Vivian Motzfeldt Demokraatinut ilaasortanngortoq

Vivian Motzfeldt Demokraatinut ilaasortanngorpoq. Tamanna inuttaata Facebookkimi quppernermini nalunaarutigaa.

- Matumuuna nalunaarutigissavara ulloq manna aallarnerfigalugu Demokraatinut ilaasortanngorama, taanna allappoq.

Nunanut allanut tunngasunut naalakkersuisuusimasup Demokraatinut ilaasortanngornini nammineerluni ima tunngavilersorpaa: 

- Naleqartitat politikkimi sulinermi ilissinni takusakka peqataaffigissavakka.

Siumumit attaviitsunngortoq

Vivian Motzfeldt politikkimi misilittagartuujuvoq. Naalakkersuisunut ilaasortaanermik Inatsisartunullu siulittaasuunermik misilittagaqarpoq. Vivian Motzfeldt Siumumit attaviitsunngorluni ukioq manna marsip 18-anni nalunaarpoq. Siumup naalakkersuisoqatigiinnit aninera isumaqatiginagu akerlerigamiuk partii ukiut 20-it sinnerlugit suleqatigisimasani tunullugu taamani nassuiaavoq.

Naalakkersuisuujunnaartoq

Vivian Motzfeldt Siumut naalakkersuisoqatigiinnit tunuarmat naalakkersuisuujunnaarpoq. Inatsisartut upernaaq manna ataatsimiinnerat aallartimmat naalakkersuisut nutaat toqqarneqarput. Vivian Motzfeldt taakkununnga akuunngilaq. Vivian Motzfeldt Inatsisartut siulittaasuannut, attaviitsumut, Kim Kielsenimut, sinniisussaavoq.