinguneqarput.
– Ilimagisatsinnit unammilligassaqarnerunerput isertuutinngilarput, tamannalu uggoraarput. Kisianni aallartisarnermi tamanna pissusissamisuuginnarpoq, attaveqaqatigiinnermut pisortaq Mikkel Bjarnø Lund nangilluni oqarpoq.
– Mittarfik pitsaasoq, sullissilluartoq ingerlalluartorlu ataatsimoorluta pilersissinnaagipput isumalluarfigaara. Tamanna anguniarlugu tamaviaarutigaarput.
Angalsut angalanissamut pilersaarutaat qaammatinit tulliuttuni allanngorarnissaat Air Greenlandimit aarlerisaarutigineqarpoq. Angalasut kissaatiginngisaminnik Nuummi unnueqqaartariaqarsinnaasassallutik, timmisartuutileqatigiiffik paasissutissiivoq.
Mittarfimmi killilersuinermut pissutaasoq sukumiisumik paasiniarlugu Sermitsiap paasiniarpaa.
