Aningaasarsiorneq unikaallakkaluartoq Royal Arctic Line millionikkaanik sinneqartooruteqarpoq

Royal Arctic Line  akileraarutit ilanngaatiginagit 2025-mi 15 millionit koruuninik sinneqartooruteqartoq naatsorsuutaanni takuneqarsinnaavoq.

Suliffeqarfik Namminersorlutik Oqartussanik pigineqartoq tusagassiuutitigut allarpoq.

Tamanna ukiup siulianut sanilliullugu 6 millionit koruuninik annertuneruvoq. Kalaallit Nunaanni aningaasarsiornerup ingerlanera appariaateqaraluartoq, ingammik sanaartornermut aalisarnermullu tunngatillugu nassiussat annikillinerat pissutigalugu, tamanna anguneqarpoq.

Suliffeqarfiup ingerlatsinermut tunngatillugu naleqqussaasimavoq aammalu avataani suliassanik nutaanik ujartuinera sinneqartoornermut ilaatigut pissuteqarpoq.

Tamatuma saniatigut suliffeqarfiup ataaniittoq Arctic Umiaq Line aamma annikitsumik sinneqartooruteqarpoq, ukiulli siuliani amigartooruteqarneranut sanilliullugu angusai ersiutilimmik pitsaanerulersimallutik. Iliuuseqarnerit peqqutigalugit sinneqartoorneq anguneqarsinnaasimavoq, soorlu angalanermut pilersaarutit innuttaasunut iluaqutaasussanngorlugit allanngortinnerisigut billetinik tuniniaaneq ingerlalluarnerulerpoq takornariaqarnermullu aamma kalluaagani.

Naalakkersuisut siulersuisuni siulittaasoq taarseraat

Royal Arctic Linep 2025-mi oktobarimi immikkut ittumik ataatsimeersuarnerani Pâviâraq Heilmann siulersuisuni siulittaasutut tunuarpoq, siulittaasullu tullianit Inooraq Brandtimit taarserneqarluni.

Uumiarsuaatileqatigiiffiup 2025-mi ukiup affaani siullermi 56 millionit koruuninik amigartooruteqarnini aggustimi nalunaarutigereeraalu taama pisoqarpoq.

RAL-ip immikkut ittumik ataatsimeersuarnerani Naalakkersuisut siulittaasuat Jens-Frederik Nielsen Inooraq Brandt RAL-imik ineriartortitsinissamut piukkunnarnerpaasoq oqarpoq.

- RAL-imi aqutsisut ukiuni tallimani tulliuttuni periusissiartik akueraat. Maannakkut umiarsuit nutaanerusunik taarserneqassapput, Eimskipimillu suleqateqarneq nalilersorneqartuassalluni, Jens-Frederik Nielsen oqarpoq nangillunilu:

- Nunami illoqarfiit nunaqarfiillu mikinerit ajornanngitsumik ataavartumillu pajuttorneqartarnissaat qulakkeerniarlugu suliassarujussuaqarputit, Jens-Frederik Nielsen siulittaasunngorlaaq toqqaannartumik saaffigalugu oqarpoq.

2026-mut naatsorsuutit

Naak aningaasarsiorneq Kalaallit Nunaanni annikilleriarsimagaluartoq, taamaattoq suliffeqarfissuup angusai naammaginartutut oqaatigineqarsinnaapput, kisiannili siunissami aningaasaliissutissat naammattut piginissaannut angorusutatut naatsorsuutigineqartunit appasinnerullutik.

2026-mi akileraarutit sioqqullugit 15-25 mio. koruuninik sinneqartooruteqarnissaq naatsorsuutigineqarpoq. 

Sinneqartoorutit Royal Arctic Linep aningaasatigut tunngaviinik nukittorsaassaaq, soorlu umiarsuarnik nutaanik, pramminik nutaanik pajuttaatinillu immikkut Issittumut tulluarsakkanik sanaanik aningaasaliisinnaanngorlugu.

Aningaasaliinerit taakkua Kalaallit Nunaanni pilersuinermi aaqqissuussinerup siunissamut ungasissumut patajaallisarneqarnissaanut qulakkeerinneqataassasut, RAL allappoq.