ICC: Pisinnaatitaaffitta naalakkersuisutigoortumik piviusunngortinnerat pingaaruteqarluinnarpoq

Issittumi Siunnersuisoqatigiinni siulittaasoqarfik Kunngeqarfik Danmarkimut, Kalaallit Nunaat siuttoralugu, ataasinngormat tunniunneqarpoq.

Norgemi Tromsømi Inuit Issittormiut Siunnersuisoqatigiivinit peqataaffiginertumi pivoq. Siulittaasuata Sara Olsvigip oqalugiarnermini nunat Issittumi Siunnersuisoqatigiinni ilaasortat pinertusarnerat, ilisimasaat Issittullu sorsuffiunnginnissaa, patajaannera suleqatigiiffiunerata attatiinnarnissaata eqqaavaa.

ICC Issittumi Siunnersuisoqatigiinni ataavartumik peqataasartuuvoq pilersitseqataanikuullunilu.

- Naalagaaffiit aamma Nunap Inoqqaavisa kattuffii tamaasa nersualaarpavut ataatsimoorussatsinnik iluatsittumillu suliniuteqarnitsinnut – tassalu Issittumi Siunnersuisoqatigiiffiup Issittumi innuttaasunut tamanut pingaaruteqarnerata akuersaarnissaanut naqissusiinissaanillu siunertaqartumut, Sara Olsvig oqarpoq.

Kunngeqarfiup Danmarkip siulittaasuunerani suliniutigineqartussat qaammat ataaseq matuma siorna saqqummiunneqarmata Sara Olsvigip tulluusimaarutigalugu oqaatigaa. Tassa suliniutit pingaarnersaat tassaammata "Nunat Inoqqaavi aamma Issittumi inuiaqatigiit“.

- Ukiuni untritilinni kingullerni arlariinni allanngornerit annertuut aqqusaareersimallugit politikkikkut aalajangiiffiusuni tamakkiisumik sunniuteqartumillu peqataanissarput annerpaaq siunertaraarput. Arlaleriaqaluta oqartarpugut – uagut pilluta pisuni avaqqunneqassanngilagut, Tromsømi oqarpoq.

Uniinnarnissaq periarfissaanngitsoq

Sara Olsvigip nunap inoqqaavisa ataatsimoorussamik pisinnaatitaaffeqarnerat, Naalagaaffiit Peqatigiit nunap inoqqaavisa pisinnaatitaaffii pillugit nalunaarutaannit uppernarsarneqarsimasut, eqqartorpai.

- Suleqatitut naligisatut Nunap Inoqqaavisullu Pisinnaatitaaffitta akuerinerat aamma tassaavoq oqaluttuarisaanitta pereersup, massakkut unammillikkatta siunissamullu aqqutip ataatsimoorussamik paaseqatigiissutiginiarnera. Pisinnaatitaaffitta naalakkersuisutigoortumik piviusunngortinnerat pingaaruteqarluinnarpoq, oqarpoq.

Norgep ukiuni marlunni kingullerni siulittaasuunerata ingerlanerani siuariartoqarsimasoq Sara Olsvigip oqalugiarnermini nersualaarpaa.

- Najugaqarfipput pillugu avataaneersunik sunniiniarnissatsinnut Issittumi Siunnersuisoqatigiit pingaaruteqarluinnarpoq, oqarpoq.

Kunngeqarfiup Danmarkip siulittaasuunerani Kalaallit Nunaata siuttuuffigisassaa tikilluaqqullugu, Nunap Inoqqaavisa takkulu ilisimasaasa akuutinneqarnerisa annertusarneqarnissaata siunertarineqarnera eqqaavaa.

- Suli ingerlariaqqissaagut – uniinnassanngilagut.

- Taamaasilluta, Romssa – Tromsø-mit Oqaaseqaat tamakkiisumik taperserlugu nalunaarutigaarput, qilanaarpugullu Issittumi Siunnersuisoqatigiit suli nukittorsarlugulu attatiinnarneqarnissaanut suleqataanissatsinnut, Sara Olsvig naggasiivoq.