Inuusuttut pingasut Qeqertarsuarmi takornarianik angallassivimmik pilersitsipput

Qeqertarsuarmi takornarianik angallassivik Disko Adventures inuusuttuniit pingasunit ingerlanneqartoq qimussernermik, qamuteralannermik, pisuttuarnermik qimmilerinermillu neqerooruteqartarput, suliffeqarfillu siorna marsimi aallartippoq.

- Piginnittut pingasuuvugut, uanga maannakkut Disko Adventuresimi kisima tamakkiisumik sulivunga. Ilakka suliffeqarput, affaannarmik Disko Adventuresimi sulisarlutik, Danny Mølgaard pilersitsisuusut ilaat oqarpoq.

Aappariit Danny Mølgaard aamma Naja Bjerregaard pingajuallu Steve Broberg suliffeqarfimmik pilersitsisuupput. Danny Mølgaard aamma Naja Bjerregaard takornarialerinermut aningaasaqarnermullu tunngasunik ilinniagaqarput.

- GU naammassigakku, aapparalu Niuernermik Ilinniarfimmiilaariarluta Adventure Guide-tut ilinniarpugut, allaffissornertassaanut ilisimasassagut Niuernermik Ilinniarfimmi ilinniarpagut, angallassinertaanut tunngasut Qaqortumi Adventure Guide-tut ilinniariarlutigit piareeratsigit suliffeqarfik aallartipparput.

Qorlortorsuarmut pisuttuarnermiit Uunartuarsuup sermianut qamuteralanneq Disko Adventuresimi misigisinnaasat ilagaat. Pilersitsisut meeraanerminiilli pinngortitami inuuneq ilisimalluareerpaat, pinngortitamilu sulinissaq taakkununnga pissusissamisuuginnarsimavoq.

- Peroriartornitsinni tamatta asimiittorujussuunikuuvugut, taavalu uanga takorloorsinnaanikuunagu allaffimmiutut sulinissara, asimi sulisariaqartutut misiginikuuvunga, Danny Mølgaard oqarpoq.

Ingerlalluartoq

Disko Adventures siornali marsimi aallartikkaluarlutik aatsaat decembarimi attaveqaqatigiittarfikkut nittarsaassineq ingerlatilerpaat, tamannalu inunniit pilerineqarnera annertusisimasoq Danny Mølgaardip oqaatigaa.

- Oqarsinnaavunga ingerlalluarluta, aallartikkatta bankimut oorerpassuarnik atornata nammineq pingasuulluta aningaasartuuteqarata aallartinnikuuvugut. Pisuttuaassinerit, qimminiisitsinerit qimussertitsinerillu atorlugit ineriartorujoorpugut.

Suliffeqarfik allisarniarlugu illuaqqanik snescooterinillu pisisimapput. Qeqertarsuarmi Hotel Disko Island suleqatigisarsimavaat, sullittagaallu nunatta avataaninngaanneersuunerusut Danny Mølgaardip oqaatigaa.

- Takornarianik aamma namminneq tutsiuttoqartarpoq, kammalaataat uagutsinnut ilaasimallutik angerlaramik oqaluttuarsimariaraangata, nammineq aamma misigerusulersimallugu tutsiuttarput.

Sulilu suliffeqarfiup annertusaqqinnissaa sulissutigerusuppaat.

- Suliffeqarfik ataavartumik ingerlasinnaanngortikkusupparput, Qeqertarsuarmi misigisassat amerlisillugit. Annertunerusumillu toqqagassaateqalerluta, sulisutaarnissarpullu aamma takorluukkatsinniipput, Danny Mølgaard oqarpoq.

Kaammattuisoq

Suliffeqarfiup Disko Adventuresip ammannginnerani pilersitsisut Danny Mølgaard, Naja Bjerregaard aamma Steve Broberg sivisuumik piareersaqqaarsimapput, inuusuttullu allat suliffeqarfimmik pilersitserusuttut Danny Mølgaardip ima siunnersorusuppai.

- Soorunami piareersarneq pisariaqarpoq kisianni aallartipallannissaq piareertutulluunniit misiginngikkaluaraanni aallartinnissaq siunnersuutigerusuppara, pissutigalugu suliffeqarfiup aallartinnerani piareersarneq ilumoortoq aatsaat aallartittarami.

- Piariivissornissamut utaqqiinnarniaraanni aallartittoqarsinnaarpasinngilaq, kalaallit eqeersimaartut amerlanerussagaluarpugut taamannak aallartipallattaraluarutta, Danny Mølgaard oqarpoq.