Tusagassiorfik: Danskit naalakkersuisuisa timmisartut milliardilikkaanik akillit Kalaallit Nunaanni nakkutilliissutissat pisiariniaraat
Danskit naalakkersuisui timmisartumik nakkutilliissutissamik milliardilikkaamik pisiniarput. Timmisartut Kalaallit Nunaata kangiata imartaani alapernaarsuinermi atorneqassaaq, illersornissamut ministeri Troels Lund Poulsen TV2-mut oqarpoq.
- Kalaallit Nunaata Savalimmiullu eqqaanni susoqarnersoq ersarinnerusumik ilisimannittariaqarpugut, illersornissamut ministeri Troels Lund Poulsen (saamimmiit tulliusoq) TV 2-mut oqarpoq. Asseq ataasinngornermi umiarsuarmi sorsuummi Niels Juel-imi assilisaavoq, umiarsuarmiillu tassannga illersornissamut ministeri aammalu nunanut allanut Naalakkersuisoq Vivian Motzfeldt Nuup eqqaani sakkutooqarnikkut sungiusarneq annertooq malinnaallutillu isiginnaarput.
Assiliisoq: Morten Okkels
Danskit naalakkersuisui timmisartunik alapernaarsuutinik milliardilikkaanik nalilinnik Kalaallit Nunaanni nakkutilliisussanik pisiniarput.
TV 2 taamak allappoq.
Timmisartut nakkutilliissutit Boing p-8-t pineqarput, taakkulu Kalaallit Nunaata kangiata imartaani Ruslandimeersut umiarsuit aqqartartullu alapernaarsornerani atorneqassapput.
Danmarkip aningaasat atorluarnerusinnaajumallugit eqaannerusumillu iliuuseqarsinnaajumalluni Nato-mi ilaasortanik nunanik allanik suleqateqarnerunissaq orniginartillugu, illersornissamut ministeri Troels Lund Poulsen (V) TV 2-mut oqarpoq.
- Tamannali ajornassappat timmisartunik p-8-nik aqqartartunik malersuisinnaasunik nammineq pissarserusuppunga, illersornissamut ministeri TV 2-mut oqarpoq. Aarlerinaatillu annertusiartuinnarnerat ilanngullugu oqaatigaa.
- Kalaallit Nunaanni Savalimmiunilu qanoq pisoqartarnersoq paasisaqarfiginerusariaqarparput, illersornissamut ministeri Troels Lund Poulsen (V) TV 2-mut oqarpoq.
Timmisartoq amerikamiut alapernaarsuutaat
Timmisartut taamaattut amerikamiut imaani alapernaarsuutitut atortarpaat. Sverige aamma Norge timmisartunik taamaattunik peqalereernikuupput.
Timmisartunik taamaattunik pisiniarnissamut nalunaarneq pivoq USA-p tungaanit danskit illersornissamut atugassianik pikippallaarnerarlugit isornartorsiuisoqareerneratigut.
USA-p præsidentiata Donald Trumpip Kalaallit Nunaata pigilernissaanik aqutarilernissaanillu kissaateqarnerminut atatillugu oqaaseqarnermini Danmarki Kalaallit Nunaata imartaanik nakkutilliinnginnera pillugu isornartorsiornikuuaa.
TV 2 allappoq, siunnersuut sapaatip akunnerini marluk iluanni illersornissaq pillugu isumaqatigiissuteqartunut saqqummiunneqassasoq.
Illersornissamut isumaqatigiissuteqartut taakkorpiaapput sapaatip akunnerata siuliani Illersornissaqarfimmut akuersissuteqartut nunamiit silaannakkut illersuutissanik akunnattumik ungasissumillu igeriussisinnaasunik 50 milliarder koruuninik nalilinnik illersuutissarsiniartoqarsinnaalersitsisut Danmarkillu sakkussianik pisiniartarnerani oqaluttuarisaanermi aatsaat taamak akisutigisunik pisiniartoqarsinnaalersitsisut.
