Trumpip TikTok pillugu isumaqatigiissuteqarnermi kingorna Kinamiu Xi Jinping oqaloqatigissagaa
Kina USA-lu „ingerlatseqatigiiffiit ilaat“ inuusuttut Amerikamiut attatiinnarumallugu kissaatigisaat pillugu isumaqatigiissuteqarput, Trump allappoq.
Donald Trumpip Xi Jinping tallimanngorpat oqaloqatigissavaa. Oqarasuaatikkut oqaloqatigiinnissaat ilimanarluinnarpoq. Naalagaaffiit siuttui qanimut naapissanersut nalunaarutigineqanngilaq. (Toqqorsivimmiit assi).
Assi: Ken Cedeno/Reuters/Ritzau Scanpix
USA-p præsidentiata Donald Trumpip USA-p Kinallu TikTok pillugu isumaqatigiissuteqarsimanerat Truth Social-imi oqaatigaa.
TikTok pillugu isumaqatigiissuteqartoqarnera atorfilittanit nuimanerusunit arlalinnit USA-milu aningaasaqarnermut ministerimit Scott Bessentimit uppernarsarneqarpoq.
- "Ingerlatseqatigiiffiit "ilaat" nunatsinni inuusuttut attatiinnarumasaat pillugu isumaqatigiissusiortoqarpoq. Tamanna nuannaarutigingaassavaat, USA-p præsidentia oqarpoq.
Trumpip Kinap præsidentia, Xi Jinping, oqaloqatigissallugu aamma allappoq. Naalagaaffiit siuttuisa oqaloqatigiinnissaat tallimanngornermi pissaaq.
- Præsidenti Xi tallimanngorpat oqaloqatigissavara. Attaveqatigiinnerput patajaattuarsinnarpoq, Trump allappoq.
Trumpip TikTok imaluunniit ingerlatseqatigiiffik piginnittuusoq ByteDance atiisigut eqqaanngilai, TikTokili Amerikamiut inuusuttuisa akornanni atorneqarluarpoq, taassumalu USA-mi siunissaa Trumpip præsidentinngorneraniilli oqallisigineqakulasarpoq.
Nunat taakku marluk akornanni niuernikkut sorsunneq aaqqinniarsariniarlugu USA-p Kinallu aallartitaasa ataasinngornermi Spaniami naapinneranni taama nalunaaruteqartoqarpoq.
- USA-p Kinallu Europami niuernikkut ataatsimeersuarnerat ingerlalluaqaaq! Qanittukkullu nanginneqassaaq, Trump Truth Social-imi allappoq.
TikTok suliffeqarfimmit ByteDancemit Kinamiittumit pigineqarpoq, tamannalu pissutigalugu inuit attaveqaqatigiittarfiata USA-mi isumannaallisaanermut navianartorsiortitsisinnaanera ernummatigineqarpoq.
Taamaammat attaveqatigiittarfik USA-mi inatsisartut 2024-mi inerteqqutaalersinniarlugu akuersipput.
/ritzau/
