Umiarsualivimmik suliariumannittussarsiuussineq taamaatinneqartoq
Nuummi umiarsualiviup allilerneqarnissaanut suliariumannittussarsiuussineq taamaatiinnarneqartoq Sikuki Harbour nalunaarpoq.
Qeqertaq Avalleq Nuuk Sikuki Harbour A/S-ip kilisaatinut atortarpaa (talerperleq), containeriisivillu (saamerleq) qaninnerpaavaa.
Assiliisoq: Leiff Josefsen
Namminersorlutik Oqartussanit pigineqartup Sikuki Harbourip, Nuummi Kangerlussuarmilu umiarsualivinnik ingerlatsisoq, Nuummi containereqarfiup allilerneqarnissaanik suliariumannittussarsiuussinini taamaatitsiinnartariaqarpaa.
Siulersuisuni siulittaasoq Steen Montgomery-Andersen tusagassiuutinut nalunaarummi paasissutissiivoq:
– Neqeroorutillu tiguneqartut nalilersoreerlutigit, sapaatip akunnera kingulleq siulersuisuni immikkut ittumik ataatsimiinnitsinni taamaatitsiinnartariaqalerneq aalajangiupparput.
– Tamatumunnga ilaatigut neqeroorutit tiguneqartut tamarmik, missingersuutinut piareersaataasumik sulianut sanilliullugit akitigut malunnaatilimmik qaffasinnerunerat, aammalu neqeroorusiani tiguneqartuni sisamaasunit ataasiinnaap suliariumannittussaarsiuussinermi piumasaqaatinik tamanik naammassinnissimanera pissutaavoq.
– Soorunami taamatut aalajangernerput nuannarinngikkaluarparput, siunissarli ungasinnerusoq eqqarsaatigaluguttaaq ingerlatsinerup umiarsualivimmillu allilerinerup aningaasaqarnikkut piujuartitsiffiunissaa pillugu akisussaaffitsinnik naammassinninniassagutta, piffissami matumani taama aalajangerneq eqqortuliorneruvoq, siulittaasoq naggasiivoq.
Umiarsualiviup containereqarfiata 200-300 meterimik allilerneqarnissaanut suliariumannittussarsiuussisoqartoq Sikukimi pisortap John Rasmussenip Sermitsiamut itisilerpaa.
Umiarsualiviup allineqarnera kilisaataanerusunit atorneqassaaq. John Rasmussen naapertorlugu maajimiit septembarip naaneranut umiarsualivimmi inissaqarniarneq ajornartorsiutaasarpoq, tamannalu umiarsualiviup allilerneqarneranit aaqqinneqassalluni.
– Umiarsualiviup allilerneqarnissaa kinguaattoorterujussuanngikkaluarlugu, suliniut qanoq nutaamik periuseqarluni ilusilersorneqarsinnaanersoq massakkut nalilersoqqileruttorparput. Umiarsualiveqarnikkummi suliassaqarneruleriartorneq inissaqartinneqassappat, inuussutissarsiuteqarnikkullu ineriartorneq ikorfartorneqassappat, umiarsualiviup allilerneqarnissaa pisariaqarpoq, John Rasmussen oqarpoq.
