Biilit qimaannakkat kommunimut akisupput

Takusartakkat nalinginnaangaaramik malugineqarnerluunniit ajungajapput. Biilit nummerpladeqanngitsut qimatat ilaatigut igalaavi sequminneqarsimasut, issiavii alittorsimasut assakaasuilu qaarnikut. 

Sermitsiami assiliisoq marlunngornerit ilaanni ullororiartortoq Nuummi kaajallaapallakkami biilit 32-it qimaannakkat takuai. Biilerpassuupput, innuttaasunullu, iggavimmi igalaaminniit itsuanisaarnerminni illoqarfimmiluunniit pisunnerminni takunnittussanut, ajoqutaapput. Aamma meeqqanut, biilini pinnguarsinnaasunut ulorianaratarsinnaallutillu biiliniit uulia, orsussaq nillusaalluunniit kuuppat avatangiisinut ulorianaratarsinnaapput.

Akileraartartut akilertarpaat 

Aammattaaq kommunimut akisupput. Kommunimmi biilit umiatsiallu qimaannakkat inuttassarsiortaraluarai, akiliisitsiniarneq ajornakusoortarpoq. 

Biilit umiatsiallu qimaannakkat avatangiisinut ulorianarunnaarsarneri iginnerilu Kommuneqarfik Sermersuumiit 2023-mi 700.000 koruuninik aningaasartuutigineqarput, Nakkutilliinermik oqartussat Sermitsiamut ilisimatitsipput. Kommunip aningaasartuutit containereqarfimmiit isertitanik matussusertarpai. Naggataagulli akileraartartut akiligassamut akiliisuusarput. Nakkutilliinermik oqartussat Kommuneqarfik Sermersuumi Sanaartornermut Avatangiisinullu Aqutsisoqarfiup ataani immikkoortortaavoq, taassumalu qamutit assakaasullit pigisallu allat akuersissuteqaratik illoqarfimmi uninngatinneqartut piginnittussarsiornissaat akisussaffigaat. 

Piginnittuusut nassaarinissaat unammillernartoq 

Biilit nummerpladeqanngitsut qimaannarneqarsimasut aqutsisoqarfiup paasiguniuk siullertut inatsisit naapertorlugit qaammatini pingasuni piginnittussarsiussavai, tamannalu kommunip nittartakkamini ujaasinermut qupperneratigut ingerlanneqartarpoq.

Kommunip qamutinik piginnittoq qaammatit pingasut iluanni nassaarisimanngikkunillu qamutit assakaasullit avatangiisinut ulorianarunnaarsarlugillu igissinnaanngortarpaat.

”Kommunimiit Politiit motorillit pillugit allaffiat aqqutigalugu piginnittutut nalunaarsorsimasoq kingulleq ujarneqartarpoq. Taava piginnittutut nalunaarsorsimasoq kingulleq avatangiisinut ulorianarunnaarsaanermut akiligassamik nassinneqartarpoq. Qamutit assakaasullit ilaasa nalunaarsuutaat qamutimi nassaarineqarsinnaaneq ajormat tamanna amerlasuutigut unammillernarsinnaavoq. Piginnittorlu nassaarineqarsinnaanngikkaangat aningaasartuut kommunimiit akilerneqartarpoq.”, Nakkutilliinermik oqartussat allapput.

Innuttaasut naammagittaalliutaat 

Nakkutilliinermik oqartussat maanna qamutit 69-it piginnittui ujarlugit ilisimatitsipput, kisitsisillu motoorinut akitsuutit kingusinaarluni akilerneqarsimappata qaffassapput, kingornalu nummerpladi peerneqassaaq. Politiit akiitsuserinermullu oqartussat motoorimut akitsuut akilerneqarsimanngikkaangat nummerpladinik peersisuusarput.

Nakkutilliinermik oqartussat biilit umiatsiallu qimata amerlanertigut nammineerlutik nalunaarsortarpaat, innuttaasulli aamma biili umiatsiarluunniit naleqqutinngitsumik qimaannarneqarsimasoq pillugu naammagittaalliorniarlutik saaffiginnittarput. 

”Qamutit assakaasullit nummerpladeqanngitsut aqqusinermi angallannermut aamma/imaluunniit aputaajaanermut ajoqutaappata kommunip qamutit assakaasullit piginnittussarsiornerup nalaani aqutsisoqarfiup mattussisarfiani paarnaaqqasumi uninngatissinnaavai. Qamutit assakaasullit database atorlugu piginnittussarsiorneqartarput, piginnittullu piginnittuunerminnik nalunaaruteqarnissaminnut periarfissaqarput. Tamannattaaq piginnittup kommunimut saaffiginneqquneqarnera pillugu qamutini assakaasulinni ersarissumik allagartaliinikkut aamma pisarpoq”, Nakkutilliinermik oqartussat allapput.

Motoorimut akitsuut akisooq 

Kommunalbestyrelsemi ilaasortap, Kommuneqarfik Sermersuumi borgmesterip tulliata, Justus Hansenip (D) biilit qimaannagarpassuit ajornartorsiutaanerat eqqumaffiginerarpaa, imaaliallaannarneqarsinnaanngitsorli erseqqissarpaa. 

– Biilinik piginnittorpassuit ukiup affakkaartumik motoorinut akitsuut akissaqartinngilaat, akiliinngippatalu politiit aggerlutik nummerpladit tigussavaat. Biilinik piginnittut akissaqaleqqikkuni motoorit pillugit allaffimmut pladit aassavaat, taamaalillutik biilerpassuit qimaannagaanngillat. Biilit ipladeqanngitsut ilaat angillutillu oqimaakkamik akitsuutaat akisuvoq, tamanna biilerpassuit sumi tamaaniinnerannut ilaatigut peqqutaavoq.

Biiliutilinnut akeqanngitsoq 

Justus Hansen aaqqiissutissaqanngilaq, kisiannili biiliutillit biilitoqqaminnik igitsiniarunik imerpalasut, orsussaq batteerillu biiliniit peeriarlugit akeqanngitsumik kommunimut tunniussinnaanissaat periarfissatut tikkuarpaa. 

– Inuit nammineq atuinertik pillugu akisussaaneroqqullugit kajumissaarumavakka. Biilisisimagaanni aammattaaq ukiumoortumik akitsuutit akilertarnissaat akisussaaffigineqarpoq, biililu ingerlasinnaajunnaarsimappat eqqortumik iginnissaa aamma akisussaaffigineqarpoq. Biilerpassuit qimaannakkat illoqarfitsinnut takussunaqutaanermik saniatigut kommunip aningaasaqarneranut ajoqutaangaatsiarput. 700.000 koruunit uagut kommunitsitut ittumut aningaasarpassuupput, aningaasallu taakku pitsaanerungaatsiartumik atorneqarsinnaagaluarput, Justus Hansen oqarpoq.