ULLUT SULINNGIFFIIT
Ullukinneq ulloq sulinngiffeqarfittut qaffanneqassava?
Inatsisartuni ilaasortaq Peter Olsen (IA) utaqqisariaqarpoq ullukinnerup ullup affaa imaluunniit ulloq ilivitsoq sulinngiffiulernissaanik siunnersuutini pillugu nalunaassisoqarnissaata tungaanut. Inatsisartummi isumaqatigiinninniarsinnaatitaasunut apeqqut pillugu ingerlatitseqqipput.
Assiliisoq: Leiff Josefsen
Inatsisartuni annertuumik isumaqatigiissutigineqarpoq ullukinneq inuiaqatigiinnut kalaallinut kulturikkut annertuumik naleqarlunilu isumaqartoq. Ukiulli ingerlanerini ulloq taanna nalinginnaasumik suliffiusartutut inissisimajuaannarnikuuvoq.
Ullukinnerup ullup affaa sulinngiffiusalernissaa siunertaralugu IA-meersup Peter Olsen-ip siunnersuutaa Inatsisartunit ilalersorneqarluarpoq. Allaammi ullup affaanik siunnersuuteqarneq ulloq ilivitsoq sulinngiffiulersinnaanersoq misissorneqartussanngortinneqarluni.
Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap allannguutissatut siunnersuutaa:
Ullup affaa sulinngiffiusartup imaluunniit ulloq tamaat sulinngiffiusup allap
nuunneratigut ullukinnermi ullup affaa imaluunniit ulloq ilivitsoq
sulinngiffeqartalernissamut periarfissap eqqartorneqarnissaa siunertaralugu
pisortani namminersortunilu isumaqatiginninniarsinnaatitaasut attaviginissaannut
Naalakkersuisut peqquneqarnissaat pillugu Inatsisartut aalajangiiffigisassaattut
siunnersuut.
Taamaattorli suliap ingerlanerani aamma Kulturimut, Ilinniartitaanermut, Ilisimatusarnermut Ilageeqarnermullu ataatsimiititaliap suliarinninnerata kingunerisaanik nassuerutigineqarpoq suliffeqarfiit namminersortut pisortallu suliffeqarfii isumaqatiginninniarsinnaatitaasut oqaloqatigineqaqqaartariaqartut, tassaavorlu Naalakkersuisut siunnersuutip siullermeerneqarnerani innersuussutigisaannut naapertuuttoq.
Taamaalilluni Naalakkersuisut maanna pisussaaffilerneqarput isumaqatiginninniarsinnaatitaasut attavigineqassasut. Tamannalu isumaqarpoq Naalakkersuisut isumaqatiginninniarsinnaatitaasunik oqaloqateqareerlutik aatsaat inatsisissatut siunnersuummik saqqummiussisinnaasut ullukinneq ullup affaa ullorluunniit ilivitsoq sulinngiffinngortinneqassappat.
Jensen: Piviusorsiornerpaavoq UPA2025-imi suliaq nanginneqarsinnaasoq
Siunnersuummik suliarinninnermi Kulturimut, Ilinniartitaanermut, Ilisimatusarnermut Ilagiinnullu ataatsimiititaliaq suliarinnittuuvoq, Naalakkersuisuniillu aningaasaqarnermut akileraartarnermullu Naalakkersuisoq Erik Jensen (S) Naalakkersuisut akissuteqaataannik saqqummiussisuulluni, siunnersuummi isumaqatiginninniarsinnaatitaasunut pingaaruteqarmat.
Erik Jensen (S) Sermitsiamut uppernarsaavoq Naalakkersuisut suliassaq pingaartikkaat aammalu taamaattumik suliap siuarsarneqarnissaa sulissutigissagitsik, taamaalilluni Inatsisartunut inatsisissatut siunnersuutitut utertinneqarsinnaaniassammat:
- Kisianni piviusorsiortariaqarpugut. Inatsisissatut siunnersuutip suliarineqarnera piffissamik annertuumik tigusisarpoq, attuumassuteqartut peqataatinnissaat pisariaqarpoq, tassani suliffeqarfiit namminersortut aamma suliffeqarfiit pisortat ingerlataat oqaloqatigineqartariaqarput. Aammattaaq misissorneqartariaqarpoq sunniutissat qanoq ittuussanersut aammalu Inatsisartunut inatsisissatut siunnersuutissamik suliaqartoqartariaqarpoq.
- Inatsisissatut siunnersuut Inatsisartunut piaartumik saqqummiunneqarsinnaanissaa sulissutigissavarput, taamaattorli piviusorsiortumik nalilissagukku taava piviusorsiornerpaavoq upernaakkut ataatsimiinnermi 2025-mi inatsisissatut siunnersuutip saqqummiunneqarsinnaanissaa aningaasaqarnermut akileraartarnermullu Naalakkersuisoq, Erik Jensen (S) oqarpoq.
Kisianni 2025-mi upernaakkut ataatsimiinneq nalinginnaasoq pisussanersoq Naalakkersuisut siulittaasuat Múte Bourup Egede (IA) akisinnaasutuaavoq, tassami Inatsisartunut qinersineq kingusinnerpaamik pisussaavoq apriilip arfernani 2025-mi.
