Ulloq unnuarlu nalunaarusiaq: Savimmik kapisisoqartoq annaassiniartoqarlunilu
Tasiilami sapaatiummat unnukkut savimmik kapisisoqarnerata kingorna arnaq tigusarineqarpoq, Kalaallit Nunaanni Politiit taama ilisimatitsipput
Sapaatip-akunnerata naanerani politiit ulapaarsimapput. Sapaatiummat unnukkut pisut marluk annertuut pisimapput.
Assiliisoq: Leiff Josefsen
Sapaatiummat unnukkut Tasiilami najugaqarfiit ilaanni savimmik kapisisoqarsimaneranik Kalaallit Nunaanni Politiit nalunaarfigineqarput.
Nal. 18.45 nalunaaruteqartoqartoq, arnarlu tigusarineqartoq, pigaartut pisortaat Anette Ostenfeldt Sermitsiamut oqarpoq.
Pinerluffigitittoq angutaasoq pigaartut pisortaat ilisimatitsivoq.
- Eqqunngitsuliorfigineqartoq maannakkorpiaq qanoq innersoq ilisimanngilara, pigaartut pisortaat oqaluttuarpoq.
Arnap tigummigallarneqarnissaa siunertaralugu killisiorneqassanersoq ullup ingerlanerani politiit aalajangerumaarput.
Umiatsiaaqqap motoria unittoorsimavoq
Tasiilami savimmik kapisisoqarneranik nalunaarutip kinguninngua politiit allamik nalunaarfigineqarput; Nuup avataani immami mallersorsuarmi umiatsiaaqqap motooria unittoorsimavoq.
Ujaasineq annaassiniarnerlu aallartinneqartut, politiillu angallataata sukkasuut ilaat aallartinneqarsimasoq, pigaartut pisortaat oqaluttuarpoq.
- Apuummata umiatsiat allat saneqqussimasut ikiuilereersimapput, Anette Ostenfeldt oqaluttuarpoq.
Ilaasut tamarmik ajunngitsumik Nuummut tikipput.
