Aalisarnermut inatsisissap nutaap januarip aallaqqaataani 2025-mi atuutilersussap Inatsisartut upernaakkut ataatsimiinneranni akuersissutigineqarnerata kingorna, Aalisarnermut Piniarnermullu Naalakkersuisoq Kim Kielsen, Siumut, Pisassiissutit Niuerutigineqarsinnaasut Nammineq Pigisat, aamma PNNP-mik taaneqartartut umiatsiaararsortunut atuutilersinneqarnissaat pillugu paasititsiniaalluni angalasarsimanera aqutsiveqarfik 47-mi, tassa Aasiaat kujataatungaanniit avannamut Qeqertarsuup Tunua, Uummannaq aamma Upernavik eqqaalu ilanngullugit, umiatsiaararsortunut pissarsiaqaataasimasoq, umiatsiaararsortullu amerlanerit PNNP-mut ikaarsaarnissamut periarfissaq atorluarniaraaat, aalisartut piniartullu peqatigiiffiisa arlallit Sermitsiamut oqaatigaat.
Pisasseeriaaseq
Aalisarnermut inatsisissap nutaap januarip aallaqqaataani 2025-mi atuutilersussap Inatsisartut upernaakkut ataatsimiinneranni akuersissutigineqarnerata kingorna, Aalisarnermut Piniarnermullu Naalakkersuisoq Kim Kielsen, Siumut, Pisassiissutit Niuerutigineqarsinnaasut Nammineq Pigisat, aamma PNNP-mik taaneqartartut umiatsiaararsortunut atuutilersinneqarnissaat pillugu paasititsiniaalluni angalasarsimanera aqutsiveqarfik 47-mi, tassa Aasiaat kujataatungaanniit avannamut Qeqertarsuup Tunua, Uummannaq aamma Upernavik eqqaalu ilanngullugit, umiatsiaararsortunut pissarsiaqaataasimasoq, umiatsiaararsortullu amerlanerit PNNP-mut ikaarsaarnissamut periarfissaq atorluarniaraaat, aalisartut piniartullu peqatigiiffiisa arlallit Sermitsiamut oqaatigaat.
Pisasseeriaaseq
PNNP umiatsiaararsortunut atuutilerpat pisasseeriaaseq qanoq ittoq atorneqassanersoq pillugu Inatsisartunut ilaasortaq Jens Napaattooq, Naleraq, paragraf 37 atorlugu Naalakkersuisunut apeqquteqarpoq.
Umiatsiaararsortup PNNP-mut ikaarsaaarniartup ukiuni kingullerni tallimani, ukiut pingasut pisaqarnerpaaffigisimasaasa agguaqatigiisinnerat, kiisalu 2025-mut qaleralittassiissutit amerlassusaat tunngavigalugit pisassai aalajangerneqassapput. Aammali aalisartoq PNNP-nik pigisaqartoq pisassiissutinik qassinik tunisaqarsimanersoq pisiaqarsimanersorluunniit apeqqutaatillugu, pisassiissutit tamakkiisut aalajangerneqartartussaammata aalisartumut pisassiissutit ukiumiit ukiumut assigiittarnavianngitsut, Aalisarnermut Piniarnermullu Naalakkersuisoq, Kim Kielsen, Siumut, akissuteqarluni ilaatigut allappoq.
Angallatinut 6-meteriniit anginerusunut aqutsiveqarfik 47-mi PNNP-nik pigisaqareersunut allannguuteqartoqassanngilaq, taakkulu 2025-mut qaleralittassiissutit amerlassusaat aalajangerneqareerpata pisassiissutinik tunineqassapput.
Qinnuteqarnermut killigititaq tusarniaanerlu
Umiatsiaararsortut nammineq kajummissusertik aallaavigalugu PNNP-mut ikaarsaarnissaannut qinnuteqarnissamut 15. oktober killigitinneqarpoq, tamatumalu kingorna qinnuteqartunut ataasiakkaanut pisassiissutit pigisat naatsorsorneqarnerat aallartissaaq. Qinnuteqartunut tamanut naatsorsuinerit naammassineqarpata, tusarniaaneq nassiunneqassaaq, tassanilu naatsorsuinernut akerliliissuteqarnissamut aalisartut periarfissaqassapput. Akerliliissuteqarnissamut piffissaliussaq naappat, tamatumunnga tunngavissaqarpat, Aalisarnermut Piniarnermullu Naalakkersuisoqarfik naatsorsueqqissaassaaq. Tamatuma kingorna aatsaat pisassiissutinik nammineq pigisassanik aammalu pisassanik aalisartunut PNNP-mut ikaarsaarnissamik qinnuteqarsimasunut agguaassisoqassaaq, tamannali aqutsiveqarfik 47-mi 2025-mut qaleralittassiissutit amerlassusissaat aaliangerneqareerpat aatsaat pissasoq, Aalisarnermut Piniarnermullu Naalakkersuisoq Kim Kielsen paasissutissiivoq.
Aalisarnermut inatsisissaq iluarisimaarneqartoq
Ilulissani aalisartut piniartullu peqatigiiffianni siulittaasoq Kaaleeraq Mathæussen naapertorlugu, umiatsiaararsortut amerlasuut PNNP-mut ikaarsaarniarlutik qinnuteqartut qinnuteqassamaartulluunniit amerlapput.
- Umiatsiaararsortut PNNP-mut ikaarsaarnissaannut isuma Ilulissaniit aallaaveqarpoq, taamaattumik maani umiatsiaararsortut tassunga ikaarsaarusuttut amerlapput.
- Uanga PNNP-mut nuukkuma ukiuni kingullerni tallimani, ukiut pingasut pisaqarnerpaaffigisimasaasama agguaqatigiisinneranni ukiumut 35 tonsit sinnilaarlugit pisinnaagikka paasivara, taamaalilluta aalisarneq toqqissisimanerusumik isumalukuluuteqarpallaarata ingerlassinnaalissavarput, taanna oqarpoq.
Qasigiannguani umiatsiaararsortut amerlasuut PNNP-mut ikaarsaarnissartik orniginartikkaat, aalisartut piniartullu peqatigiiffianni siulittaasup tullia Hans Sandgreen oqarpoq.
- Uanga utoqqasaanngulerama paggatassiissutinik aalisaannarnissara qinerpara, taamaakkaluartoq PNNP-p periarfissaalernera pitsaasutut isigaara aamma tamanna umiatsiaarartut amerlasuut taama isumaqarput.
- Inatsisissap suliarineqarnerani politikerit arlallit eqqunngitsunik allaat ersisaarutitut taaneqarsinnaasunik oqaluttarsimasut paasinarsivoq, tamannalu inituallaarujussuarsimavoq, taanna oqarpoq.
– Umiatsiaararsortut PNNP-mut ikaarsaarnissaannut isuma Ilulissaniit aallaaveqarpoq,
taamaattumik maani umiatsiaararsortut tassunga ikaarsaarusuttut amerlapput, Ilulissani aalisartut
piniartullu peqatigiiffianni siulittaasoq, Kaaleeraq Mathæussen, oqarpoq.
Assi: Leiff Josefsen
Uummannami aalisartut piniartullu peqatigiiffianni siulittaasoq Ole Møller naapertorlugu Uummannami umiatsiaararsortut amerlanerpaat PNNP-mut nuunnissartik kissaaatigaat – aammali aalisartut ilaasa tamanna eqqarsarnartoqatikkaat erseqqisaatigaa.
- Aalisarnermut inatsississaq ataatsimut isigalugu iluarisimaarneqarpoq, taamaakkaluartoq soorunami aamma ilaqarput pakatsisimasut, taakkuuppullu paggatassiilluni aalisarnermi pisaqarnerpaasarsimasut.
- Taakku PNNP-mut ikaarsaassagunik ukiumut qalerallit qaqittagaat 25 tonsit 30 tonsillu missaanni ikinnerulissasut, tamannalu uggornarpoq, taanna oqarpoq.
Umiatsiiararsortorlu PNNP-mut ikaarsaarsimasoq amerlanerusunik pisaqassaguni pisassanik pisassiissutinik pisisinnaanerata periarfissaalernissaa iluaqutitaqartoq, Ole Møller isumaqarpoq.
