KNAPK aningaasatigut tatineqangaarpoq

KNAPK-mut ukioq 2023 unammillernartorujussuuvoq. Naatsorsuutit suli akuerineqarsimanngillat, kattuffilli amigartooruteqassasoq, pisortaq Vittus Qujaukitsoq Sermitsiamut ilisimatitsivoq.

Aalisartunut piniartunullu siunnersuinermik kiffartuussinissamik Namminersorlutik Oqartussanut isumaqatigiissummik KNAPK-p 2022-mi annaasaqarnera, kiisalu ukiunik 70-inngortorsiorluni nalliuttorsiorneq aningaasatigut unammilligassaqarneranut pissutaanerpaapput.

Kiffartuussinermut isumaqatigiissummik annaasaqartoq

- Namminersorlutik Oqartussanut kiffartuussinermut isumaqatigiissut juunimi 2023-mi annaaneqarmat, sulisut marluk ukiorpassuarni sulisorineqarsimasut suliunnaarnerannut, sulinngiffeqarnersiutisiaannut aammalu soraarnerussutisiaqalernissaannut immikkut ittumik kattuffik aningaasartuuteqarpoq. Kattuffiup aningaasartuutai taakku kiffartuussinissamut isumaqatigiissummit matussuserneqanngillat. Taassuma saniatigut kattuffik illuutimut attartornermut annaasaqaateqarpoq. Kiisalu KNAPK-p 70-nngortorsiorluni nalliuttorsiorneranut atatillugu annertuumik pikkorissartitsinermut aningaasartuuteqarpoq, Vittus Qujaukitsoq aningaasatigut tatineqarneq pillugu nassuiaassivoq.

KNAPK-p 2022-mi raajarniat ilaasortatut annaavai, taakkulu soorunami kattuffiup aningaasaqarneranut malunniupput, ilaasortammi akiliutaasa appariarnerannik tamanna malitseqarmat. Ilaasortalli procentikkaartumik akiliutaat qaffakkiartorput, taamaasilluni KNAPK 2023-mi akiliutit 2020-misuut annertussuseqaqqilerput.

- KNAPK 2024-mi ukiup affaani aningaasanik tigoriaannarnik sinneqartooruteqarpoq, aamma 2024-mi aningaasartuutit isertitallu oqimaaqatigiinnissaat naatsorsuutigaarput. Taamaasilluni kattuffik akiliisinnaajunnaaleqqajanngilaq. Soorunami kattuffiup aningaasanik tigoriaannarnik pigisaanut 2023-ip naanerani amigartooruteqarneq unammillernartumut inissisimatitsivoq. Taamaattoq pigisat nalillit pisussaaffiillu oqimaaqatigiisinneranni kattuffiup nammineq aningaasaatai sinneqartooqqapput, KNAPK-p pisortaa itisiliivoq, kattuffillu aappaagu juunimi ileqquusumik ataatsimeersuarnissaminik pilersaaruteqarnerarlugu.

Siulersuineq isornartorsiorneqartartoq

KNAPK-p allaffissornikkut siulersorneqarnera pillugu immikkoortortaqarfiit aammalu siulersuisuunernut ilaasortat ataasiakkaat naammagittaalliuteqarsimasut, Vittus Qujaukitsup nassuerutigaa. 

- Uparuartuineq soorunami pimoorullugu tiguara, aamma KNAPK-p ingerlanneqarneranut aningaasaqarneranullu akisussaavunga. Kattuffimmi sulinermi annertuumik suliassaqarpugut amerlasuunillu pisussaaffeqarluta, taakkulu sulisut ikittuinnaat akornanni akisussaaffik annertooq tigummineqarpoq, ingammik uanga annertuumik tatineqarsinnaallunga tassani inissisimavunga, pisortaq oqarpoq nangillunilu:

- Aqutseriaaseq tamanit iluarineqanngilaq, tassami ilaasa matoqqavallaamik qulaaniillu aqutsiniarnertut isigimmassuk. Taamaattoq suliassat allanut miloriussuussinnaanngilakka, taamaattumik pisinnaasavut tamaasa atorlugit suliassat pitsaanerpaamik naammassiniarsarivavut. Taamaattoq kikkut tamaasa iluarisaannik iliorsinnaanngilagut, nukiit killeqartut kisimik atorsinnaagatsigit.

Suliniuteqartoqartoq

Vittus Qujaukitsoq siunissaq pillugu isumalluarpoq:

- 2025-mi siunissamilu sinerissap qanittuani aalisarneq annertuumik appariaateqanngippat, KNAPK-p isertitaasa patajaatsumik inissisimanissaat naatsorsuutigineqarpoq. Isertitassanik nutaanik pissarsiorluta sulivugut, taakkulu siulersuisuunerit kisimik aalajangersinnaavaat. Tamakku pillugit 2024-p ukiaata ingerlanerani sukumiinerusumik tusagaqarnissarsi naatsorsuutigissavarsi.

KNAPK pillugu paasissutissat

• Kaaviiaartitat: 8 millionit koruunit missaat
• Sulisut: Sisamat, suliutigalunilu inissisimasumik siulittaasoq
• Ilaasortat: 1.400 
• Akiliut: Aalisartut tunisaasa 1,5 procentii