Kangersuatsiami tunitsiviliornissaq pilersaarutaanngitsoq

Kangersuatsiami Upernaviup eqqaaniittumi aalisakkanut tunitsiveqannginnera nunaqarfiup siunissaanik nalorninartorsiortitsisoq nunaqarfimmi aqutsisut ukiuni kingullerni amerlasuuni oqariartuutigisarpaat.

Nunaqarfiillu allat tunitsiveqanngitsut assigalugit Kangersuatsiami innuttaasut sukkasuumik ikiliartorput, tassami innuttaasut 2014-imi 173-iusimagaluartut ukioq manna 124-nut ikileriarsimapput.

Nunaqarfimmilu aalisarnermik inuussutissarsiuteqarneq nunaqarfiup piuinnarnissaanut pingaaruteqarluinnarmat politikkikkut iliuuseqartoqartariaqartoq, Inatsisartunut ilaasortaq Innaarsunni najugaqartoq aamma aalisartuullunilu piniartuusoq, Adam Kristensen, Inuit Ataqatigiit, isumaqarpoq.

Kangersuatsiami aalisakkanut suliffissuaq Royal Greenlandimit pigineqartoq 2011-mi matuneqarpoq, nunaqarfimmilu aalisarnermik inuussutissarsiuteqarneq aallarteqqinniarlugu qanoq pilersaaruteqarnersoq, Adam Kristensen siorna pingasoriarluni paragraf 37 atorlugu Naalakkersuisunut apeqquteqarpoq. Akissutigineqartulli naapertorlugit nunaqarfimmi aalisakkanut tunitsiviliortoqarnissaa ukiuni qaninnerni ilimanaateqanngilaq.

Tunitsivik atoqqissinnaanngitsoq

Kangersuatsiami aalisakkanut suliffissuup killeqarpallaartumik imermik pilersorneqarnera pissutigalugu 2011-mi matuneqarnerata kingorna, tunitsivik namminersortumut Hans Mathiassenimut 1 koruunilerlugu 2015-imi tunineqarpoq, ukiunilu tulliuttuni qulini qaleralinnik tunitsivittut atorneqassanngitsoq tunisinermullu atatillugu isumaqatigiissutaavoq. Kangersuatsiap eqqaani saarulleqarluaraluartoq, taamaattoq tunitsivik imminut akilersinnaasumik ingerlassappat qalerallit ilanngullugit tunisassiarineqartariaqartut, taamaattumillu aalisakkerivik ammarneqarsinnaasimanngitsoq Hans Mathiassenip siusinnerusukkut Sermitsiamut oqaatigaa.

Tunitsiviullu ukioq manna ammaqqinneqarnissaa siunertaralugu Royal Greenlandip Hans Mathiassenimit utertillugu pisiarinissaanik pilersaaruteqarnersoq, Adam Kristensen paragraf 37 atorlugu apeqquteqarpoq. Taamatulli pilersaaruteqartoqanngitsoq, tunitsivillu nunaqarfimmit ungasiartumi inissisimammat annertuumillu aserfallassimammat tunitsivittut atoqqinneqarsinnaanngitsoq, Kangersuatsiamilu tunitsiveqarnikkut pissutsit aaqqinneqassappata nutaamik pitsaanerusumik inissisimasumik tunitsiviliornissaq aqqutissatuaasoq, Aalisarnermut Piniarnermullu Naalakkersuisup Kim Kielsenip, Siumut, siorna juunimi akissutaani erserpoq.

Kallerup inneranik pilersuinissaq periarfissaasoq

Kangersuatsiami nutaamik tunitsiviliortoqassappat Nukissiorfiup pisinnaasai naammannersut pillugu Adam Kristensen paragraf 37 atorlugu siorna aappassaanik apeqquteqarpoq.

Tunitsivik nutaaq umiarsualiviup pioreersup qanittuani inissinneqassappat, pilersuinermut attaveqaatit tallilernagit innaallagissap aqqutaata maanna atuuttup tunitsivimmik pilersuisinnaanerata misissornissaa pisariaqarsinnaasoq, Nunalerinermut, Imminut Pilersornermut, Nukissiuutinut Avatangiisinullu Naalakkersuisoq Kalistat Lund, Inuit Ataqatigiit, siorna septembarimi akissuteqarluni allappoq.

Tunitsivilli nunaqarfiup illuatungaani innaallagissiorfiup eqqaani inissinneqassagaluarpat, innaallagissamut attaveqaatit annertunngitsumik allannguiffiginerisigut, pilersuinermik annertunerusumik pilersitsinissap ajornannginnerunissaa ilimagineqarsinnaasoq ilanngullu paasissutissiissutigineqarpoq.

Imeq amigaataasoq

Kangersuatsiaq imermik imaaneersumik tarajuiakkamik pilersorneqarpoq, taamatullu pilersuineq nukissamik pisariaqartitsillunilu annertuumik aningaasartuuteqarfiusoq, siunissamilu aalisakkanik suliffissuaqalerneratigut imermik annertunerusumik pisariaqartitsisoqalissagaluarpat imeqarfiup naammassisaqarsinnaassusiata annertusarneqarnissaa pisariaqassasoq, tamannalu Nukissiorfinnut annertuumik aningaasartuutaassasoq, Kalistat Lundip akissutaani aamma erserpoq.

Pilersaaruteqartoqanngitsoq

Naalakkersuisut, Royal Greenland, Nukissiorfiit aamma Avannaata Kommunia Kangersuatsiami nutaamik tunitsiviliornissaq siunertaralugu suleqartigiillutik tunitisiviliornermi ataqatigiissaakkamik pilersaarusiamik Kangersuatsiami aallartitsisinnaanersut Adam Kristensenip paragraf 37 atorlugu siorna pingajussaanik Naalakkersuisunut apeqqutigaa.

Nutaamilli tunitsiviorsinnaaneq pillugu illuatungeriit qulaani pineqartut tamarmik imminnut oqaloqatigiissimanngitsut, Kalistat Lund akissuteqarluni allappoq.