Kalaallit Nunaanni Burger King siulleq ammarneqalerpoq
70-nik inissaqartitsilluni Burger King Sisimiuni ammarneqassaaq, illoqarfimmilu neriniartarfinnut allanut ilassutaassalluni.
Burger King Pisiffik suleqatigiinerasogit pilersinneqarpoq, ilaqutariinnut neriniartarfittut ilusilersugaalluni. Taama allappoq Gert Christoffersen, Pisiffik Sisimiuni tuniniaanermi pisortaq.
Assi: Pisiffik
Oktobarip 30-aniit nunatsinni Burger Kingimi burgeritorsinnaalissaatit. Pisiffimmi suleqatigalugu Sisimiuni Dorthe Lennertip aqq. nr. 1-imi Burger King neriniartarfimmik ammaalerpoq.
Pisiffik tusagassiuutinut nalunaarummini taama allappoq.
Ukiut sisamat piareersartoqareersoq maanna ammaanissamut piffissanngorpoq, neriniallu 70-it neriniartarfimmi issiavissaqartassapput.
- Sisimiuni ammaanissaq tulluusimaarutigaarput. Illoqarfimmi suliniutit nutaat tapersersorneqartuaannarput, neriuppugullu Burger King neriniartarfinnut pioreersunut ilassutitut tigulluarneqarumaartoq – tamatumalu saniatigut illoqarfimmi katersuuffittut nutaatut pilersitseqataajumaartoq.
- Neriniartarfik ilaqutariinnut neriniartarfittut aaqqissuunneqarpoq, tassani kikkut tamarmik – meeqqat, inuusuttut inersimasullu – naapeqatigiissinnaapput nereqatigiillutillu, Gert Christoffersen Pisiffimmi Sisimiuni tuniniaanermut pisortaq oqarpoq.
Inuusuttut mentoreqarneq atorlugu sulilersinnaasut
Neriniartarfik nutaaq Pisiffimmit ingerlanneqarpoq, sulisullu nunaqavissuussapput.
Sulisut katillugit qulit 15-illu akornanni amerlassuseqartut ullup ilaannaa sulisassapput. Taamaasiornikkut qulakkeerneqassaaq illoqarfimmi inuusuttuaqqat misiliillutik suliffeqarsinnaanissaat.
Paneeraq Evaldsen 37-nik ukiulik neriniartarfimmik aqutsisutut atorfinitsinneqarpoq, maannalu neriniartarfimmik ingerlatsinissamik qaammammi ataatsimi Danmarkimiippoq ilinniarluni.
- Kalaallit Nunaanni Burger Kingimik siullerpaamik ammaanissamut periarfissinneqarnera tulluusimaarutigeqaara. Sisimiuni burgerinik sassaalliinissaq qilanaareqaara – aamma neriniartarfimmukartut nutaanik misiliisinneqarnissaat qilanaaraara. Neriuppugut ilaqutariinnut, inuusuttunut inersimasunullu katersuuttarfiusinnaassasoq, oqarpoq.
