Aattalimmik arfernik takornariartitsineq

Takornariarpassuit nunani allaneersut ukiut tamaasa arfernik takornariartinneqartarput, taamaattumik arfernik takornariartitsineq takornarialerisut aningaasaqarnerannut pingaaruteqarluinnarpoq. 

Taamaattorli Kalaallit Nunaata sineriaani arferit amerlavallaalersimasut, taakkulu aalisartunut akornutaaginnaratik aammali imaani angalasunut navialisitsisarnerat annertusiartuinnartoq amerlasuut isumaqarput. 

Tamannalu pissutaalluni arferit qimaatinniarlugit imaluunniit toqunniarlugit seqqortaarneqartariaqartut inuit attaveqatigiittarfiini takornartaanngilaq. Arferillumi seqquusarneqartarnerat takornartaajunnaarsimasoq, tamannalu takornariaqarnermut innarliisinnaasoq takornariartitsisartut isumaqarput.

Ajornartorsiut alliartortoq

Jan Cortsen Ilulissani takornariartitsivimmik Local Guide-mik piginneqataavoq, taassumalu saniatigut takornariartitsivimmi takornarialerisunit qulingiluanit pigineqartumi Ilulissat Excursions ApS-imi pisortaalluni. Taassuma ukiumut takornariarpassuit arfernik takornariartittarpai, arfernullu seqquusartarneq takornartaajunnaariartortoq, taassuma oqaatigaa.

- Siorna takornarissanik angallassillunga arferit arlallit takugatsigit unippugut. Tamatuma kinguninngua umiatsiaq ungasiarluni arriillivoq, inuttaatalu aallaat sakkortooq atorlugu arfeq aallagaa isiginnaarparput.

- Arfernut seqqortaartarneq akulikilliartortoq malunnarpoq, tamannalu arfernik takornariartitsisartuulluni akuersaarneqarsinnaanngilaq.

- Aamma angutip allap arfermik aallaannissimalluni nammineerluni oqaluttuuppaanga. Taassuma oqarnera naapertorlugu Disko Linep angallataasa ilaanni takornarissat isigisut arfeq aallaasimavaa, taamaattoqarmallu takornarissat nillerrassimapput, Jan Cortsen oqarpoq.

Arferit nerigaangata imaani timmiarpassuaqartarpoq, tamakkulu uiarterlugit ingerlasoqartarnissaa pingaaruteqartoq, taassuma erseqqissaatigaa.

- Imaatigut angalasut ilaasa arferit nerisut toraaginnarlugit ingerlasarput, tamannalu navianarsinnaammat qanillinaveersaarneqartarnissaat kaammattuutigerusunnarpoq, Jan Cortsen oqarpoq.

Takornariaqarnermut innarliisinnaasoq

Ilaanneeriarluni arferit aalisartut atortuinik akisoqisunik innarliisinnaasarput, taamaattumillu arferit ikilisarneqartariaqartut aalisartut amerlasuut isumaqarput.

- Soorunami aalisartut paasilluarsinnaavagut. Soorunami kikkut arfernut seqquusartartut naluarput, kisianni arferit asuli seqqortaarneqartarnerat pissusissamisuunngilaq, tamannalu takornariaqarnermut annertuumik innarliisinnaavoq.

- Angallatit arfernut aporaangata, tamanna ilaatigut ajutoornermik kinguneqartartoq ilisimavarput. Kisianni arferit uumaffianni uagut angalasuuvugut ajutoortoqartarneralu arferit namminneerlutik pisuussutigineq ajorpaat, Jan Cortsen oqarpoq.

Arfernut seqquusartarneq unitsinniarlugu paasititsiniaanerit pisortat ingerlattariaqaraat, kiisalu piniarnermut nakkutilliisut maannakkorniit annertunerusumik nakkutilliisariaqartut, taanna isumaqarpoq.

Ikillit takuneqartartut

Ilulissani takornariartsiviit arfernik takornariartitsinermik ingerlataqartut ilaata Sermitsiamut paasissutissiinera naapertorlugu, arferit aallaaneqarsimallutik ikillit Ilulissat eqqaani takornartaanngillat.

- Arferit takugaangatsigit ikeqarnersut takuniarlugit qinnguteqqaartarpagut, ikeqaraangatalu orninneq ajorpagut, taamak ittut takornarissanut takutikkusunneq ajoratsigit, ukiuni arlalinni arfernik takornariartitsisartoq kinaassutsiminik isertuussisoq oqarpoq.

Arferit seqquusarneqartarnerat arfernik takornariartitsinermut akornusiisinnaasoq, unitsinneqartariaqartorlu taanna aamma isumaqarpoq. Taassuma kinaassusaa Sermitsiamiit ilisimaneqarpoq.

Aallaammik qimaasaarneqartartut

Arferit amerliartuinnartut, taakkulu angalasunut navialititsisarnerat annertusiartortoq, Ilulissani tapertaralugu piniartartoq Lars Nielsen oqarpoq.

- Ilulissaniik Oqaatsut tungaanut ingerlaarnermi arferit minnerpaamik 20-t missaanni takusinnaasarpagut, taamaattumik sissap tugaatigooraangama navialiumanaga arriitsumik ingerlasarpunga.

- Arferit amerlavallaalersimapput piniarneqarnerlu ajoramik nujuitsorujussuanngorsimallutik, pisassiissutillu amerlineqanngippata ajornartorsiut minnerulernavianngilaq, taanna oqarpoq.

Arferit qimaasaarniarlugit eqqaannut imaanut seqqortaartarluni Lars Nielsen oqarpoq. Arferillu aallaaneq ajorlugit taassuma erseqqissaatigaa.

Ilisimasaqanngitsut

Kalaallit Nunaani takornarissanut misigisassarsiortitsinernut assigiinngitsunut nittarsaassisarfimmi Visit Greenlandimi pisortap Anne Nivíka Grødemip oqarnera naapertorlugu, piaaraluni arfernut seqquusartoqartarnera pillugu Visit Greenland saaffigineqarnikuunngilaq.

- Kalaallit Nunaani nuna uumasullu takornarissat misigisassarsiortarnerannut pingaaruteqarluinnarput, tassanilu arfernik takornariartitsisarneq aamma ilaavoq. Inuit nuna uumasullu imminnut ataqatigiipput, tamatumalu ataqqeqatigiissumik akisussaassusilimmillu ingerlanissaa aamma pingaaruteqarpoq.

- Taamaattumik akisussaasseqarluni arfernik takornariartitsisarnissamut maleruagassat, takornariartitsisartunit tamanit malinneqarnissaat innersuussutigisarparput, taanna oqarpoq.

Unioqqutitsisoqarneranik ilisimannittoqarpat imaluunniit pasitsaassisoqarpat, soorlu arfernut seqqortaartoqarsimappat, tamatuma misissuiffigineqarnissaa siunertaralugu politiit pisortalluunniit tassunga attuumassusillit attavigineqarnissaat Visit Greenlandimit kaammattuutigineqarpoq.