Air Greenland nutaamik siulersuisuni siulittaasoqalerpoq
Malik Hegelund Olsen, 2019-imiilli Air Greenlandimi siulersuisunut ilaasortaasimasoq, Bodil Marie Damgaard taarserlugu siulersuisuni siulittaasunngorpoq.
Malik Hegelund Olsen Air Greenlandimi siulersuisunut ilaasortatut 2019-imi toqqarneqarami.
Toqqorsivimmit assi: Jørgen Schultz-Nielsen
Air Greenlandip ullumi ataatsimeersuarnerani siulersuisuni ilaasortat marluk taarserneqarput, siulersuisuni siulittaasup Bodil Marie Damgaardip nammineq pissuteqarluni siulittaasutut tunuarniarluni aalajangernerata kingorna.
Siulersuisunut siulittaasunngorlaaq Malik Hegelund Olsen Royal Greenland A/S-imi Corporate Sustainability Manageriuvoq, Ice Trawl Greenlandimilu siulersuisunut ilaasortaalluni. Ilisimatusarfimmi HD-O-tut ilinniagaqarsimavoq, Københavnimilu Ingeniørhøjskolemi tunisassiornermi ingeniøritut ilinniagaqarsimalluni.
Siulersuisunut ilaasortat marluk qinigaaqqinngillat
Siulersuisunut ilaasortat allat marluk Johannes Groth aamma Annette Grønkjær Lings siulersuisunut qinigaaqqinngillat, taakkulu Ella Grødemimit aamma Rob Gurneymit taarserneqarput.
Ella Grødem takornariartitsinermik nittarsaassinermillu suliaqarnermit piginnaaneqartuusoq, Rob Gurneylu nunani tamalaani timmisartuussisarnermik ineriartortitsinermik nittarsaassinermillu misilittagaqangaartoq, Hans Peter Poulsenip Naalakkersuisut sinnerlugit erseqqissarpaa.
Ukiuni kingullerni Bodil Marie Damgaard siulersuisunut siulittaasutut suliniuteqarluarsimanera pillugu Naalakkersuisup aamma qutsavigaa.
Navianartut nutaat
Mittarfiit nutaat Air Greenlandimut periarfissanik nutaanik aammali navianartorsiortitsinernik nutaanik pilersitsisinnaasut oqaatigineqarportaaq.
- Pissutsit ilungersunartut ukiuni makkunani Air Greenlandip atugai immikkuullarissuupput, timmisartortitseqatigiiffiullu oqaluttuarisaanerani allannguinerit annersaat ingerlanneqarput. Timmisartuminik nutarterinermut annertuumik Air Greenland aningaasaliisimavoq, tamatumalu saniatigut timmisartortitseqatigiiffiup isertitaqarnerpaaffia unammillerneqartalerpoq, Hans Peter Poulsen oqarpoq.
Ullumikkut Sermitsiami Bodil Marie Damgaardip apersorneqarnera saqqummersinneqassaaq, siulersuisunilu siulittaasutut sooq tunuarniarluni aalajangersimanerluni tassani nassuiarpaa.
