Air Greenlandip Arctic Umiaq Linemi ilaasartut tigusinnaassavai

Arctic Umiaq Linep siunissaa nalorninartoqarpoq. Naalakkersuisut 2025-p kingorna sinersorluni angallassinermi siunissami qanoq pisoqarsinnaaneranut nalunaarusiaani allassimasutut umiarsuaatileqatigiiffik atorunnaarsinneqassanersoq imaluunniit 450 millionit koruunit nalingannut inerisarneqassanersoq Inatsisartut aalajangiiffigissavaat.

- Arctic Umiaq Linep sullissinissamut isumaqatigiissutaa 2025 naappat atorunnaartussaq kingulliussasoq, kingornalu Arctic Umiaq Line atorunnaarsinneqassasoq politikerit toqqarsinnaavaat. Politikerillu angallasseriaaseq ataasiinnaq atussallugu toqqarpassuk Air Greenlandip Arctic Umiaq Linemi ilaasartut aamma angallassinnaassavai, pisortaq Taitsiannguaq Olsen aviisimi Sermitsiami sap. ak. 33-mi saqqummersumi oqarpoq.

Air Greenlandittaarlu suliassaq kivissinnaallugu uppernarsaavoq.

- Aap, sapinngilarput. Aamma Arctic Umiaq Linep angallattagai ilaassagaluarpata timmisartuussinnaareerpagut, Air Greenlandimi pisortaq Jacob Nitter Sørensen oqarpoq.

Air Greenland angallassinermini najugaqarfinnut pingasunut nutaanut, maanna Arctic Umiaq Linep angalatitsineranut ilaasunut, angalatitsisalissaguni annerusumik aningaasaliisariaqanngilaq. Mittarfeqarfiilli qulimiguullit mittarfiinik pitsanngorsaanissamik qulakkeerinnittussaassallunilu KNI Pilersuisoq qulimiguullip tikinnerani aallarneranilu isumaginninnissamut isumaqatigiissusiorfigisussaassavaa.

- Arctic Umiaq Linep ullumikkut angallassivianut tunngatillugu sumiiffiit ilaat Air Greenlandimit tikinneqarneq ajorput, tassaappullu Qeqertarsuatsiaat, Kangaamiut aamma Arsuk, taakku qanoq sullinneqarnissaaq paasiniarneqartussaassaaq, Jacob Nitter Sørensen oqarpoq, erseqqissarpaalu Mittarfeqarfiit Kalaallit Nunaanni mittarfiit heliportillu ulluinnarni aqutarigamikkit sumiiffinni pineqartuni pingasuusuni heliporteqarnissaq qulakkiissallugu akisussaaffigigaat, Air Greenlandilu qulimiguullit mittarfiinik isumaginninissamut KNI-Pilersuisoq isumaqatigiissuteqarfigissagaa.

Umiarsuarni ilaasartut timmisartut ilaasoqanngitsut immersinnaavaat

Angalasussat Arctic Umiaq Linep sinersortaataanut Sarfaq Ittummut ilaasussaagaluit Air Greenlandip nunatta iluani timmisartuussinerani issiaviit inoqanngitsut ullumikkut immersinnaavaat.

- Assersuutigalugu Narsarsuarmut marloriarluta timmisartuussigutta timmisartuussinerit ilaanni ilaasoqarpallaarnavianngilaq, timmisartuussinernilu taakkunani umiarsuartussaagaluit ilaasorisinnaavagut, Jacob Nitter Sørensen oqarpoq.

Arctic Umiaq Linep ilaasartui ukiup siulianut sanilliullugu affaannanngorsimapput, Air Greenlandimiillu, kisitsilinngikkaluarlugu, nunatta iluani ilaasartut amerleriarnerat malugisinnaavaat.

- Nunatta iluani timmisartuussineq siuariartorpoq, ingammik sumiiffinnut Arctic Umiaq Linep tikittagaanut, Jacob Nitter Sørensen oqarpoq.

Nunatta iluani timmisartuussinermi ilaasut ikilissasut

Air Greenlandip nunatta iluani timmisartuussinermi ilaasut ukiumut 200.000-it 250.000-illu missaanniittut ilaasorisarpai, mittarfittaalli ammarpata timmisartumi ilaasartut ikilissapput.

- Nuummi mittarfissuaq novembarimi ammarpat, ingammillu Ilulissani mittarfissuaq ammarpat, nunatta iluani angalasartut arlallit Nuummiit Ilulissaniillu toqqaannartumik angalasassammata annaassavagut. Arctic Umiaq Linelli angallattagaasa ilaasorinissaannut ullumikkut periarfissaqareerpugut, Jacob Nitter Sørensen oqarpoq.

Air Greenlandip sullissisinnaanini siunissami attatiinnartussaavaa, ilaasartulli ikiliartornerat ilutigalugu timmisartuussinerit ikilisissinnaassanngilai, taamaammallu Arctic Umiaq Linep ilaasartuisa tigunissaat Air Greenlandimut iluaqutaaginnassaaq.

- Maannamiit iluaqutaaneruliinnassaaq, tassami nunatta iluani timmisartuussinermi ilaasussat amigaatigilertussaavagut. Tuukkaq ullumikkut Danmarkiliassagaangat ulikkaarniarlugu Air Greenland Nuup Kangerlussuullu akornanni sisamariarluni timmisartuussisarpoq. Nuummiit Kangerlussuarmut Dash 8-mik timmisartuussinermi ilaasut Aasiannukartut Uummannamukartulluunniit aamma ilaasarput, taakkulu Atlantiku qulaallugu timmisartuussinissanit qulakkeerneqartarput. Atlantiku qulaallugu timmisartortueruppat Aasiaat, Uummannarlu suli tikissinnaasussaallugillu naammaginartunik ilaasoqarsinnaasariaqarpugut, Jacob Nitter Sørensen oqarpoq, aammattaarlu Air Greenland Nuummi Ilulissanilu mittarfissuartaanut piareersarlunilu ilaasut kujataaneersut, avannaaneersut Tunumeersullu nunatta iluani Europamilu tikitassaminnut ullup ataatsip iluani timmisartuunneqarsinnaanissaat qulakkeerniarlugu timmisartuussinissanik pitsaanerusumik pilersaarusiortoq nassuiaavoq.

Illersornissaqarfimmut sullissisinnaanernik tuniniaaneq

Air Greenland mittarfissuit ammarpata nunattalu iluani timmisartuussinermi ilaasartut ikilippata nutaanik niueruteqarnissaminik misissuivoq.

- Issittumi sullissinissamut pilersaarummi allassimasutut illersornissaqarfimmut sullissisinnaanissatsinnik tunisisinnaalluta neriuutigaarput. Iqalunnut timmisartuussisarneq aallartipparput, matumanilu Nuup Iqaluillu akornanni timmisartuussinerusalerniassagatta ingerlallualernissaa neriuutiginarpoq. Maanna angallaffiummat attartorlutalu timmisartuussisinnaavallaannginnatta ilungersorpugut. Tamannattaaq siunissami periarfissaalissaaq, Jacob Nitter Sørensen oqarpoq.

Kalaallit Nunaat angallasseriaatsimut ataatsimut marlunnulluunniit akissaqarnersoq innuttaasut politikerillu aalajangigassarigaat taanna isumaqarpoq.