Vivian: Illersornissamut isumaqatigiissutissaq suliassallu allat pingaarutillit utaqqipput
Nunanut allanut tunngasunut naalakkersuisoq, Vivian Motzfeldt inissisimaffimminiiginnassaaq. - Inatsisartunut qinersinissaq nalunaarutigineqarmalli suliassat nunanut allanut tunngasut pingaarutillit uninngagallartinneqarnikuupput, maanna inissitsiternerup kingorna sulineq aallarteqqinneqarsinnaalerpoq, ilaatigut illersornissaq pillugu Danmark peqatigalugu isumaqatigiissut sukumiisorujussuaq inaarsarneqassalluni, Vivian Motzfeldt (S) oqarpoq.
- Qinersinissamik suaaruteqarneq sioqqullugu suliat ingerlareersut unikaallatsinneqarsimasullu nanginneqarnissaasa saniatigut, Naalakkersuisut nutaat aamma pilersaaruteqarput USA-mut oqaloqatigiinnerup sulissutigineqarnissaanut, taama oqarpoq Siumup siulittaasua, Vivian Motzfeldt, aamma nunanut allanut tunngasunut naalakkersuisutut inissisimaannartussaq.
Assi: Leonhard Foeger/Reuters/Ritzau Scanpix
Sermitsiamit Vivian Motzfeldt (S) aperaarput Naalakkersuisut inississimalereerpata suliassat siulliit pingasut suussanersut:
- Siulleq tassaassaaq illersornissamut isumaqatigiissut annertooq pillugu Danmarkimik oqaloqatigiinnerup nanginneqarnissaa, suliaq taanna unikaallatsinneqarnikuuvoq qinersinissamik suaarutiginnittoqarnerata malitsigisaanik, maannalu nangissinnaanngussavarput. Tassunga tunngatillugu partiit naalakkersuisooqatigiinnissamik isumaqatigiittut ersarissumik naatsorsuutigaat naligiissumik suleqatigiinneq ingerlanneqarumaartoq.
- Aappaattut amerikamiut oqaloqatiginissaat sulissutigissavarput USA-mik suleqateqarnitta pioreersup ingerlaannarnissaa pisariaqartinneqarpallu nutarterneqarnissa, ilaatigut USA-p Kalaallit Nunaanniinnera pillugu.
- Pingajuattut nunat tamalaat akornanni suleqateqarnerput pillugu oqaloqatigiinnerup nukittorsarnissaa.
EU-mik suleqateqarneq pingaaruteqartoq
Tassaapput Vivian Motzfeldtip tikkuagai aperigatsinni suliassat ingerlatassai pingasut siulliit suussanersut.
Tamatuma saniatigut Vivian Motzfeldtip erseqqissaatigaa Danmarki USA-lu tassatuaanngitsut Kalaallit Nunaata oqaloqatigisassai:
- Nunarsuarmi nunat akornanni nunatta inissisimanera nukittorsartariaqarparput, assersuutigalugu EU-mik oqaloqateqartariaqarpugut suleqatigiinnerup nukittorsarneqarnissaa siunertaralugu, Vivian Motzfeldt Sermitsiarmut erseqqissaavoq.
Illersornissamut ministeri Troels Lund Poulsen tikeraassamaartoq
Illersornissamut ministeri Troels Lund Poulsen (V) tallimanngornermi TV 2-mut uppernarsaavoq, ungasinngitsukkut Vivian Motzfeldt tikeraassamaarini.
- Naatsorsuutigivara Kalaallit Nunaanni suleqatiga Vivian Motzfeldt (S) poorskertinnagu, taamaaliussaangalu suleqatigiissutigeriikkagut suleqatigiissutissagullu amerlasuut pillugit, ilaatigullu innersuussutigivaa Issittumi aningaasaliinernut tunngassuteqartut, Troels Lund Poulsen TV 2-mut oqarpoq.
