Mittarfinnut nutaanut qatserisartut biilii nutaat

Greenland Airportsip - Nuummi Ilulissanilu mittarfissanut - mittarfinni qatserisartut biilii immikkuullarissut pingasut nutaat tigoqqammerpai – crashtenderinik taaguutillit. Pantherit Østrigimi sanaartortartumit Rosenbauerimeersut mittarfinnut nutaanut qatserisartut biilii katillugit arfineq-pingasut piniarneqarput.

Greenland Airportsip Pantherit katillugit sisamat aamma mikinerusut Buffalot sisamat pisiarai.

Panther imermik 12.500 literit tikillugit imaqarsinnaavoq, qapummik qapuliuummik 1.500 literinik imaqarsinnaallunilu 100 meterit missaannik ungasissusilimmut serpartaasinnaalluni. Taakku affaat sisamat Buffalot minnerulaartuupput, imermik 6.500 literinik aamma qapuliuummik 400 literinik imaqarsinnaallutik 70 meterisut ungasissusilimmut serpartaasinnaasut.

Pantherit angisuut nunarsuup annerpaartaani atorneqarput, kisianni siullermeerlutik Kalaallit Nunaannut tikisinneqartut, Greenland Airports ilisimatitsivoq.

Nuuk aamma Ilulissat tamarmik immikkut Pantherinik marlunnik aamma Buffalonik ataatsinik pissarsissapput, Qaqortoq Buffalonik marlunnik pissarsissasoq. 

Nuummi misilinneqartut

Pantherit siulliit pingasut aggustimi nunatsinnut tikisinneqarput, kingornalu tunniunneqarnerannut piumasaqaatinut ilaasumik Nuup Mittarfiani misilinneqarlutik - 'site acceptance-test'-imik taaneqartartumik.

Chrashtenderini atortut tamarmik tassani misilinneqarput, taamaalillutik mittarfinnut oqartussat aamma Greenland Airportsip piumasaqaataannut naammassinnissammata.

Crashtenderinut piumasaqaatit nunani tamalaani mittarfeqarfiit kattuffiannit, Icaomit aalajangersarneqarput, mittarfinnilu timmisartunit atorneqartunit aalajangersarneqartarput. Ilaatigut crashtenderi tamakkiisumik useqarluni akunnermut 0-80 km/t-mut sekundini 28-ni sukkassuseqarsinnaanera nalinginnaasumik piumasaqaataavoq, crashtenderit nutaat ulikkaarlutik useqartillutik 38 tonsinik oqimaassuseqarnerannut sanilliullugit tamanna tupinnarpoq.

Crashtenderit nutaat siunissamut isumannaallisagaasut, Greenland Airportsip attaveqaqatigiinnermut pisortaata Mikkel Bjarnøp LinkedIn-imi oqaatigaa – ilaatigut qajuusaasanik qamiterutinik 250 kg-nik imaqarsinnaagamik.

- Pantherip aappaa aammattaaq siumut sammisumik FLIR-imik assiliissuteqarpoq (assiliivik infrarød, assersuutigalugu ikummarissunik imaluunniit ajutoortoqarneranut atatillugu annassimasunik takunnissinnaasoq).

Akii isertuunneqartut

Greenland Airportsimi attaveqaqatigiinnermut pisortap crashtenderit nutaat qanoq akeqarnersut ilisimatitsissutigerusunngilaa.

- Akiat uagut tunisisullu akornatsinniippoq – taamaattumillu ilisimatitsissutigisinnaanagulu ilisimatitsissutiginavianngilarput, Mikkel Bjørnø Lund oqarpoq.

Crashtenderinik allanik pisinerit naapertorlugit qanoq akeqarneri missiliorneqarsinnaapput – naak soorunami qanoq ittuuneri imartussusaalu apeqqutaallutik – crashtenderilu akikitsuunngilaq.

Mittarfeqarfiit 2022-mi Maniitsumi, Nerlerit Inaanni aamma Qaarsuni mittarfinnut pingasunik nutaanik pisigamik, ataatsit 500.000 euronik (3,7 millionit koruuninik) akeqarput.

Qallunaat illersornissaqarfiat ukioq manna siusinnerusukkut crashtenderinik 16-inik Danmarkimi mittarfeqarfinnut pisipput. Tassanilu akiligassat katillugit 131,4 millionit koruuniupput – tassa ataatsit 8 millionit koruuninik akeqarlutik.

Mittarfinni sulisut ilinniartinneqarneri akinut ilaapput.

Crashtenderit suli amerlanerusut

- Rosenbauer Kalaallit Nunaannut tunisinermini aamma upalungaarsimasunut atuineq pillugu ilinniartitsiniarpoq. Tamatuma saniatigut mekanikerit Østrigimi fabrikimut aallartinneqassapput, taakku sananeqaataat aamma kiffartuunneqarneri pillugit teknikimik pikkorissarneqassallutik, Greenland Airports ilisimatitsivoq.

- Greenland Airportsimut crashtenderit sinneri apriilimi 2025-mi tunniunneqassapput, Greenland Airportsimi Ikuallattoqarnerani Annaassiniarnermilu Suliaqartunut akisussaasoq, Ole Mark ilisimatitsivoq.

- Rosenbauerimi qatserisartut biiliinik sanaartornerup ikuallattunillu qamiterinerni ukiut 150-it sinnerlugit nutaaliornernut annertuunut aamma teknikinut allannguisunik suliaqartarpugut. Atortut maanna tunisavut Kalaallit Nunaanni mittarfinni nutaani upalungaarsimanermut annertuumik iluaqutaassasut qularinngilarput, Manuel Angermayr, Rosenbauerimi Europap kitaani nunap immikkoortuani tuniniaanermut pisortaq – tunisinermut atatillugu Nuummiittoq taama oqarpoq.

- Rosenbauer nunarsuarmi nunanut tamangajannut Panthersinik 2.000-nit amerlanerusunik tunisaqarnikuuvoq – Pantherinillu atuisuni Kalaallit Nunaata allattorsimaffimmut maanna ilanngunneqarnera nuannaarutigaarput, Manuel Angermayr oqarpoq.