MOTOORI
Eqalugalinnguani aqqusinniorneq isornartorsiorneqartoq
Eqalugalinnguani aqqusinniorneq nipiliorfioqisoq, eqqaani najugaqartunut nipiliorfiunera akornutaaneralu, inissiani najugallit peqatigiiffiisa ilaasa iluarinngilaat. Tamatuma saniatigut tusarniaasoqarsimannginnera, innuttaasut ilaasa tupigusuutigaat. Kommunip isornartorsiuineq itigartippaa.
Kommuneqarfik Sermersooq Eqalugalinnguani trafiklysinik pilersitsileruttorpoq. Suliaq 2026-mi aggustip tungaanut suliarineqassaaq, tamannalu pissutigalugu innuttaasut ilaat naammagittaalliorput. Ullaaralaakkut unnukkullu kingusissukkut aamma sapaatip akunnerisa naaneranni nipiliortoqarpallaartartoq isumaqarput.
Assi: Oline I. Olsen
Kommuneqarfik
Sermersooq, Nukissiorfiit aamma Tusass peqatigalugit Eqalugalinnguani
aqqusinermi angallaffiusumi, siornatigut nermallattarfiusimasumi, aqqusernit
naapiffiini trafiklysimik pilersitsiniarlutik suliaqartitsileruttorput.
Sanaartornermut Avatangiisinullu Ingerlatsivimmi aqqusinikkut angallannermik pilersaarusiortup oqaatigaa, ullaakkut unnukkullu kingusissukkut arfininngornermilu aqqusinikkut angallattoqannginnerunerunerani sulisoqartariaqartartoq.
Assi: Oline I. Olsen
Suliarli
eqqaani najugaqartunit isornartorsiorneqarpoq, taakkua ullaaralaamit unnuk
kingusissoq ilanngullugu sapaatillu-akunnerisa naaneranni, qillerinerit
qaartiterinerillu nipiliorfiusorujussuusartut maluginiarsimavaat.
Aqqusinniorneq eqqaani najugalinnut tusarniaassutigineqarsimanngimmat,
innuttaasut ilaasa aamma tupigusuutigaat.
Qitiusumi biilit siuleriiaattarfiat
Emil Skat
Vejleskov, Sanarfinermut Avatangiisinullu Ingerlatsivimmi aqqusinikkut
angallannernik pilersaarusiortoq, sanaartorneq ingerlanneqartoq illoqarfimmi
aqquserngit angallaffiunerpaat ilaanni aqqusineq biilit siuleriaaffigisaraat
nassuiaatigaa:
–
Trafiklysit nutaat aqqusinikkut angallannermi biilertunut pitsaanerusumik
atugassaqartitsissapput, tamaani pisuinnartartorpassuit
toqqissisimanarnerusumik aqqutissaqalissallutik – aamma atuarfimmut
meeqqerivinnullu – bussinullu immikkut aqquteqalissalluni. Aqqusineq
angallaffiulluartuummat, ingerlatsivimmit suliap piaarnerpaamik
naammassineqarnissaa anguniarneqarpoq aamma biilinik angallattunut
pisuinnarnullu akornutaanissaa minnerpaaffianiitinniarneqarluni.
Pinnguartarfik nutaaq
Emil Skat
Vejleskovip oqaatigaa, aqquserngit trafiklysilersornissaannut atatillugu
eqqaani najugaqartunut immikkut tusarniaasoqarsimanngitsoq.
–
Taarsiullugu tatsip Annersuup eqqaani meeqqanut pinnguartarfimmik nutaamik
pilersitsinissaq pillugu eqqaamiunut tusarniaanerit ingerlanneqarput, tassa
meeqqeriviup Annersuup silataata ilaata aqqusernup allilerneqarnissaanut
atorneqarneranut taartaasussamik, taama
ilisimatitsivoq.
Meeqqerivik
Annersuaq 64-inik meerartalik, trafiklysit pilersinneqartussat saninnguanni
inissisimavoq.
Trafiklysinik sanaartornermut atatillugu eqqaamiut immikkut tusarniaaffigineqarsimanngitsut, kommunip uppernarsarpaa. Taamaattorli, aqquserngit allilerneqarnerannut atatillugu meeqqeriviup Annersuup silataata ilaanik atuinermut taartaasumik, pinnguartarfimmik nutaamik pilersitsisoqarnissaa pillugu sanilinik tusarniaasoqaleruttorpoq.
Assi: Oscar Scott Carl
Angallattoqannginnerpaaffiani sulisoqartartoq
Ullaaralaamit
unnuk kingusissoq ilanngullugu aamma sapaatip akunnerata naanerani aqqusinermi
sulisoqartarneranik isornartorsiuinermut tunngatillugu Emil Skat Vejleskovip
oqaatigaa, ullup unnuallu ingerlanerani piffissani angallaffiunnginnerusuni,
sulisoqarnissaa anguniarneqarnerusartoq.
- Sulinerup
aaqqissuunnerani aqqusinikkut angallannermut akornusersuinissaq
minnerpaaffianiitinniarlugu, piffissani angallaffiunnginnerusuni
sulisoqartarpoq.
Taamaattumillu isumannaallisaaneq eqqarsaatigalugu suliassat ilaat
unnulaalersukkut imaluunniit sapaatip akunnerata naanerani suliarineqartarput,
Emil Skat Vejleskov paasissutissiivoq nangillunilu oqaatigalugu
arfininngornikkut nalunaaqutaq 07.30-mit 14.00-ip tungaanut sulisoqartartoq
sapaatikkullu taamaallaat qaqutiguinnaq sulisoqartarluni.
Nuuk
Entreprenøren suliassami pingaarnertut sanaartortuuvoq. Tamatuma saniatigut
Brøndum aamma FJ-EL ledninginik suliaqarput. Suliaq tassaavoq aqqusernup
silinnerulersinneqarnissaa, sanguniartunut inissaqartitsilerluni. Tamakku
saniatigut imermut ruujorit, innaallagissamut attaveqaatinullu ledningit
nuunneqartariaqarput. Assaanerup qaartiterisoqarneratalu nalaani, betonginik
biilinut assiaqusersuutinik inissiisoqartarpoq.
