FUTURE OF GREENLAND
Nunatta siunissai: Imaaliorussi politikkimut akuutinnerulersinnaavatsigut
Inuusuttut ilinniarnertuunngorniarfimmi ilinniartut meeqqallu atuarfianni atuartut 400-t missaaniittut isumasioqatigiinnermi Future of Greenlandimi peqataapput. Inuusuttut politikkip silarsuaanut qanoq iliorluni peqataatinneqarnerusinnaanersut politikkerit qaffasissumi inissisimasut oqallimmata malinnaavugut. Inuusuttut tamanna akissutissaqartippaat, politikkerillu pissuserissaarlutik oqaloqatigiinnerat maluginiagaannut ilaavoq.
Inuusuttut isumasioqatigiinnerup nalaani timitik aalatillugit arlaleriarlutik eqeersarneqarput. Uani Miilo Andersen ikinngutaalu timiminnik aalatitsisut takusinnaavasi.
Assiliisoq: Arnaq Nielsen
Duddulut-dulut! Duddulut-dulut!
Safri Duokkut nipilersugaat
ilisimaneqarluartoq Played-A-Live Katuami inersuaq nippaallugu appisimaarneqarmat allaanngiivippoq qitittarfimmut isiinnarluni. Inuusuttut
qitaasarput, qeratasoqanngilaq nipaarsaartoqaranilu.
Nipilersuut nipikillineqaraluartoq qeratanerulertoqanngilaq.
Isumasioqatigiinnermi aqutsisut scenemut qaqipput politikerillu qaffasissumi
inissisimasut nipilersortartorsuartut tusaamasatut tikilluaqqullugit.
Inersuarmi malinnaasut ilagaat 19-inik
ukiulik Miilo Andersen.
– Inersuaq najuuffigalugu nuanneqaaq, taanna
oqarpoq.
Issiavimmi ungasinnerusumi issiavoq 15-inik
ukiulik Ragna Sander Granlien, taanna Nuuk International Friskolemi 9. Klassimi
atuartuuvoq.
– Isernerat torrageqaara, aamma assut
torrappoq isumasioqatigiinnermut imaattumut peqataarusunnerat, taanna oqarpoq.
– Aamma imminnut pitsaasaarfiginerat
takullugu assut iluarpoq.
Partiit siuttui pingasut Jens-Frederik Nielsen, Aleqa Hammond aamma Múte B. Egede scenemi issiapput. Issiaqatigaat isumasioqatigiinnermi aqutseqataasoq Maja Motzfeldt-Haahr aamma aqutseqataasoq Rina Kofoed, taanna ilinniartuuvoq.
Assiliisoq: Arnaq Nielsen
Politikkip inuiaqatigiit ilusilersorpai
Sulisitsisut isumasioqatigiinneq Future of
Greenland aaqqissuussaraat. Isumasioqatiinnermi tassani inuusuttut, politikerit
inuussutissarsiortullu nunatta siunissaa pillugu eqqartueqatigiipput. Aleqa Hammond, Múte B. Egede aamma Jens-Frederik Nielsen ulloq
taanna oqallittunut ilaallutik.
Qitaasarneq nuannisarnerujussuarlu
allanngoriartuaarpoq, politikkimi pillugu oqallinneq aallartikkami, kisianni
inuusuttut politikkerillu oqittumik qeratanatillu pissusilersornerat
malunnarluni.
Ragna Sander Granlienip politikkip
silarsuaa imannarsuaq malinnaaffigineq ajoraluarlugu ataatsimik
maluginiagaqarpoq.
Ragna Sander Granlienip isumasioqatigiinnermi NordJobbimeersut saqqummiussimmata pissarsilluarlunilu pissanganartinnerpaallugit oqaatigaa. – Ilinniarnertuunngorniarfik naammassigukku nunanut allanut misigisassarsiorlunga suliartorusullunga eqqarsaatigisarpara, taanna oqarpoq.
Assiliisoq: Arnaq Nielsen
– Pissuserissaarlutik oqaloqatigiipput
assullu isumaqatigiillutik, taanna oqarpoq.
Miilo Andersenip inuiaqatigiilerineq atuartitsissutitut ilinniarnertuunngorniarfimmi immikkut toqqagaanut ilaanikuuvoq, politikkillu
ulluinnatsinni qanoq sunniuteqartiginera qularutiginngilaa.
– Pissanganaqaaq. Inuiaqatigiinnummi
ilusilersueqataasarami. Atuarnerup nakorsiarnerullu akeqanngitsuunissaat ilaatigut
aalajangiiffigineqartarpoq. Taamaammat pingaarutilerujussuuvoq, taanna oqarpoq.
Pingasunngornermi maajip arfernani Future of Greenlandeqarnerani saqqummiillutillu oqallittut katillugit 13-iupput. Ilinniarnertuunngorniarfik naammassillugu periarfissarpassuit saqqummiunneqartut Miilo Andersenip pissarsiaqarfiginerpaavai. - Matorpassuarnik ammaassisinnaapput, taanna oqarpoq.
Assiliisoq: Arnaq Nielsen
Imaaliortoqarpat politikki inuusuttunut soqutiginarnerulersinnaavoq
Politikkerit oqallinnerminni politikkip
inuusuttunut soqutiginarnerulersinnissaa eqqartugaannut ilaavoq. Isumaqatigiissuteqarpullu:
Oqalliseriaaseq pitsaanerusariaqarpoq, isumaqatigiinngikkaanni imaanngilaq
inuttarsiuilluni kusananngitsumik pissusilersortoqartariaqartoq, aamma
inuusuttut apeqqusiisinnaallutillu unammillersinnaasariaqarput.
Inuusuttulli qanoq isumaqarpat?
– Atuarfimmi sammineqarnerusinnaavoq, aamma
politikerit attavigineqarnerusinnaagaluarput, Ragna Sander Granlien oqarpoq
nangillunilu.
– Kikkut tamarmik nalunngilaat
takuniaasoqarsinnaasoq, kisianni atuarfimmi immaqa piumasaqaatinngortinneqarsinnaagaluarpoq.
Aamma politikerit atuarfinnut pulaarlutik saqqummiikulanerusinnaapput, taanna
oqarpoq.
Miilo Andersen isumaqataavoq.
– Isumasioqatigiinnerit imaattut
ajunngivipput. Imaanngilarmi inuusuttut tamarmik nutaarsiassanik
isiginnaarlutillu atuartartut. Aamma atuarfimmi samminerusinnaagaluarparput,
Miilo Andersen oqarpoq.
