Utoqqasaap isummersuutai: Iluanngitsoq imaluunniit silassorissoq

Nuummi meeraallunga ilaannikkut atuagassianik Anders And-imik pisarlunga eqqaamavara.

Umiarsuit qaqutigoortumik tikittarnerat pissutigalugu amerlanertigut sisakkaarlugit pisarpunga.

Inuttat uannut sunniuteqarnerpaasimasut ilagaat Georg Gearløs. Silassorilluinnartuuvoq. Ikiorteqarpoq „Ikiorteeqqamik“ taaguutilik, Georgilu isumassarsiaarukkaangami iluaquteqarpoq — nasaq eqqarsaatinik imalik.

Immaqa ima eqqarsarputit: ’Qinersinermut qanoq attuumassuteqarami?’ Georg Gearløs Andebymi najugaqarmat illoqarfia Kalaallit Nunaannut attuumassuteqarnersoq apeqqutitsialaasinnaavoq.

Aap, takuuk, apeqqut tamanna atuartartumut apeqqutigissavara. Namminerli eqqarsaatikka saqqummiutinngitsoornianngilakka.

Matumuuna Anders Andip silarsuaani politikerinut assingusunik sanilliussinissannut kajumissaarivugut.

Inuit allattorsimaffiat 

Georg Gearløsip nasaa illup qaavatut pujoorfilittut ippoq. Qaavani ulloqarpoq qernertunik pingasunik tulugalimmik. Nasaq Georgip ilaannikkut atisarpaa, arlaannillu pisoqartarpoq. Tulukkat qarluleraangata isumassarsiat takkussuutilertarput.

Politikerit — uagullu tamatta — periarfissaqarutta nuannaarluta taamaattumik nasartassagaluarpugut. Isumassarsiat nutaat amigaataapput, isumassarsiat piviusunngortinneqarsinnaasut. Georg Gearløsimi isumassarsiuinnarani aamma piviusunngortitsivoq. Politikki aamma taamaassagaluarpoq.

Joakim von And pisuussutini amerlangaartut aningaasanik nakkartitsivimmi uffarfigisaramigit alutornangaarpoq. Tamatta Amerikami pisuumik akkaqarluta piffissap ilaani kissaatigisarsimagipput isumaqarpunga. Ullumikkut aamma taamaakkunarpoq.

Anders And pillugu atuagassiani taakkunani ilisarisimasagut ilaquttatsinnut eqqaanartut allat tassaapput Fætter Højben, Fætter Vims aamma Fætter Guf.

Eqqaamavara Fætter Højben qinngarnartumik iluatsitsiuaannartoq, immaqalu politikerinut suliniuteqanngikkaluarlutik angusaqanngikkaluarlutillu qinigaaqqittartunut eqqaanarsinnaavoq.

Fætter Vims aamma ilisarnartoqarpoq. Suliniutinik ajunaarutaasunik nuannaarluni aallartitsisarpoq. Atuarfeqarnitsinnik aallarniisuusimasinnaassava?

Fætter Guf aanaa Andip naasorissaasutut illorsuani ikiortitut sulisarpoq, piffissanili tamaat nerinermut eqiasunnermullu atortarpaa. Eqiasunnera anguneqarsinnaanngilaq. Politikerinik taamaattunik aamma peqarpoq.

Qeerlutuut arnaviat

Aanaa And aamma Andersine And Andebymi arnaviartaapput.

Aanaa And eqqaamasattut aanaatut takorloortakkatut kaagiliortarlunilu, sallaallunilu asanartuuvoq. Meeraallunga aanaga isigileraangakku allarluinnaq takusarpara. Anaanannik aanaga tamatigoortuuvoq, sallaalluni ilaannikkulli aamma allatut pissuseqariasaarsinnaasarluni. Ilaqutariit ningioraat.

Andersine And illuatungianik niaqqumini angisuumik aappalorujuttumik qalersaqarluni angalaarujoortartoq eqqaamavara. Aalajangersimasumik pissuseqanngitsoq kusassarnermillu aallussinerusoq. Taanna uanga isiginnittaasinni isikkaajunerup qimeriakkaajunerullu soqutiginarpallaannginneranut uppernarsaataavoq.

Ersarissumik pissuseqarneq pinnernermiit soqutiginarneruvoq.

Aanaa And Andersinelu nunarsuatsinni aamma ilisarisimavagut – aamma arnat politikerit akornanni.

Rip, Rap, Rupilu uanga isumaga malillugu pissuserippallaarput. Meeraallunga spejderiunikuuvunga, Anders Andilli soraluai qanoq ilioraluarumaluunniit angusinnaanngilakka. Nunani tamalaani spejdereqatigiinni Grønspætterini qulinik ullorialigaasimapput. Maani Nuummi spejderiugama uniforminni ikitsuinnarnik meqqeqarpunga. Ataaserli assigiissutigaarput: Teqqialeerannguaq.

Soralussat taakku pingasutulli naalatsiginissaq uanga isinni takorluugaannaavoq.

Ajortut

Andebymi inuuneq nuannersuinnaanngilaq. Eqqaani inuttat soorlu Hexia de Trickitut ittumik, tassa arnamik angakkuartartumik, nunarsuarmi arnaquassaani pissaaneqarnerpaanngorniarluni onkel Joakimip ooriutaanik iluanaarnartumik aarnuanngortitsiniarluni aatsitserusuttumik, takussaasoqarpoq.

Nuannerpallaanngitsut ilagaat Bjørnebanden aamma Sorte Slyngel. Angalaaraangata ernumassutissaqartarpoq. Ilaatigullu ikiortissaq ilimaginngeqqinnaagaq takkuttarpoq, Fedtmule!

Fedtmule tamatta nalunngilarput. Asanaqaaq. Inuttaq peqqusersuitsoq, pikkorluttoq silatuallaanngitsorlu. Taamaattumik tamatta ilaqutaqarpugut, ilimagaaralu politikkip silarsuaani aamma taamaattoqartoq. Fedtmulemut tunngasoq soqutiginartoq tassaavoq kinaassusaata illuatungia, tassa kinaassusaata aappaa. Jordnøddi angakkuagaq nerigaangamiuk Supermulenngorluni nukittoorsuanngorlunilu, tutsarissorsuanngorlunilu akimut isigisinnaanngortarpoq. Jordnøddillu atorunnaarnissaata tungaanut Supermanditut aamma tingisinnaasarpoq. Ajortulli ajugaaffigiuaannarpai.

Assaa, taamaattumik sapiitsuliortoqarluni qanoq torrak. Aamma politikkitta silarsuaani.

Eqqissinartoq nipaatsorlu

Tamakkiisumik isigalugu Andebymi inuuneq sukkut tamaana akerleriittoqartaraluartoq nipaalleqqikkaangat eqqissisimanartarpoq. Taamatut inuuneqartut usorisinnaasarpakka.

Uagut inuunitsinni Inatsisartunut qinersineq ulluinnarni eqqissisimanitsinnik kipititsisarpoq (piffissaq tamaat, taamaattunik ulloqartarpugut), tassani pisuutitsinerit ajortutullu pissusillit saqqumilaarlutik. Qinerisoqareerpat ileqqorissaarluni suleqatigiittoqaqqissinnaalissappat tamanna akuerisariaqarparput. Eqqissisimaneq taamaattoq Andebymut sanilliullugu Kalaallit Nunaanni suli nassaarinngilarput.

Iluanngitsoq imaluunniit silatooq? Eqqarsaatikkut Georg Gearløs Inatsisartunut qineqqusaassasoq kissaatigisaraluarpara. Taamaalilluta qanoq pisoqaraluarpalluunniit iliuuseqarsinnaalluartumik qinigaqassaagut, taava iluannginnersoq silatunersorluunniit aperineqarutta ersarissumik akisinnaalluta. Apeqqut marluinnarnik akissutissaqanngitsoq erseqqissaatigilaassavara. Akissutit pingajuat tassaavoq iluanngitsoq silatoorlu.

Qinersinissarsi eqqaamallugu. Uagut utoqqaat aammarluta qinersiumaarpugut, sulimi qinersisinnaatitaavugut.