Inatsisit nutaat inuussutissarsiutilinnut sunniuteqartut: Aasianni suliffeqarfiutillit siunissaq ernummatigaat
Inatsisit suliffeqarfinni ernumassutigineqarput, taakkulu suliniutitik unitsittariaqarsimavaat. – Illoqarfimmut tamarmi sunniuteqarpoq, KJ Aasianni pisortaq oqarpoq.
KJ Aasiaat illoqarfimmi ilinniartut inaannik ilaatigut sanaartornikuuvoq. KJ Aasiaat A/S qatanngutigiinnit Karl aamma Jens Jensenimit pigineqarpoq.
Assilisaq pigisaq
Aalisarnermut
takornariaqarnermullu inatsisit nutaat Inatsisartuni, innuttaasuni,
tusagassiuutini inuussutissarsiortullu akornanni piffissami kingullermi
oqallisigineqartorujussuupput.
Sanaartornermik
ingerlatsivimmi KJ Aasianni inatsisissatut siunnersuutit
nalorninartorsiortitsilernerat malugineqareerpoq. Suliniutit arlallit
suliffeqarfiup unitsikkai KJ Aasianni pisortaq Jens Jensen oqarpoq, ilaatigut
Polar Seafoodip aalisakkanik suliffissuanut Polar Raajamut qerititsivik 4000
m2-nik angissusilik Aasiannilu Hotel SØMA-mut alliliineq 50 millionit koruunit
missaannik nalilik unitsinneqarluni.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
-
Tamanna Aasianni tamarmi maannakkut eqqumaffigineqarpoq. Polar Raajat Hotel
SØMALu Aasianni aningaasaliiniarunnaarmata illoqarfimmut tamarmut
sunniuteqangaarpoq, Jens Jensen oqarpoq.
Aalisarnermut
inatsit nutaaq atuutilerpat Aasianni tunisassiorfik ukiut pingasut qaangiuppata
matusariaqartoq Polar Seafoodip siusinnerusukkut nalunaarutiginikuuaa. Inatsit
nutaaq malillugu sinerissap qanittuani aalisartunut pisassiissutit
ikilissapput, taamaalillunilu Polar Seafood ikinnerusunik
pisassinneqartalerneranik kinguneqassalluni.
-
Aasiannut sunniuteqartorujussuussaaq. Polar Seafood Greenlandip 150 millionit
koruunit sinnerlugit nalillit Aasiannut ukiumut tulaassortarpai. Kaaviiaartitat
taakku qanoq pineqassanersut ilisimaneqanngilaq, Polar Seafood tusagassiuutinut
nalunaarummi allappoq.
Minnerulernissaat aarlerinartoq
KJ
Aasiaat sulisunut inissianik 20-nik sanaartornissamut piariilertoraluarpoq.
Aningaasaliissutit unitsinneqarnerat pissutigalugu suliniutit tamarmik
unitsinneqartut Jens Jensen oqarpoq.
- Suliffeqarfinnut Aasiannilu innuttaasunut tamanut sunniuteqarpoq. Ukiut pingasut sioqqullugit suliassat ilinniartullu amerlassusaat, aamma suliassat naammannersut naatsorsoreersinnaasaraluarparput. Maannali ajornakusoorpoq, KJ Aasianni pisortaq Jens Jensen oqarpoq.
Assilisaq pigisaq
-
Tamanna SØMA-mut eqquereerpoq. Akigitinneqartussat tunniutereerpavut
akunnittarfimmillu alliliinissamut isumaqatigiissut naammassingajalerlugu,
tamannali unitsinneqarallarpoq. Naluarpullu qanoq sivisutigissanersoq, -
Suliarujussuugaluarpoq piviusunngortinnissaanut qilanaarisaraluarput, Jens
Jensen oqarpoq.
Aasianni
sanaartornermik ingerlatsivimmik anginerusumik suli pisariaqartitsisoqarnersoq
imaluunniit kiffartuussinermik ingerlatsivimmut mikinerusumut
ingerlatsilissanerlutik KJ Aasiaat aamma Jens Jensen maannakkut
eqqarsaatersuutigaat. Tamanna uggornartoq pisortaq oqarpoq. Aasiaat KJ
Greenlandimi ilinniartuuteqarluartarpoq illoqarfimmilu ukiuni 28-ni
sanaartortartuulluni.
-
Suliffeqarfinnut Aasiannilu innuttaasunut tamanut sunniuteqarpoq. Ukiut
pingasut sioqqullugit suliassat ilinniartullu amerlassusaat, aamma suliassat
naammannersut naatsorsoreersinnaasaraluarparput. Maannali ajornakusoorpoq.
Sulisut 100-niit 20-nut
KJ
Aasiaat Aasianni eqqaanilu 100-t missaannik sulisoqarpoq. KJ Aasiaat
minnerulerluni kiffartuussinermik ingerlatsisunngussagaluarunik sulisut 20-nut
ikileriassasut Jens Jensenip siulittuutigaa. Illoqarfimmi kiffartuussinermik
ingerlatsiviit allat aamma piummata.
-
Tamanna ilinniartuutigisinnaasatta amerlassusaannut aamma sunniuteqassaaq.
Suliffissarsiorlutik nuuttassappat? Jens Jensen aperivoq.
KJ
Aasianni inersimasut ruujorilerisunngorniartut, sanasunngorniartut,
betoniliornermik allanillu suliaqarnermik ilinniagaqartut aqqaneq-marluk
missaat ukiumut sulisorisarpaat.
-
Aammattaaq ilaqutariit 100-t akisussaaffigalugit misigivugut, Jens Jensen
oqarpoq.
KJ
Aasiaat minnerulissagaluarpata Jens Jensen ilaquttanilu illoqarfimmit
nuuttariaqalernerannik kinguneqassaaq.
-
Ajuusaarnassaaq. Qanigisaqarpugut illoqarfimmullu matumunnga
attaveqaateqarluni, inuunerli taamaappoq.
Pisimasut eqqaamaneqartut
Inatsisit
suli nalorninartillugit allannguutissarpassuit eqqoriarnissaat
siusippallaanngila?
-
Aap, suli siusippoq. Kisianni siunissaq taama nalorninartigisoq
aningaasaliisoqartannginnera nalinginnaavoq. Nammineq illuliornerit aamma
taamaapput, inuit nalugamikku tuniniaqqissinnaanerlugu.
-
Inuit siunissaq ernummatigaat, Jens Jensen erseqqissaavoq.
Jens
Jensen Aasianni aalisakkerivik 2005-imi matuneqarmat illoqarfimmi najugaqarpoq.
Taannalu ernumaneq pissutissaqarluartoq isumaqarpoq, tassami aalisakkerivik
taamani matummat "maani soqarsinnaanngitsutut" misinnarmat.
-
Pissutsit ilungersunarput, suullu tamarmik ingerlalluanngillat. Suliffissuaq
matuneqaraangat taxartartut, neriniartarfiit umiarsualiviullu suliai tamarmik
sunnerneqartarput. Suliffissat piuneerukkaangata illoqarfik
allanngorujussuartarpoq.
Namminersorlutik
Oqartussat Aasianni suliffeqarfinnut allanik nutaanik suliniuteqassasut Jens
Jensenip neriuutigaa. Aasianni suliffissuaq matuneqannginnissaa
qulakkeerniarlugu Inatsisartuni amerlanerussuteqartut Naalakkersuisut
pisussaaffilerpaat. Inuit Ataqatigiit, Siumumik naalakkersuisoqatigiit,
Facebookimi taama allapput.
Suliniutit arlallit kinguartinneqartut
Aasianni
suliffeqarfik alla aamma allannguisariaqartoq tassaavoq Qalut VÓNIN. Aasianni nutaamik sanaartornissartik kinguartippaat,
aalisarnermut inatsisip nutaap atuutilerneratigut Aasianni tunisassiorfik
matussammat. Facebookimi quppernerminni taama allapput.
- Taassumallu
kingunerissuaa atorfiit tallimat annaaneqassammata. Soorunami
ajuusaarutingaarput taamatut iliortariaqalersimanerput, Qaluleriveqarnerput
Aasianni iluarisimaaqisarput diskobugtemi Qaluleriveqarnerput pitsaanerpaamik
inissisimasoq, Qalut VÓNIN allappoq.
Aalisarnermut inatsit nutaaq sapaatip akunnera kingulleq akuersissutigineqartup
kingunissaa eqqarsaatigilluaqqullugit Naalakkersuisut aamma kajumissaarlugit
allataminni allapput.
Aalisarnermut
inatsisissatut siunnersuut sisamanngornermi unnukkut 21-nit akuerineqarluni
quliniillu akerlerineqarluni akuersissutigineqarpoq. Partiit Naleraq,
Demokraatit aamma Atassut akerliullutik taasisipput.