USA-mit tapiissutit assortuussutaareersullu: Peqatigiiffiit tapiissutit utertissavaat
Avannaata Kommuniani lokalforeningit sisamat Avannaata Kommunianiit transporttilskudit utertissavaat, paasineqarmat angalanermut aningaasartuutit Avannaata Qimussersuani amerikamiut konsulatiinit akilerneqarsimasut.
Avannaata Qimussersuanut peqaatigiiffiit sisamat peqataanissamut Avannaata Kommunianiit tapiiffigineqarput. Tapiissutit marsip naanerani angallannermut atorneqartussatut tunniunneqartut maanna uterteqquneqarput.
Assi: Oscar Scott Carl
Avannaata Kommunia qimussertartut peqatigiiffiinut Avannaata Qimussersuanut peqataasussanik angalanermut tapiissuteqartarnera ileqquuvoq.
Ukioq manna aamma taamaappoq, Avannaata Qimussersua Sisimiuni marsip naanerani ingerlanneqarmat peqatigiiffiit sisamat angalanissamut tapiiffigineqarput.
Kingornali paasinarsivoq Amerikamiut konsulateqarfia Avannaata Qimussersuanut atatillugu KNQK-mut qimussit, qimmit peqataasullu assartorneqarnerannut angallanneqarnerannullu aningaasartuutinik tapiissuteqarsimasoq.
- Ukioq mannali peqatigiiffiit peqataatitaqartut Avannaata Kommunianut qinnuteqareertut tapiiffigineqareersullu paasinarsivoq Amerikamiut konsulateqarfiannit Air Greenlandimi angalaneq tamaat aningaasaliiffigineqassasoq.
- Tamanna toqqammavigalugu peqatigiiffiit tapiissutinik utertitsinissaannik Inerisaanermut Ingerlatsivimmiit allakkatigut piumaffigineqarnikuupput.
Qimussersuaq isornartorsiorneqartoq
Kommunalbestyrelsip pingasunngornermi juunip 25-ani ataatsimiinneranni taanna paasissutissiissutigineqassaaq.
USA-p KNQK-mut Avannaata Qimussersuanullu tapiissuteqarnera isornartorsiorneqangaatsiarpoq. Tapiissuteqarnermi USA-p Kalaallit Nunaannik pisiumalluni imaluunniit aqutsilerusulluni soqutiginninnerulernerata nalaani pivoq.
Tamatuma nalaani Usha Vancep tikeraarnissani nalunaarutigaa, uiatalu USA-p præsidentiata tullersortaata J. D. Vancep Nuummut Sisimiunullu tikeraarnissartik kingorna aamma nalunaarutigalugu. Pilersaarutitilli allanngortillugit Pituffimmut taamaallaat tikeraarput.
Peqatigiiffiit marluk tapiissutit utertereeraat
Peqatigiiffiit sisamat kommunimit angallannermut tapiissutinik qinnuteqarnikuupput taperneqarlutillu. Taakkulu tassaapput Qimussersaq 71 Ilulissaniit, peqatigiiffiit Saqqameersut Qeqertameersullu, Suloraq 84 Saattuniit aamma Suloraq 87 Nuussuarmiit.
Aningaasat katillugit 436.629 koruunit kommunimut utertinneqassapput.
- Ilulissani Qimussersaq 71: 73.029 koruunit
- Saqqaq/Qeqertaq: 96.459 koruunit
- Saattut Suloraq 84: 99.000 koruunit
- Nuussuaq Suloraq 87: 168.141 koruunit
Paasissutissat naapertorlugit peqatigiiffiit marluk tapiissutinik utertitsereersimapput. Peqqinneq sunngiffimmullu ingerlatsiviup peqatigiiffinnut Saqqaq/Qeqertamiittunut Saattuniittunullu tapiissutinik utertitsinissaq pillugu attaveqarneq ingerlappaat.
