Naviair: Nuummi timmisartunik aqutsinermut aaqqiissut qallivoq
Timmisartumik aqutsineq Nuup mittarfiani killilersuinermut oqilisaataassaaq. TMA-mik taaneqartartumik aaqqiissut, tassa timmisartumik angallannermi marloqiusamik aqutsineq, pilersaarutit naapertorlugit sisamanngornermi ullaakkut aallartinneqassaaq.
Timmisartumik angallattoqaraluttuinnarnera timmisartuutileqatigiiffiillu allat tikittalernerat Nuummi mittarfimmi pisinnaasanut unammillernarpoq.
Assi: Oscar Scott Carl
Naalagaaffiup ingerlatseqatigiiffiutaa Naviair Greenland Airportsilu sisamanngornermut maajip 14-iannut qilanaarput. Mittarfik pilersaarutit malillugit pingaarutilimmik nutaamik sisamanngorpat aallartitsissaaq. Timmisartunik angallannermik aqutsinermut tunngassuteqarpoq.
- Maanna TMA-p ammarneqarnissaa qanilliartupiloorpoq, Naviair tallimanngormat tusagassiutitigut nalunaarummi allappoq.
Timmisartut qanoq akulikitsigisumik missinnaanersut qanorlu akulikitsigisumik aallarsinnaanersut pillugit angallannermut aqutsisoqarfik siorna ukiakkut nutaamik killilersuivoq.
Tamatuma kingorna timmisartunik angallannermi aqutsinerup TMA-mik taaneqartartup atulersinneqarnissaa aallartinneqarpoq. Timmisartunik angallannermi aqutsineq Nuummi pisinnaasanut annertuumik iluaqutaassasoq naatsorsuutigineqarpoq.
TMA tassaavoq Terminal Maneuvering Area, tassami mittarfimmi ingeraarfinnik aqutsiffik. Taaanna Nuup silaannaani appasinnerpaamiippoq (6 kilometerit missaannik qutsitsigisumi). Tassani timmisartunik angallanermi aqutsisut mittarfiup nal. 6.00-imiit 21.00-imut ammanerani timmisartunik aqutsisassapput.
Silaannaq ullumikkut nakkutigineqanngimmat timmisartortartut imminnut apunnginnissaq namminneq akisussaaffigaat.
– Aqutsivik Nuuk Approach-imik taaguuteqassaaq, tamatumalu TMA-mi timmisartunik nakkutilliisoqarfik tassaasoq tikiffissanik aallaffinnillu nakkutilliissasoq – tassa timmisartunik nakkutilliisoqarfik Nuummi mittarfimmik tikiffiusunik aallaffiusunillu nakkutilliisassasoq takutippaa.
Timmisartumik angallannermik aqutsisut AFIS-illu
Nuummi timmisartortartunut paasissutissiisartunik AFIS-inik suli atuisoqassaaq, taakkulu timmisartunik mittarfimmut minniartunik ilitsersuisassapput.
– Timmisartut mikkaangamik Nuummi mittarfimmi AFIS-imut ingerlateqqinneqartassapput, timmisartullu aallartut Nuuk AFIS-imit (Greenland Airports) Nuuk Approach-imut (Naviair) ingerlateqqinneqartassapput.
AFIS-ip timmisartunillu angallanermik aqutsinerup (ATC) assigiinngissutaat tassaavoq AFIS-imit timmisartunut paasissutissiisarneq, timmisartunillu angallannermik aqutsisunermi aqutsisoqartarnera. Nuummi taakku ataatsimoortillugit allatukanneq aaqqiisoqarpoq. Norgemi tamatumunnga assingusumik aamma atuisoqarpoq.
Aaqqiissut nutaaq atuutilersinnaassappat Angallannermut Aqutsisoqarfiup atortussaq nutaaq atuutilerfissaa nallertinnagu akuerisariaqarpaa.
