18 millionit koruunit. Nunatsinni ingerlatseqatigiinni akunnittarfiutilinni annerpaaq, Hotel Hans Egede A/S, Nuummiittoq 2023-mi akileraareernermi sinneqartooruteqarpoq.
Taamaalilluni akunnittarfiutillip Helge Tangip ingerlatseqatigiiffia akunnittarfinnik Hotel Hans Egedemik HHE Expressimillu ingerlatsisuusoq ukiup aappassaa annertuumik sinneqartooruteqarpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
18 millionit koruunit. Nunatsinni ingerlatseqatigiinni akunnittarfiutilinni annerpaaq, Hotel Hans Egede A/S, Nuummiittoq 2023-mi akileraareernermi sinneqartooruteqarpoq.
Taamaalilluni akunnittarfiutillip Helge Tangip ingerlatseqatigiiffia akunnittarfinnik Hotel Hans Egedemik HHE Expressimillu ingerlatsisuusoq ukiup aappassaa annertuumik sinneqartooruteqarpoq.
2022-mi angusat 2023-mi angusaniit annertunerulaarput, tassami 20 millionit koruuninik sinneqartooruteqarpoq. Taamaalilluni ingerlatseqatigiiffimmi akunnittarfiutilimmi sinneqartoorutit aatsaat taama annertutigaat. 2023-mi naatsorsuutit qanittumi saqqummiunneqarput.
Nunatsinni akunnittarfiit annersaasa tullia, Hotel Arctic Ilulissaniittoq, sanilliukkaanni siorna ajortorujussuarmik angusaqarpoq. Taamaallaat 565.000 koruuninik sinneqartooruteqarpoq. Piginnittut Air Greenland peqqutissaqarluarlutik naammaginninngillat, naatsorsuutini allassimavoq.
Aqutsisut: – Naatsorsuutigisamiit annertuneruvoq
Hotel Hans Egede A/S-imi aqutsisut, siulittaasoq Helge Tang pisortaanerlu Jørgen Bay-Kastrupilu siuttoralugit, siorna angusat naammaginartutut nalilerpaat. Naatsorsuutigisamiit annertunerungaatsiarput, aqutsisut ilaatigut naatsorsuutinut oqaaseqaatini allapput.
– Tamanna pingaarnertut coronap kingorna pisunit sunniutaavoq, matumani ataatsimeersuarnerit, pisoqartitsinerit aaqqissuussarpassuillu 2020-mi 2021-milu taamaatiinnarneqartut naatsorsuutigisatut 2022-mi taamaallaat ingerlanneqarnatik 2023-mi aamma ingerlanneqarput.
– 2024-mi taamatulli ingerlasoqarnissaa naatsorsuutiginngilarput, akileraannginnermili angusat 15-20 millionit koruuniunissaat naatsorsuutigaarput. 2024-mi akunnittarfinni ininik inniminniisimasut maanna 2023-mi inniminniisimasunit ikinnerupput, ataatsimeersuartitsisarnerilli patajaapput. Nutaamik mittarfittaarnerup kingorna 2024-mi ingerlatassat ilaat timmisartornermut billetsinik akikinnerusunik pissarsinissamut neriuuteqarluni 2025-mut kinguartinneqaratarsinnaapput, aqutsisut 2023-mi naatsorsuutini allapput.
Naatsorsuutit ingerlatseqatigiiffiup maajip 17-iani ataatsimeersuarnerani akuerineqarlutillu juunip 26-ani saqqummiunneqarput.
Hotel Hans Egede A/S-ip akunnittarfiit marluk Polarbo ApS-imit, Helge Tangimiit Bolette Juhlimiillu, Carl Juhlip uillarneranit, pigineqartumit attartorneqarput. Taakku Polarbo avillugu pigivaat.
Kalaallit Nunaannit akunnittarfiit annersaat
Hotel Hans Egede 156-inik ineeraqartoq, marlunnik neriniartarfeqartoq, imerniartarfeqartoq 20-nillu initalimmik ataatsimiittarfeqartoq Kalaallit Nunaanni akunnittarfiit annersaraat. Akunnittarfik sisamanik ulloriaqarpoq, ataatsimiittarfillu, HHE Conference & Events, tallimanik ulloriaqarpoq.
Aammattaaq ingerlatsiviup Hotel Hans Egede A/S illuut Nuummi Samuel Kleinschmidtvej 15-imiittoq HC Ejendomme A/S-imiit, akunnittarfiutilimmiit Helge Tangimiit Bolette Juhlimiillu pigineqartoq, attartorpaat. Tassani init inissiatut akunnittarfittut pisatsersoriikkatut utaqqiisaasumillu inigisatut Nuuk Hotel Apartments by HHE-mik taaguuteqartinneqarlutik attartortinneqartarput.
