AG-mi juunip 19-ianni (AG nr.25, aaqq.) saqqummersumi, Palle Heilmannip siorna aggustip 16-ianni sullivimmini ajutoortoqarneratigut 800 kiilunik oqimaatsigisunik nakkarfigineqarnera allaaserineqarpoq.
- Allaaserisap saqqummernerata kingorna inuppaalussuarnit inoqatinut attaveqaqatigiittarfitsigut ajunngitsumik qisuariarfigineqarpunga. Inuppassuit annilaarsimapput tupassimallutillu, Palle Heilmann oqarpoq, taanna kommunimit sulisinnaanngitsutut naliliiffigineqarsimavoq.
AG-mi juunip 19-ianni (AG nr.25, aaqq.) saqqummersumi, Palle Heilmannip siorna aggustip 16-ianni sullivimmini ajutoortoqarneratigut 800 kiilunik oqimaatsigisunik nakkarfigineqarnera allaaserineqarpoq.
- Allaaserisap saqqummernerata kingorna inuppaalussuarnit inoqatinut attaveqaqatigiittarfitsigut ajunngitsumik qisuariarfigineqarpunga. Inuppassuit annilaarsimapput tupassimallutillu, Palle Heilmann oqarpoq, taanna kommunimit sulisinnaanngitsutut naliliiffigineqarsimavoq.
Ajoqusernini sullivimmi ajoqusernertut suli akuerineqarsimanngitsoq, AG-mut nassuiaavoq.
- Taama sivisutigisumik utaqqinissaq pakatsinarpoq, Palle Heilmann AG-mut oqarpoq, taannalu akissutisinissaminut qaammatit 14-it angullugit utaqqisinnaasoq, Sulitilluni Ajoqusernerit pillugit Sullissivimmit paasitinneqarsimavoq.
Sullivimmi ajoqusernerit suliarineqartarnerat 2023-mi agguaqatigiissillugu qaammatini 20-ni utaqqineqartartoq.
- Aallaavittut suliat taamaattut aalajangersimasunut tunngalluinnartuupput qanorlu sivisutigisumik suliarineqartarnerat assigiinngitsorujussuullutik, Sullivimmi Ajoqusernerit pillugit Sullissivik AG-mut taama ilisimatitsivoq.
Sooq taama sivisutigisumik utaqqisoqartarnersoq Sullissivimmit oqaatigineqarsinnaanngilaq.
- Suliani tamani ajoqusersimasut sulinerminni atugaat, ajutoortoqarnerani pissutsit, ajoqusernerup qanoq ittuunera annertussusialu pillugit paasissutissat naammattut pissarsiarineqartarnissaat qulakkeerniartarparput. Paasissutissat allanit pissarsiarisariaqartakkavut tamannalu sivisusinnaasarluni, Sulitilluni Ajoqusernerit pillugit Sullissivik (CFA) taama paasissutissiivoq.
Sullivimmi ajoqusertoqarsimaneranik nalunaarut CFA-mit tiguneqaraangat, suliassaq siullermik nalunaarsuiffimmut nalunaarsorneqartarpoq. CFA-p ajoquserneq sulinermi ajoqusernerunersoq misissoqqaartarpaa, tassa ajoquserneq inatsimmut tunngassuteqarnersoq imaluunniit sulinermi ajoqusernertut akuerineqannginnera pissutigalugu itigartittariaqarnersoq nalilersorneqartarluni.
Ajoquserneq sullivimmi ajoqusernermut sillimmasiinermut inatsimmut ilaappat, ajoqusersimasoq aalajangiinermik nalunaarfigineqassaaq, ajoqusernera ajutoornertut imaluunniit inuussutissarsiornermi nappaatitut akuerineqarsimaneranik. Sulinermi nappaateqalerneq tassaavoq nappaat imaluunniit anniaat sulinermit imaluunniit sulinerup nalaani pissutsinik pissuteqartoq.
Ajoquserneqartoq (imaluunniit taanna sinnerlugu pisinnaatinneqartoq) ajoquserneq taarsiiffigineqarsinnaanersoq tamatumunnga peqatigitillugu aamma paasitinneqartarpoq.
Ajoquserneq inatsimmut attuumassuteqanngippat, ajoqusernerup suliarinissaanut itigartitsinerup aalajangiunneqarnera nassiunneqassaaq.
Suliassat qaleriiaaginnartut
Sullivimmi ajoqusernerit pillugit sullissivik aamma ilisimatitsivoq, suliassat 2023-mi naammassineqartussat kinguaattoorfiusut: - Tamatuma kinguneranik suliassat pisoqaanerusut amerlasuut naammassiniartarsimavavut, tamannalu suliassat suliarineqarnerannut piffissamut agguaqatigiissillugu atorneqartumut sunniuteqarluni, sullissivik nassuiaavoq.
Palle Heilmannip oqaatigaa, kommunimit pisortatigoortumilluunniit allamit ikiorneqarnissaminik neqeroorfigineqarsimanani.
- Misigisimavunga sumiiffinnit assigiinngitsunit assigiinngitsunik paasissutissinneqartarlunga. Allaannginnami pisussinnaanera piinnarlugu sulisinnaasutut isiginiarneqartunga, siornatigutulli sulisinnaanngilanga, Palle Heilmann oqarpoq.
Suliassat suliarineqarnissaannut utaqqisarnerup sivikinnerulernissaa, siunissami naatsorsuutigineqarpoq.
- Piffissap ingerlanerani suliat suliarineqartarnerat sivikinnerulerumaartoq naatsorsuutigaarput, kisianni suli suliassaqartassaaq naammaginartumik paasisaqarfiginissaannut piffissamik sivisuumik atuiffigisariaqartunik, CFA ilisimatitsivoq.
