Amerikamiu uissuummisitsisoq aana: - Kalaallit periarfissamik tuniniarsaraakka
Sermitsiap Clifford Stanley, nammineq oqarneratut nammineerluni neqerooruteqarniarluni Kalaallit Nunaanniittoq, naapippaa. Aallartinneqarsimannginnerarpoq nammineerlunili isumaqatigiissuteqarsinnaasutut iliuuseqarnerarluni.
Clifford Edward Stanley misissuiartorluni Nuummiilluni Sermitsiamut oqarpoq.
Assi: Oscar Scott Carl
Amerikamiu Clifford Stanley Kalaallit Nunaata USA-p ataaniilersinnaaneranut tapersersuisut qanoq amerlatiginersut paasiniarlugu atsiornernik katersiartorluni Nuummiippoq.
Amerikamiup iliuusia ulluni kingullerni maluginiarneqartorujussuuvoq.
Nammineerluni inuit ikiorniarlugit suliniuteqartarluni Sermitsiamit apersorneqarnermini oqarpoq.
- Kalaallit periarfissamik tuniniarsaraakka. Inuit namminneq aalajangertussaavaat. Uanga aalajangissanngilara, taakkua aalajangiisuussapput, 86-inik ukiulik Clifford Stanley Sermitsiamut oqarpoq.
Cliffordip Kalaallit Nunaanni innuttaasut tamarmik immikkut 200.000 dollarinnassinnaasut siunnersuutigaa, aningaasallu oqartussaasunit attorneqarsinnaassanatik. Aningaasat USA-minngaanneersuussapput, oqarpoq.
Ilaat soqutiginnipput — allat sioorasaarisut
Misissuinerminiit paasisani ataatsimut katersorniarlugit nassuiaavoq, misissuinermilu inerneri Kalaallit Nunaanni USA-milu, aamma politiinut, ilisimatusarfinnut kalaallinullu tunniunniarlugit.
Clifford Stanley naapertorlugu Kalaallit Nunaanni inuit marluk pingasulluunniit suliniutiminik soqutiginnittut naapissimavai, arlallilli aamma naveersimavaat sioorasaarneqartutut misigitillugu.
Clifford Stanleyp siornatigut isumasiuinerit innersuussutigai, tassani amerlanerussuteqarluartut USA-mut ilanngunnissaminnut itigartitsinikuullutik:
- Taanna allanngortillugu 85 procentit akuersitikkusuppakka, oqarpoq.
Clifford Stanley Kalaallit Nunaanni inunnut tamanut aningaasarpassuarnik tunissuteqarniarneq pillugu nammineq aningaasat paarinagit oqarpoq. USA-minngaanneersuuppulli, nammineq tuniniaasutut inissisimalluni. Taanna kalaallinit naammattunik amerlassusilinnit aamma amerikamiut naalagaaffiannit akuerineqassaguni isumaqatigiissuteqarsinnaalluni.
Stanley: Kanngunartuliunngilanga
Donald Trumpip Kangiani qiterlermi iligisat aningaasaatilissuit isumaqatigiissuteqarsinnaanerup piviusunngortinnissaanut aningaasaliisinnaanersut aperisinnaagai Stanley isumaqarpoq.
Naalakkersuisut siulittaasuata Jens-Frederik Nielsenip (D) Clofford Stanleyip Nuummi angalaarluni Kalaallit Nunaata USA-p ataaniilernissaanut innuttaasut atsiortut ukiumi nutaani 200.000 dollarinik akissarsitinnissaanik neqeroornera sisamanngornermi sakkortuumik isornartorsiorpaa.
Jens-Frederik Nielsenip Clifford Stanleyip pissusilersuutai kanngunartutut taavai.
Taamaannginnerarporli:
- Taamaattuunngilanga, oqarpoq.
