Uummannami sulisussaaleqineq annertooq
Uummannaq 1.400-it missaanniittunik innuttaqartoq sulisussaaleqiffiusutut eqqugaaqqavoq. Illoqarfimmi pisiniarfeqarfiit annersaat, Pilersuisoq, sulisussaaleqinerup kingunerisaanik ammasarfimminik annikillilerisariaqalersimavoq. Innuttaasoq Sakio Fleischer, aamma kommunalbestyrelsemi ilaasortaasoq, kaammattuivoq inoqarfinni ataasiakkaani, nunap immikkoortuini nunalu tamakkerlugu sulisussaaleqinermik ajornartorsiut aaqqiissutissarsiorfigineqassasoq.
Uummannami innuttaasoq Sakio Fleischer, aamma Avannaata Kommuniani kommunalbestyrelsimut ilaasortaq, sulisussaaleqineq sammineqarnissaa kaammattuutigaa: - Uummannami nunap sinneratut sulisussaaleqinermik eqqugaaqqavugut, maannalu siullerpaamik nalaapparput pisiniarfiit ammasarfiisa sivikillisinnissaat pisariaqalersimasoq, taanna oqaluttuarpoq.
Assiliisoq: Leiff Josefsen
Kalaallit Nunaanni naatsorsueqqissaartarfiup kisitsisaatai naapertorlugit ukiup mantuma aallartinnerani Uummannami innuttaasut 1.383-iupput, meeqqanit utoqqaat ilanngullugit. Taakkunannga sulisinnaasut 929-upput, sulisinnaasullu akornanni ukioq manna juunimi suliffissarsiortut 30-iullutik.
Sakio Fleischer sulisussaaleqineq annertooq pillugu ernumassuteqarluni nalunaaruteqarpoq, taannami oqaluttuarpoq pisiniarfinni sulisussaaleqinerup kingunerisaanik maanna pisiniarfinni ammasarfiit sivikillisinneqartut.
- Uummannami illoqarfimmi pisiniarfiit sisamaapput, taakkunannga pingasut Pilersuisumit ingerlanneqarlutik. Maanna nalaapparput pisiniarfiit pineqartut tamarmik ammasarfiisa sivikillisinneqarnissaat pisariaqalersimasoq, sulisussaaleqineq pissutigalugu. Sulisussaaleqineq ajornartorsiut annertooq maanna atugaraarput, tamannalu qitiutillugu suliarisariaqarparput aaqqiissutissanik ujarlerluta, Fleischer oqarpoq.
Pilersuisoq sulisussaaleqinermik eqqugaalluni uppernarsaavoq
Pilersuisumi tuniniaanermi pisortaq, Jonas Aronsen, Sermitsiamut uppernarsaavoq sulisussaaleqineq pissutigalugu pisiniarfiit ammasarfii nalinginnaasumit siusinnerusukkut matuneqartariaqartalersut:
- Aap, Pilersuisoq aamma sulisussaaleqinermik eqqugaavoq, tamatumalu kingunerisaanik siullerpaamik Uummannami ammasarfiit annikillisinneqarnerannik kinguneqarpoq, taamaattorli sumiiffinni allani ammasarfiit sunnerneqanngillat, Aronsen nassuiaavoq ingerlaqqillunilu:
- Allatulli sulisussaaleqineq pisiniarfeqarfitsinni misigisarparput, maannamut ammasarfiit allanngortittariaqarnikuunngilagut. Uummannamilu pisiniarfiit ammasarfiisa sivikillisinneqartariaqarnerat ajuusaarutigaarput, allatulli ajornartumik Uummannami ammasarfiit tassa sivikillisariaqarsimavagut, sulisugut sulipilutsittussaannginnatsigit illersortariaqarlugillu.
- Aamma eqqaamassavarput aasaanera aamma taamaalilluni sulinngiffeqarnerup annertunerpaaffia maanna atuummat. Sulissutigivarput naatsorsuutigaarpullu pisiniarfiit ammasarfiisa aasap kingorna nalinginnaasumik ammasalernissaat, Pilersuisumi tuniniaanermut pisortaq Jonas Aronsen oqarpoq.
Allat suliffissuarnut sunniuteqalersut
Sakio Fleischerip ernummatigaa, sulisussaaleqinerup malitsigisaanik suliffeqarfinnut allanut sunniuteqalersoq. Erseqqissaatigaa, pisiniarfinni sulisut saniatigut kiffartuussinermik suliaqarluni suliffeqarfinni, tassani ilaatigut utoqqaat illuanni aamma meeqqerivinni sulisussaaleqineq annertusiartortoq nammineq maluginiarsimallugu.
- Isummersorfigisariaqarparput aaqqiissutissarsiortariaqarpugullu, tassami sumi tamani sulisussaaleqinermik eqqugaasoqarpoq. Tamanna pisiniarfiit ammasarfiisa sivikillineqarnerannik kinguneqaannanngilaq, aamma suliffeqarfinni allani, pingaartumik sulisartut nalunaaquttap akunnermusiallit amigaataanerat annertusiartorpoq.
- Matumani ilinniarsimasut aamma ilinniarsimanngitsut pineqarput. Maluginiarpara, ilinniarsimasut qaammammut akissarsiaqartut sulisut nalunaaquttap akunnermusialinnut sanilliullugu aalaakkaanerusut, taamatuttaaq sulisut ilinniarsimanngitsut suliffinniitiinnarniartarnerat ajornakusoornerusoq. Apeqqutigisariaqarparput, nalunaaquttap akunnermusiaqartut suliffinnit qimagussornersut, immaqa sulineq akilersinnaanngimmat, Sakio Fleischer naggataatigut oqarpoq.
