Tasiilami siunnersortit ikiortaattut ilinniagaq allartinneqartoq
Tasiilarmiut najugartik qimanngikkaluarlugu siunnersortit ikiortinngorniat atuaqatigiit ataatsit aallartipput. Kommuneqarfik Sermersuumit periarfissaq pilersinneqarpoq.
Siullermeertumik periarfissaqalerpoq Tasiilami siunnersuinermi ikiortitut ilinniagaq naammassillugu atuarsinnaallugu.
Privatfoto
Siunnersortit ikiortaattut ilinniarneq Tasiilami maanna ingerlanneqarsinnaalerpoq. Ilinniartut 20-t missaanniittut una qaammat aallartissapput.
Kommuneqarfik Sermersooq nittartakkamini allappoq.
Taamaalillutik Tunumiut ilinniariarlutik ilaquttatik illoqarfitsilluunniit qimallugit ungasissumut aallartariaarupput.
Ilinniarfik PI/SPS-imit – Perorsaanermik Ilinniarfimmit– neqeroorutigineqarpoq, mannalu tikillugu Nuummi Ilulissanilu taamaallaat ilinniarfigineqarsinnaagaluarluni.
- Siunnersortit ikiortaattut ilinniakkap massakkut illoqarfitsinni neqeroorutigineqarsinnaalernera nuannaarutigeqaarput. Inuusuttut inersimasullu Tasiilaq qimanngikkaluarlugu ilinniagaqarnissaminnut periarfissaqarlualerput. Tamanna najukkami inuiaqatigiinni ataasiakkaanut tamarmullu nukittorsaassaaq, Tasiilami immikkoortortaqarfimmi pisortaq Hjørdis Viberg oqarpoq.
Atuaqatigiit ataatsit
Ilinnialertut aamma qilanaarput. Taakku ilaasa ilisimasaminnik illoqarfimminni ineriartortitsinissamik periarfissaq nuannaarutigingaarpaat.
- Nunarput aamma illoqarfipput qimanngikkaluarlugu ilinniakkamik ineriartornissamut periarfissalimmik aallartitsisinnaaneq uannut periarfissaavoq annertooq nalitoorlu. Suliareriikkakka pillugit ilisimasaqarnerulernissara qilanaarilereerpara.
- Naak meeqqanut ilaqutariinnullu ikorfartuutaasunik arlalinnik suliniuteqareeraluarluta aamma sakkussaqaraluarluta, ilinniakkap sulininni sakkussanik sukumiinerusunik amerlanernik tunissavaanga. Sulinera ilinniarnermik ataqatigiisissinnaanissaanut. Sulinikkut inuttullu pissarsiaqarluarnissara qilanaaraara, ilinniartunngortussaq Jakobine Uitsatikitseq oqarpoq.
Tasiilami atuaqatigiit aallartittut saniatigut allanik aallartittoqassanersoq kommunip suli ilisimanngilaa. Innuttaasulli amerlanerusut ilinniaqqinnissamut kajumissutigilissagaat neriuutigineqarpoq.
