– Neriniartarfittaatta Nuummiittup soqutigineqarluarnera
neriartortoqarluarneralu assorsuaq qujamasuutigaarput.
Restaurant SØMA Nuuk, nerisassanik
suliarilluakkanik akisuallaanngitsunik sassaalliisarnissamik siunertaqartoq
pillugu taama oqarpoq Mads Futtrup, attaveqatigiinnermut ingerlatsisuusoq
SØMA-llu aqutsisoqatigiivinut ilaasoq.
– Neriniartarfittaatta Nuummiittup soqutigineqarluarnera
neriartortoqarluarneralu assorsuaq qujamasuutigaarput.
Restaurant SØMA Nuuk, nerisassanik
suliarilluakkanik akisuallaanngitsunik sassaalliisarnissamik siunertaqartoq
pillugu taama oqarpoq Mads Futtrup, attaveqatigiinnermut ingerlatsisuusoq
SØMA-llu aqutsisoqatigiivinut ilaasoq.
Neriniartarfik franskit nunallu avannarliit
ileqqutoqaat malillugit nerisassiassanik nunatsinneersunik neqerooruteqartarluni
nutaamik aaqqissuussisimavoq.
– Ullormut
sassaalliutissanik ineriartortitsiitigaluta assigiinngitsunik
aaqqissuussisarnigut, soorlu ”Kalaallit nerisassaataannik sassaalliineq”
imaluunniit ”Rosemik qalerualinnillu sassaalliineq” illoqarfimmi innuttaasunit
ornigarneqarluartartut neriniartarfitsinnilu nuannersumik pilersitsisartut,
nuannaarutigingaarpagut, Mads Futtrup oqarpoq.
Suliniut alla
tassaavoq kingusissumi ullaakkorsiorneq.
AKUNNITTARFEQATIGIINNI NUTAANIK AQUTSISOQALERSOQ
Hotel SØMA-mi ukiuni kingullerni allannguutit
annertit ilaat tassaavoq akunnittarfeqatigiit 2024-mi aasap ingerlanerani
nutaanik pisortaqatigeeqalernera.
Taakku tassaapput Nicolaj Wibe, Erik Hansen,
Magnus Elleby aamma Mads Futtrup.
Umiartortunut nalunaajaasut allattuunerat Nicolaj
Wibe suliniaqatigiiffimmi SØMA-mi naleqartitanut umiartortunullu nalunaajaasut
ingerlalluarnissaannut akisussaasuunertut inissisimavoq. Erik Hansen Umiartortunut
nalunaajaasuni, Vejlemi qullersaqarfeqartuni, aningaasaqarnermut
ingerlatsisuuvoq. Magnus Elleby SØMA-mi nittarsaassinermut sulisoqarnermullu
ingerlatsisuuvoq, Mats Futtrupilu attaveqatigiinnermut digitalinullu
tunngasunut ingerlatsisuuvoq.
- Aqutsisoqatigiit
Hotel SØMA-p Umiartortunullu nalunaajaasut naleqartitaannik
pingaartitsilluinnartuupput. Hotel SØMA-milu maanna pitsaasumik ineriartorneq
kattuffiup sumiiffinni suliaqarfinnilu tamani qanimut atanerulersimaneranik
pissuteqarpoq. Matumani sulisugut pikkorissut nersugassaapput, sumiuugaluarunik,
qanoq kultureqaraluarunik assigiinngitsunillu suliaqaraluaruni qanimut
suleqatigiittuusut, Mads Futtrup oqarpoq.
- Illoqarfimmi
kingusissumik ullaakkorsiortitsinerit pitsaanersaat. Sapaatip akunnerisa
naaneri tamaasa arfininngornikkut sapaatikkullu kingusissumik
ullaakkorsiortitsisarpugut,
Neriniartarfik
ilaatigut taama Facebookimi imminut ilisaritippoq. Taamaammallu
neriartortorpassuaqartarluni.
Millionilikkaanik aningaasaliisoq
Hotel SØMA, nunatsinni akunnittarfeqatigiit
annerit ilaat, akunnittarfinnik sisamaasunik ukiorpaalunni nutarsaallunilu
sumiiffinni tamani suliniutinik nutaanik aallartitsisarpoq. Tamannalu siuariartuutaavoq.
- Ataatsimiittarfeqarnikkut
pitsanngorsaanermiit sutorniartarfitsinni neriniartarfitsinnilu nutaamik
aaqqissuussinernut ingerlanneqarput, attaveqatigiinnermut ingerlatsisoq
oqaluttuarpoq.
Nunatsinni akunnittarfeqatigiit iluanaarniarfiunngitsut
(non-profit, aaqq.) Sømandshjemmet akunnittarfitik sisamaasut millionilikkaanik
pingasunik kisitsitalinnik aningaasaliiffigalugit nutarsarlugillu alliniarlugit
2021-p naanerani nalunaarput. Akunnittarfeqatigiit tamatumunnga atatillugu
aamma Hotel SØMA-mik ateqalerlutillu akunnittarfiit imigassanik
aalakoornartulinnik sassaalliisinnaanermut akuersissuteqalerput.
Akunnittarfimmi Nuummiittumi init tamarmik
nutarsarneqarnikuupput. Akunnittarfimmi neriniartarfimmilu Nuummiittumi, akunnittarfeqatigiillu
akunnittarfiini allani pingasuusuni Sisimiuniittumi, Aasianniittumi
Ilulissaniittumilu qanoq annertutigisumik aningaasaliisoqarsimanersoq SØMA-p
aqutsisuisa oqaatigiumanngilaat.
- Iluanaarniuteqarfiunngitsumik
akunnittarfiuteqarnerput pissutigalugu aningaasarsiorniaraangatta
siunertatsinnut, tassa atugarissaarnermut kiffartornermullu,
atorsinnaasatsinnik aningaasarsiorniarluta aalajangernitsinni tamani
aalajangiisarpugut.
- Taamaakkaluartoq
niuernermi pikkorinnissaq pisariaqarpoq, taamaanngippat piunitsinnut
siunertarput tammassaaq.
- Taamaammat
aamma ineriartornerput aningaasaliisarnivullu tulluusimaarutigaagut – naak
aningaasaliinerit sukkassusaat allanngoraraluartoq avatangiisitsinnut,
niuernermut ineriartornermullu naleqqussartuaannaratta, Mads Futtrup oqarpoq.
Issittumi takornariaqarneq siuariartorpoq. Tamanna
aamma Hotel SØMA-ni illoqarfinni sisamaniittuni malugisinnaavaat, tassami
unnuiffissat misigisassallu piumaneqarnerat ukiut tamaasa qaffattarpoq.
Akunnittarfinni annertuumik alliliinerit
siullersaat kingusinaarluni Sisimiuni upernaaru aatsaat naammassissaaq. Suliniut,
tassani ineeqqanik 23-nik, inissianik marlunnik, saaffiginnittarfimmik
nutaamik, ataatsimeersuartarfinnik nutaarluinnarnik aamma imerniartarfimmik
neriniartarfimmillu alliliinerusoq upernaap ingerlanerani naammassissasoq
naatsorsuutigaa.
Ilulissani annertuumik nutarsaaneq
SØMA decembarip qaammataani ilulissani
ineeqqani tamani annertuumik nutarsaagami akunnittarfimmi ingerlatsisoq
Marianne Laursen siuttoralugu takornariaqarnissaanut piareersimavoq.
- Aasianni
sutorniartarfik 2024-mi nutarsarnikuugatsigu avatangiisit nutaat ulluinnarni
sutorniartartunit tigulluarneqarneri nuannaarutigaagut. Tamatuma saniatigut
igaffik uninngasuusivillu allillugillu pitsanngorsarniarlugit 2025-mi
pilersaaruteqarpugut, attaveqatigiinnermut ingerlatsisoq oqarpoq.
SØMA
aningaasaqarneq akunnittorpassuillu eqqarsaatigalugit 2024-mi qanoq
ineriartortigisimava?
- Ukiumi nutaami aatsaat sapaatip akunnerata aappaanut killippugut, taamaammat
kisitsisit suli naammassinngillat. Aatsaalli taamak amerlatigisunik
akunnittoqarsimasoq qularnata oqaatigisinnaavarput. Akunnittarfiit
neriniartarfiillu kisitsisaat kattukkaanni, Mads Futtrup oqarpoq.
Mittarfiit sunniutaat
Nuummi Ilulissanilu mittarfittaat
takornariaqarnermut pitsaasumik sunniuteqassasut Mads Futtrupip
qularutiginngilaa.
- Nuannaariarlutik
aammali sulinerminnut atatillugu takornarianut annertusaanissaq, aammali
nalinginnaasumik takornariaqarfiunngitsunik sivitsuinissaq pisariaqassaaq, tamannalu
akunnittartut procentinngorlugu annertussusaannut qaffaataassaaq.
- Aallaqqaammut
Nuummi mittarfittaap ammarnerata kingorna suliaqarffimmi tamani misilittakkat
ilinniarfigissavagut. Taavalu soorunami Ilulissani mittarfittaarpat
periarfissat takkuttussat aamma eqqumaffigissavagut.