TAKORNARIAQARNEQ
Naaja H. Nathanielsen akerleriinnermut akuliuppoq: Sioorasaarineq pissusilunnerlu aaqqiissutaasinnaanngillat
Ilulissani kikkut umiarsuit takornariartaatit aqqutigalugit takornarianik sullississanersut pillugu annertuumik akerleriittoqarnerani sakkortuuliornerit atugaalersimapput. Inuussutissarsiornermut, nukissiuuteqarnermut, aatsitassarsiornermut, inatsisit atuutsinneqarnerannut aamma naligiissitaanermut Naalakkersuisoq, Naaja H. Nathanielsen (IA) naapertorlugu, tamanna Ilulissani takornariaqarnermut sunniuteqarnerluppoq.
Naalakkersuisoq Naaja H. Nathanielsen naapertorlugu Avannaata Kommuniani borgmesteri, Lars Erik Gabrielsen, Ilulissani suliffeqarfinnut takornarialerisunut atiisigut taasanut akerliussutsimik takutitsinissamut innuttaasunik qaaqqusisimavoq.
Assiliisoq: Arne Mølgaard
Avannaata Kommuniani borgmesterip, Lars Erik Gabrielsenip, inuussutissarsiornermut Naalakkersuisoq, Naaja H. Nathanielsen, annertuumik kissaammertippaa, borgmesterimi suliffeqarfinnut atiisigut taasaminut akerliussutsimik takutitsisoqassasoq kaammattuisimammat.
- Naalakkersuisut maluginiarsimavaat Avannata Kommuniani borgmesteri ingerlatsiviit aalajangersimasut taakkartorlugit akerliussutsimik takutitsinermut aggersaasimasoq.
- Kommunip tamakkiisumik politikkia Borgmesterip sinnerpaa, akerliussutsimik takutitsinissamut aggersaanikkut Avannaata Kommunianit ersarittumik takutinneqarpoq takornarialerisut akuerisaasut aarlerinartorsiortinneqartut pisortat aqutaannik akerliussutsimik takutitsivigineqarnissaminnut. Pisortat suliaminnik ingerlatsinerannik aammalu isummanik nittarsaassinermik akuliussuineq taamaattoq tulluanngivippoq, Naaja H. Nathanielsen tusagassiuutitigut nalunaaruteqarluni erseqqissaavoq.
Taassuma ilanngullugu erseqqissaatigaa 2025-mi umiarsuit takornariartaatit arlallit Ilulissiarnissaraluartik taamaatiinnarsimasut, umiarsuillu takornariartaatit arlaqartut Ilulissiaratik allamukaannarsinnaanissartik eqqarsaateqartut.
Ilanngulluguttaaq erseqqissaavoq 2022-mi Ilulissat umiarsuarnit takornariartaatinit tikinneqarnerpaani pingajuusimagaluartoq, 2024-milu tikikkumaneqarnerpaat tallimarilersimagaat.
Borgmester Lars Erik Gabrielsenip akerliussutsimik takutitsinissamik ataasinngornermi inuit attaveqaqatigiittarfiatigut Facebookikkut ammasumik kajumissaarutaa.
Ilulissani mattussinerit akerliussutsimillu takutitsinerit ukiuni arlalinni
Naaja H. Nathanielsen innersuussivoq Ilulissani ukiuni kingullerni mattussinerit aamma akerliussutsimik takutitsinerit takornarialerinermik suliaqarlutik suliffeqarfinnut aalajangersimasunut tunngatinneqartut ingerlanneqartartut. Taakkualu saniatigut aamma arlaleriarluni suliffeqarfinnut takornarissanut sullissisunut kiffartuussisuusumut sioorasaarisoqarneranik sakkortuumillu pissusilersortoqarneranillu unnerluutiginnittoqartartoq:
- Isumaqatigiinnginnerit oqallinnerillu immini ajunngillat inissaqartinneqartariaqarlutillu. Taamaakkaluartorli torersumik tamanna ingerlanneqartariaqarpoq. Sioorasaarinerit nilliallunilu pissusilersornerit akuerineqarsinnaanngillat. Pissusilersuutit taakkua tamatsinnut ajortumik kinguneqarsinnaapput, inuussutissarsiornermut, aatsitassanut, nukssiutinut, inatsisit atuutsinneqarneranut naligiissitaanermullu Naalakkersuisoq Naaja H. Nathanielsen (IA) oqarpoq.
Taannalu nangippoq:
- Takornarialerinermik inuussutissarsiorneq avammut tunisassiorneruvoq, nunarsuarmioqativullu suleqatigisinnaasariaqarpavut – sioorasaarinikkulli akuerineqarsinnaanngitsumillu takutitsinikkut suleqatigiinneq pilersinneqarsinnaanngilaq. Tamanna unitsinneqartariaqarpoq, Avannaatalu Kommuniani borgmesteri ersarissumik oqariartuuteqartariaqarpoq takornarissat suliffeqarfiillu takornarialerisut tikilluaqqusaasut.
Paasissutissat eqqunngitsut innuttaasunik aalassatsitsisartut
Inuussutissarsiornermut Naalakkersuisoq Naaja H. Nathanielsen-ip oqaatigaa inuit attaveqaqatigiittarfii aqqutigalugit takornariaqarnermik ingerlatsineq aammalu takornarialerineq aqqutigalugu aningaasaqarnikkut ingerlatsineq pillugit paasissutissat eqqunngitsumik tunngavillit saqqummiunneqartartut. Tamanna tunngavigalugu Nathanielsen ima oqarpoq:
- Sukannersumik kaammattuutigerusuppara oqallinnermi oqaasiinnaat aallaaviginagit paasissutissat eqqortut tunngavigineqassasut. Taamaattumik naqissusissavara Ilulissani takornarialerinermi ukiumut 1,9 milliardinik isertitaqartoqartarneranik oqaaseqarneq ilumuunngitsoq. Kisitsisit taakkua 2023-mut nunamut tamarmut attuumassuteqarput. Taamatuttaaq suliffeqarfiit nunap avataani inissisimasut akileraarutinut akiliinaveersaartarnerarlugit oqaatigineqarpoq. Tamannalu Naalakkersuisunit ilisimaneqanngilaq.
Takornariaqarnermi suliarisat sumiiffinnut naleqqussarneqarnissaat Naalakkersuisut tamakkiisumik tapersersorpaat, takornariaqarnerlu pillugu inatsimmi nutaami akuerineqarsimasumi tamanna anguniakkatut aamma allassimallugu. Tassungalu tunngatillugu Naaja H. Nathanielsen ima oqarpoq:
- Kikkulli suminngaaneernersut ersarissarneqarnissaat pisariaqartinneqarsimavoq. Sumiiffimmi ingerlatsisoq tassaavoq ingerlatsisoq Kalaallit Nunaanni suliffimminik ingerlatsisoq. Ingerlatsisup amiata qalipaataa kommuniluunniit angerlarsimaffigisaa isigineqarneq ajorpoq. Kalaallit Nunaanni najugallit kikkulluunniit inuussutissarsiummik Kalaallit Nunaanni sumiluunniit ingerlatsisinnaapput, Naaja H. Nathanielsen oqarpoq.
Tamanna isumaqarpoq assersuutigalugu ingerlatsisoq Ilulissani najugalik Qasigiannguani takornarialerinermik ingerlatsisinnaasoq, aammalu ingerlatsisoq Qaqortumi najugalik Tasiilami takornarialerinermik ingerlatsisinnaasoq, tassungalu Naaja H. Nathanielsen ima oqarpoq:
- Inuussutissarsiorneq kommuninut aggulullugu inissiiniarneq tamatsinnut ajoqutaassaaq. Eqqarsaatigilaarsiuk kommunerisap iluani taamaallaat ingerlatsisinnaagaanni tamanna aalisarnermut sanaartornermulluunniit qanoq isumaqassagaluarnersoq. Suna tamarmi unittuussagaluarpoq, Naalakkersuisullu tamanna politikkerinngilaat aamma politikkerilernavianngilaat. Nuna pitsaanerulersissagutsigu suleqatigiittariaqarpugut, inuussutissarsiornermut, aatsitassanut, nukissiutinut, inatsisit atuutsinneqarneranut naligiissitaanermullu Naalakkersuisoq, Naaja H. Nathanielsen, naggasiivoq.
