USA tamakkerlugu Trumpimut akerliussutsimik takutitsisoqartoq

USA-mi illoqarfinni anginerni arlalinni USA-p præsidentianut Donald Trumpimut taassumalu qanittumik siunnersortigisaanut Elon Muskimut akerliussutsimik takutitsisaqattaarnerit arfininngormat aallartinneqarput.

Washington D.C.-mi inuit tusindilikkaat illoqarfiup qeqqani katersuupput, aaqqissuisunit oqaatigineqartut naapertorlugit, Trumpip præsidentip illorsuanut januaarimi uternerata kingorna akerliussutsimik takutitsinermi siullermi ikinnerpaamik 20.000-it peqataanissaat naatsorsuutigineqarluni.

Akerliussutsimik takutitsinermi „Attornagit!” (Hands off!) oqaasinnaaralugu Trumpip Muskillu naalagaaffiup ministereqarfiinik sullissivinnilu arlalinni sulisunik ikilisaanerat akerliuniarfigineqarpoq.

- USA-mi kunngeqassanngilaq, allagartarsuit ilaanni akerliussutsimik takutitsisut ilaata tigumiaani allassimavoq.

- Musk nunamit anisittariaqarpat, allagartarsuarmi allami Trumpip nunasisunik millionikkaanik nunamit anisitsinissamik neriorsuutaa innersuussutigalugu taama allassimavoq.

USA-mi illoqarfinni anginerusuni arlalinni aamma illoqarfinni mikinerusuni akerliussutsimik takutitsinerit katillugit 1200-t USA-mi nunap ilaanni naalagaaffinni 50-ini tamani pisussatut ilimasaarutigineqarput.

Suliniaqatigiiffiit arfininngornermi akerliussutsimik takutitsinermik aaqqissuussisut ilaata nassuiaatigaa, oqariartuutigisamik tassa Trumpip peqqinnissamik isumaginnittunut, ilinniartitaanermut akunnattumillu isertitalinnut navianartorsiortitsineranik USA-milu aningaasaateqarluartut pisuujunerpaat pisuunerulernissaannik taamaallaat suliniuteqarnera inuppassuarnut tusartikkusunneqarpoq.

- Trumpip aningaasarsiornermut pisinnaatitaaffitsinnillu saassussinera oqaloqatigiissutigeriartigik, Leah Greenberg, suliniaqatigiiffimmik Indivisible-imik pilersitseqataasoq oqarpoq.

- Innuttaasut naalakkersueqataanerannut akerliuniaqatigiinneersuupput, innuttaasut naalakkersueqataaneranni tunngavigisavut tiguarniarsaraat saassutaralugillu, aviisimut New York Timesimut oqarpoq.

Nunani allani aamma Trumpimut Muskimullu arfininngormat akerliussutsimik takutitsisoqarpoq. Ilaatigut USA-p sanilerisaanni marlunni, Canadami Mexicomilu.