MOTOORI
Tasiilami asfalti nutaaq attaveqaasersuutillu pitsaanerusut
Kommuneqarfik Sermersooq Tunumi illoqarfiit annersaanni aqquserngit, ikaartarfiit majuartarfiillu pitsanngorsarneqarnissaannut sulinerup ingerlateqqinnissaanut aningaasaliivoq. – Tamanna pisariaqartipparput, kommunalbestyrelsimut ilaasortaq Justus Hansen (D), ulluinnarni Tasiilami najugaqartoq, oqarpoq.
”Aqquserngit pitsaasut atorluarsinnaasullu ulluinnarni toqqissisimanermut, inuussutissarsiornerup ingerlalluarneranut aamma illoqarfiup ineriartuinnarnissaanut pissutaasarput”, Kommuneqarfik Sermersooq tusagassiuutitigut nalunaarummi allappoq. Kommunalbestyrelsimi partiit missingersuutinik 2025-2026-mut isumaqatigiissuteqartut aqqusinernik attaveqaasersuutinillu pitsanngorsaanissamut aningaasaliissuteqarput.
Assi: Oscar Scott Carl
Tasiilami innuttaasut 2.000-it missaanniittut illoqarfimmi aqquserngit attaveqaasersuutillu pitsaanerulernissaat qilanaarisinnaavaat.
Tassami Kommuneqarfik Sermersuup 2025-2026-mut missingersuusiaani kingullermi Tasiilami aqquserngit attaveqaasersuutillu pitsanngorsarnissaannut aningaasaliisoqarpoq.
“Aqquserngit pitsaasut atorluarsinnaasullu ulluinnarni toqqissisimanermut, inuussutissarsiornerup ingerlalluarneranut aamma illoqarfiup ineriartuinnarnissaanut pissutaasarput. Aaqqiissuteqarnermittaaq pinngortitaq, silaannaq aamma Tasiilami kulturi immikkuullarissoq oqaluttuassartaalu eqqarsaatigineqassapput”, kommuni tusagassiuutitigut nalunaarummi allappoq.
Illoqarfimmi angallannerup ajornannginnerunissaa, isumannaannerulluni toqqissisimanarnerunissaa anguniarneqarpoq – innuttaasunut, tikeraanut suliffeqarfinnullu.
– Soorunami pitsaasuuvoq. Pisariaqartipparput. Illoqarfimmi attaveqaasersuutit ullutsinnut naleqqutinngillat. Aqquserngit amippallaarput, tamannalu ingammik ukiukkut ajornartorsiortitsilertarpoq, Inatsisartuni Kommunimilu politikeri Justus Hansen oqarpoq.
Assi: Oscar Scott Carl
Asfaltimut 10 millionit koruunit
Illoqarfiup aqqusernginik asfalteerinerup ingerlateqqinnissaa suliniutit ilagaat, tassungalu ukioq manna missingersuutini 10 millionit koruuninik aningaasaliisoqarpoq. Asfaltilersuineq aqqutigiuminarnerulersitsissaaq aqquserngillu nungullarnerannik, pujoralammik aamma maniinnernik annikinnerulersitsissalluni.
Tamatuma saniatigut aqquserngit, ikaartarfiit majuartarfiillu iluarsartuunneqarnissaannut aserfallatsaaliortuarnissaannullu ukiumut 10 millionit koruunit 2026-miit 2029-p tungaanut immikkoortinneqarput. Tasiilamiinnaanngitsoq kommunimili tamarmi aningaasat atorneqarssapput.
Tasiilami iluarsaassisoqarnissaa pisariaqartoq
Ukiorpassuarni kommunalbestyrelsimut Inatsisartunullu ilaasortap Justus Hansenip (D), aamma Tasiilamiu, pingaarnersiuineq naammagisimaarpaa.
– Soorunami pitsaasuuvoq. Pisariaqartipparput. Illoqarfimmi attaveqaasersuutit ullutsinnut naleqqutinngillat. Aqquserngit amippallaarput, tamannalu ingammik ukiukkut ajornartorsiortitsilertarpoq. Aamma qanittukkut mittarfittaarnissarput neriuutigaarput, tamatumami illoqarfimmi attaveqaasersuutit takornarianit pisariaqartitsiffiuleriartuinnavipput.
Tasiilami aqquserngit attaveqaasersuutillu pitsanngorsarneqartariaqartut Kommuneqarfik Sermersuumi aalajangerneqarpoq.
Assi: Oscar Scott Carl
Eqqakkanik isumaginninneq
Tasiilami eqqakkanik tigooraaviup ingerlalluarnissaa anguniarlugu ESANI-mut akiliutigineqartartut ingerlaannassasut missingersuusiornermi isumaqatigiissummi aamma allassimapput.
Tigooraavik siullermeerluni misissoqqissaarneqareerpoq, taamaammallu sulineq aallartillualereerluni.
Aamma Tasiilami atortussaasiviup allilerneqarnissaanik pilersaarutit ingerlateqqinneqassapput. Nutaamik sananikkut sulinermi najukkami ingerlatsinermut aserfallatsaaliinermullu periarfissat pitsaanerit pilersinneqassapput.
Justus Hansenip oqarnera naapertorlugu atortussaasiviup eqqaaniittup imaarneratigut namminersortunut atorneqarsinnaanngornissaa ilaatigut pineqarpoq.
Innaqqiit ujaqqanik immerniarneqartoq
Innaqiit eqqaanni ujaqqanik immiisoqarsinaanera pillugu misissueqqissaarnermik ingerlatsisoqassasoq missingersuut pillugu isumaqatigiissummi aamma eqqaaneqarpoq. Sumiiffiup taassuma siunissami atorneqarsinnaaneranut periarfissai inuussutissarsiornermilu atorneqarsinnaaneranut tunngavimmik patajaannerusumik pilersitsinissaq siunertaavoq.
