Sermitsiaq AG-lu kattullugit aviisimi ataatsimi sapaatit-akunnerisa naaneranni saqqummertalissapput

Tusagassiorfimmit Sermitsiamit naqitatut saqqummersinneqartartut ineriartortinneranni nutaaliortoqarpoq. Aviisit, Sermitsiaq aamma AG, sapaatip-akunnerata naanerani ataatsimut saqqummersittalerlugit kattunneqassapput.

Aviisit maanna naqitatut immikkut saqqummertarput, ataatsimulli saqqummersittalerneranni oqaluttuat pitsaasut naqitat atuartartunut neqeroorutigisalernissaat siunertaavoq.

Aviisi nutaaq sapaatip-akunnerata naanerani saqqummersartoq Sermitsiamik ateqassaaq, atuartartullu AG-p immikkoortortaa aviisimi suli atuarsinnaassallugu. AG-mi kulturimut, sunngiffimmi sammisanut timersornermullu tunngasut sammineqartarput – taakkulu sapaatit-akunnerisa naaneranni saqqummersartumut ilanngunneqartalissallutik.

– Atuartartutsinnut naqitamik pitsaanerusumik pilersitsiniarluta ataqatigiissaarivugut. Sapaatit-akunnerisa naaneranni aviisimi nuna tamakkerlugu oqaluttuat pingaarutillit, inuussutissarsiornermut tunngasut aamma AG-p silarsuaani inunnut qaninnerusumik oqaluttuat ataatsimoortillugit atuarneqarsinnaalissapput, Tusagassiorfimmi Sermitsiami pisortaq Masaana Egede oqarpoq.

Tusagassiorfimmi digitalikkut ineriartortitsineq suli aallunneqassaaq, nittartakkamilu Sermitsiaq AG-lu e-aviisitut immikkut atuarsinnaaneqarumaarlutik. Naqitanik saqqummersitsisarneq ataatsimoortinneqassaaq, aviisilli tamarmik imarisaat kinaassusiallu attatiinnarneqassallutik.

Aviisi sapaatit-akunnerisa naaneranni saqqummertussaq siulleq ukiortaami januaarimi pissaaq.

Nuuk Ugeavis Tusagassiorfimmit Sermitsiamit saqqummersinneqartarunnaassaaq

Nuuk Ugeavis ukiorpassuarni saqqummersinneqartareersorlu aviisi saqqummertarunnaassasoq Tusagassiorfik Sermitsiami aalajangerneqarpoq. Illoqarfimmi inuunermut kulturimullu tunngasuni taanna katersuuffiuvoq pingaarutilik.

Nuuk Ugeavis Nuummi piffissami sivisuumi ulluinnarni ilaavoq – aviisi akeqanngitsoq inuppassuarnit nuannarineqarluartoq. Aamma illoqarfimmi inuunermut kulturimullu tunngasunik katersuuffiuvoq pingaarutilik.

- Nuuk Ugeavis Nuummi tusagassiorfitsinnilu immikkut ittumik inissisimavoq. Aviisip inissisimaffigisimasaa tulluusimaarutigaarput, nalunngilarpullu innuttaasorpassuit iluaqutigilluartarsimagaat. Niuernerulli ineriartornera pissutaalluni aningaasaqarnikkut imminut napatissinnaanera periarfissaajunnaarsimavoq, Tusagassiorfimmi Sermitsiami pisortaq Masaana Egede oqarpoq.

Ukiuni kingullerni isertitat appariartupiloorput, aviisillu saqqummertarnera imminut akilersinnaajunnaarpoq.

- Atuartartut, ussassaarutinik saqqummiussisartut sulisullu Nuuk Ugeavisip immikkuullarinneranik pilersitseqataasut tamaasa qutsavigaagut. Aalajangerneq ataqqinnittumik eqqarsaatigilluakkamillu, tusagassiorfiulli siunissaa qulakkeerniarlugu, pivoq, Masaana Egede oqarpoq.

Nuuk Ugeavis decembarimi 2025-mi naggammik saqqummissaaq.

Allannguutit Tusagassiorfimmi Sermitsiami digitalimik ineriartortitsinermut ilaapput. Digitalikkut tusagassiornerup pitsanngorsarneqarneranut, Nunatsinni tusagassiuutitigut siuttutut inissisimanerup attatiinnarnissaanut kiisalu atuisut aviisimik naqitamik pitsaanerusumik suli pissarsisinnaanissaannik qulakkeerinninniarluni aalajangerneqarlutik.